Koo App: ಕನ್ನಡದಲ್ಲಿಯೇ ಈಗ ಕೂ ಮಾಡಿ.. ಬಂದಿದೆ ದೇಸಿ ಆ್ಯಪ್!

ದೇಶದಲ್ಲಿ ಈಗ ದೇಸಿ ಸರಕು ಮತ್ತು ಆ್ಯಪ್, ಗ್ಯಾಜೆಟ್‌ ಮತ್ತು ಎಲೆಕ್ಟ್ರಾನಿಕ್ಸ್‌ಗೆ ಹೆಚ್ಚಿನ ಬೇಡಿಕೆ ಬಂದಿದೆ. ಚೀನಾ ಆ್ಯಪ್ ನಿಷೇಧದ ತರುವಾಯ ನಡೆಯುತ್ತಿರುವ ಚೀನಾ ಸರಕು ಬಹಿಷ್ಕಾರ ಅಭಿಯಾನದಿಂದಾಗಿ ಜನರು ಕೂಡ ಹೆಚ್ಚು ಹೆಚ್ಚು ದೇಸಿ ಆ್ಯಪ್, ಉತ್ಪನ್ನಗಳ ಮೊರೆ ಹೋಗುತ್ತಿದ್ದಾರೆ. ಇದೇ ಸಂದರ್ಭದಲ್ಲಿ ಕನ್ನಡಿಗರೊಬ್ಬರು ಮೈಕ್ರೋಬ್ಲಾಗಿಂಗ್ ಆ್ಯಪ್ ಪರಿಚಯಿಸುವ ಮೂಲಕ ಹೊಸ ಸಾಹಸ ಮಾಡಿದ್ದಾರೆ. ಈಗಾಗಲೇ ಬಳಕೆಯಲ್ಲಿರುವ ಟ್ವಿಟರ್‌ಗೆ ಸಮನಾದ ಫೀಚರ್‌ಗಳು ಮತ್ತು ಅದಕ್ಕಿಂತ ಹೆಚ್ಚಿನ ಸುಧಾರಿತ ಆಯ್ಕೆಗಳನ್ನು ಹೊಂದಿರು ಕೂ ಆ್ಯಪ್ ಗೂಗಲ್ ಪ್ಲೇ ಸ್ಟೋರ್ ಮೂಲಕ ಲಗ್ಗೆ ಇರಿಸಿದ್ದು, ಹೆಚ್ಚಿನ ಬಳಕೆದಾರರನ್ನು ಆಕರ್ಷಿಸುತ್ತಿದೆ.

ಏನಿದು ಕೂ?
ಬೆಂಗಳೂರಿನ ಅಪ್ರಮೇಯ ರಾಧಾಕೃಷ್ಣ ಎಂಬವರು ಅಭಿವೃದ್ಧಿಪಡಿಸಿರುವ ಕೂ ಆ್ಯಪ್ ಅನ್ನು ಸುಮಾರು 5 ಲಕ್ಷಕ್ಕೂ ಅಧಿಕ ಜನರು ಗೂಗಲ್ ಪ್ಲೇ ಸ್ಟೋರ್ ಮೂಲಕ ಡೌನ್‌ಲೋಡ್ ಮಾಡಿಕೊಂಡಿದ್ದಾರೆ. ಅಪ್ರಮೇಯ ಕೂ ಆ್ಯಪ್‌ನ ಕೋ ಫೌಂಡರ್ ಮತ್ತು ಸಿಇಒ ಕೂಡ ಆಗಿದ್ದು, ತಮ್ಮ ಹೊಸ ಆ್ಯಪ್ ಅನ್ನು ಜನರು ಇಷ್ಟಪಟ್ಟಿದ್ದಾರೆ. ಹೊಸರೂಪದಲ್ಲಿ ದೇಶದಲ್ಲೇ ತಯಾರಾದ ಆ್ಯಪ್ ಇದಾಗಿದ್ದು, ಸಂಪೂರ್ಣವಾಗಿ ದೇಸಿ ಪರಿಕಲ್ಪನೆಯದ್ದಾಗಿದೆ ಎಂದಿದ್ದಾರೆ. ಜತೆಗೆ ಮುಂಬಯಿಯಲ್ಲೇ ಸರ್ವರ್ ನಿರ್ವಹಣೆಯಿದ್ದು, ಗ್ರಾಹಕರ ಮಾಹಿತಿ ಸುರಕ್ಷಿತವಾಗಿದೆ ಎಂದು ಕೂ ಹೇಳಿದೆ.

