Reliance Jio: ಏರ್‌ಟೆಲ್‌ ಅನ್ನು ಹಿಂದಿಕ್ಕಿದ ಜಿಯೊ

ಟೆಲಿಕಾಂ ಮಾರುಕಟ್ಟೆಯಲ್ಲಿ ಬಹುಕಾಲದಿಂದ ಪ್ರಾಬಲ್ಯ ಸಾಧಿಸಿದ್ದ ಏರ್‌ಟೆಲ್‌ ಅನ್ನು, ಈಗ ರಿಲಯನ್ಸ್‌ ಜಿಯೊ ಹಿಂದಿಕ್ಕಿ ಎರಡನೇ ಸ್ಥಾನಕ್ಕೆ ಬಂದಿದೆ. 30 ಕೋಟಿ ಗ್ರಾಹಕರನ್ನು ಹೊಂದಿರುವುದಾಗಿ ಜಿಯೊ ಹೇಳಿಕೊಂಡಿದೆ.

ಮುಕೇಶ್‌ ಅಂಬಾನಿ ನೇತೃತ್ವದ ರಿಲಯನ್ಸ್‌ ಜಿಯೋ ಸೇವೆ ಆರಂಭವಾದ ಎರಡೂವರೆ ವರ್ಷದಲ್ಲಿಯೇ 30 ಕೋಟಿ ಗ್ರಾಹಕರನ್ನು ತನ್ನ ತೆಕ್ಕೆಗೆ ಸೆಳೆದಿದೆ. ಈ ಮಟ್ಟವನ್ನು ತಲುಪಲು ಏರ್‌ಟೆಲ್‌ 19 ವರ್ಷವನ್ನು ತೆಗೆದುಕೊಂಡಿತ್ತು. ವೊಡಾಫೋನ್‌-ಐಡಿಯಾ ಮೊದಲ ಸ್ಥಾನದಲ್ಲಿದೆ. 28 ಕೋಟಿ ಗ್ರಾಹಕರನ್ನು ಹೊಂದಿರುವ ಏರ್‌ಟೆಲ್‌, ಹೊಸ ಅಂಕಿಅಂಶಗಳ ಪ್ರಕಾರ ಎರಡರಿಂದ ಮೂರನೇ ಸ್ಥಾನಕ್ಕೆ ಕುಸಿದಿದೆ.

ಈ ವರ್ಷದ ಮಾ.2ಕ್ಕೆ 30 ಕೋಟಿ ಗ್ರಾಹಕರ ಗಡಿಯನ್ನು ಜಿಯೊ ದಾಟಿದ್ದು, ಟೆಲಿಕಾಂ ವಲಯದಲ್ಲಿ ನಂ.1 ಸ್ಥಾನದತ್ತ ಗಮನ ನೆಟ್ಟಿದೆ. ಜಿಯೋಗೆ ಹೋಲಿಸಿದರೆ ಏರ್‌ಟೆಲ್‌ ಗ್ರಾಹಕರ ಸಂಖ್ಯೆ ಶೇ.8ರಷ್ಟು ಕಡಿಮೆ ಇದೆ. ಕಾರ್ಯಾಚರಣೆ ಆರಂಭಿಸಿದ 170 ದಿನಗಳಲ್ಲಿ 10 ಕೋಟಿ ಗ್ರಾಹಕರನ್ನು ಜಿಯೊ ತನ್ನ ತೆಕ್ಕೆಗೆ ಹಾಕಿಕೊಂಡಿತ್ತು.

ದೂರ ಸಂಪರ್ಕ ನಿಯಂತ್ರಕ ಟ್ರಾಯ್‌ನ ಇತ್ತೀಚಿನ ವರದಿ ಪ್ರಕಾರ, ಮಾರುಕಟ್ಟೆಯ ಮುಂಚೂಣಿ ನಾಯಕ ವೊಡಾಫೋನ್‌-ಐಡಿಯಾ ಈ ವರ್ಷ 57 ಲಕ್ಷ ಗ್ರಾಹಕರನ್ನು ಕಳೆದುಕೊಂಡಿದೆ. ಎರಡು ಕಂಪನಿಗಳ ವಿಲೀನದಿಂದಾಗಿ ಮಾರುಕಟ್ಟೆಯಲ್ಲಿ ಅಸ್ತಿತ್ವ ಉಳಿಸಿಕೊಳ್ಳಲು ಸಾಧ್ಯವಾಗಿದೆ ಎಂದು ವಿಶ್ಲೇಷಿಸಲಾಗಿದೆ.

ದರ ಸಮರ ಆರಂಭಿಸಿ ಮಾರುಕಟ್ಟೆಯಲ್ಲಿ ಪಾಲು ಪಡೆದ ಜಿಯೊ 2021ರ ಹೊತ್ತಿಗೆ ಟೆಲಿಕಾಂ ಮಾರುಕಟ್ಟೆಯ ಶೇ. 40ರಷ್ಟನ್ನು ತನ್ನ ಹಿಡಿತಕ್ಕೆ ಪಡೆಯಲಿದೆ ಎನ್ನುವುದು ಅಮೆರಿಕ ಮೂಲದ ಕಂಪನಿಯೊಂದರ ಅಂದಾಜು.

ಯಾವ ಕಂಪನಿಗೆ ಎಷ್ಟು ಗ್ರಾಹಕರು?
ವೊಡಾಫೋನ್‌-ಐಡಿಯಾ: 38.7 ಕೋಟಿ
ಜಿಯೊ: 30.6 ಕೋಟಿ
ಏರ್‌ಟೆಲ್‌: 28.4 ಕೋಟಿ.