ಕನ್ನಡ ಸಹಿತ ಪ್ರಾಂತೀಯ ಭಾಷೆಗಳಲ್ಲಿ ಲಭ್ಯ
ಕೂ ಆ್ಯಪ್ ಈಗ ಆಂಡ್ರಾಯ್ಡ್ ಫೋನ್‌ಗಳಲ್ಲಿ ಮಾತ್ರ ಲಭ್ಯವಿದ್ದು, ಶೀಘ್ರವೇ ಆ್ಯಪಲ್ ಆ್ಯಪ್ ಸ್ಟೋರ್‌ನಲ್ಲೂ ದೊರೆಯಲಿದೆ. ಟ್ವಿಟರ್‌ ಎನ್ನುವುದು ಮೈಕ್ರೋಬ್ಲಾಗಿಂಗ್ ಆಗಿದ್ದರೂ, ಇಂಗ್ಲಿಷ್‌ನಲ್ಲಿ ಲಭ್ಯವಿರುವುದರಿಂದ, ಜನಸಾಮಾನ್ಯರಿಗೆ ತಮ್ಮ ಯೋಚನೆ, ಹೊಸ ಚಿಂತನೆ, ಕವನ, ಕಥೆ ಮತ್ತು ಚುಟುಕುಗಳನ್ನು ಹಂಚಿಕೊಳ್ಳಲು ಆಗುತ್ತಿಲ್ಲ. ಹೀಗಾಗಿ ಅದನ್ನು ನಿವಾರಿಸಲು ಕನ್ನಡ ಸಹಿತ ದೇಶದ ಪ್ರಮುಖ ಪ್ರಾಂತೀಯ ಭಾಷೆಗಳಲ್ಲಿ ಕೂ ಆ್ಯಪ್ ಆರಂಭಿಸಲಾಯಿತು ಎಂದು ಅಪ್ರಮೇಯ ಹೇಳುತ್ತಾರೆ. ಪ್ರಸ್ತುತ ಕೂ ಕನ್ನಡ, ಹಿಂದಿ ಮತ್ತು ತಮಿಳಿನಲ್ಲಿ ಲಭ್ಯವಿದೆ.


ವಿವಿಧ ಆಯ್ಕೆಗಳಿವೆ ಕೂ ಆ್ಯಪ್‌ನಲ್ಲಿ..
ಕೂ ಆ್ಯಪ್‌ನಲ್ಲಿ ಬಳಕೆದಾರರು ಕನ್ನಡಲ್ಲಿಯೇ ವ್ಯವಹರಿಸುವಂತ ಆಯ್ಕೆಗಳನ್ನು ನೀಡಲಾಗಿದೆ. ಟ್ವಿಟರ್ ಮಾದರಿಯಲ್ಲಿಯೇ ಪೋಸ್ಟ್, ವೀಡಿಯೋ, ಪೋಟೋ ಕೂ ಆ್ಯಪ್‌ನಲ್ಲಿ ಬಳಕೆದಾರರು ಮಾಡಬಹುದಾಗಿದೆ.

TikTok Ban: ಒಂದಲ್ಲಾ, ಎರಡಲ್ಲಾ.. ಚೀನಾ ಕಂಪನಿಗೆ 45,000 ಕೋಟಿ ರೂ. ನಷ್ಟ!

ಇತ್ತೀಚೆಗಷ್ಟೇ ಅಭಿವೃದ್ಧಿಪಡಿಸಲಾಗಿರುವ ಕೂ ಆ್ಯಪ್ ಅನ್ನು ಕ್ರಿಕೆಟಿಗ ಜಾವಗಾಲ್ ಶ್ರೀನಾಥ್, ಅನಿಲ್‌ಕುಂಬ್ಳೆ, ಸ್ಯಾಂಡಲ್‌ವುಡ್ ನಟರು, ರಾಜಕೀಯ ಮುಖಂಡರು ಇನ್ಸ್ಟಾಲ್ ಮಾಡಿಕೊಂಡು ಬಳಕೆ ಮಾಡುತ್ತಿದ್ದಾರೆ. ಇವರನ್ನು ಅನೇಕ ಅವರ ಅಭಿಮಾನಿಗಳು ಫಾಲೋ ಕೂಡ ಮಾಡುತ್ತಿದ್ದಾರೆ. ಟ್ವಿಟರ್‌ಗಿಂತ ಭಿನ್ನ-ವಿಭಿನ್ನವಾಗಿರುವ ಕೂ ಆಪ್ ಟ್ವಿಟರ್‌ನಲ್ಲಿ ಕೇವಲ 2 ನಿಮಿಷಗಳ ವೀಡಿಯೋ ಅಪ್ಲೋಡ್ ಮಾಡಬಹುದಾದರೇ, ಕೂ ಆ್ಯಪ್ ಮೂಲಕ 10 ನಿಮಿಷದವರೆಗಿನ ವೀಡಿಯೋ ಅಪ್‌ಲೋಡ್ ಮಾಡಬಹುದಾಗಿದೆ.

ಕೂ ಆ್ಯಪ್ ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ಲಭ್ಯವಿದ್ದು, ನಿಮಗೂ ಕೂ ಮಾಡುವ ಆಸಕ್ತಿಯಿದ್ದರೆ ಡೌನ್‌ಲೋಡ್ ಮಾಡಿಕೊಂಡು ಬಳಸಬಹುದಾಗಿದೆ.

TikTok Ban: ಚೀನಾ ಆ್ಯಪ್ ನಿಷೇಧದ ಬಳಿಕ ಟಾಪ್ 10 ಪಟ್ಟಿಯಲ್ಲಿ ದೇಸಿ ಆ್ಯಪ್‌ಗಳು!