ನಿಮ್ಮ ಅನುಮತಿಯಿಲ್ಲದೆ ವಾಟ್ಸಪ್ ಗ್ರೂಪ್‌ಗೆ ನಿಮ್ಮನ್ನು ಸೇರಿಸುವಂತಿಲ್ಲ!

ಅತಿಹೆಚ್ಚಿನ ಬಳಕೆದಾರರನ್ನು ಹೊಂದಿರುವ ವಾಟ್ಸಪ್‌ ಬಳಕೆದಾರರಿಗೆ ವಿವಿಧ ರೀತಿಯ ಆಯ್ಕೆಗಳನ್ನು ಪ್ರತಿ ಬಾರಿ ಅಪ್‌ಡೇಟ್ ಮೂಲಕ ಒದಗಿಸುತ್ತದೆ.

ಆ್ಯಂಡ್ರಾಯ್ಡ್‌ ಮತ್ತು ಐಒಎಸ್ ಆವೃತ್ತಿಗಳಲ್ಲಿ ಈಗಾಗಲೇ ವಿವಿಧ ಅಪ್‌ಡೇಟ್‌ಗಳ ಮೂಲಕ ವಾಟ್ಸಪ್ ಹೊಸ ಹೊಸ ಸೌಲಭ್ಯಗಳನ್ನು ಬಳಕೆದಾರರಿಗೆ ನೀಡುತ್ತಾ ಬಂದಿದೆ. ವಾಟ್ಸಪ್ ಬಳಕೆದಾರರ ಪೈಕಿ ಬಹುತೇಕರು ದೂರುವುದು ವಾಟ್ಸಪ್ ಗ್ರೂಪ್‌ಗಳ ಬಗ್ಗೆ.

ವಾಟ್ಸಪ್‌ನ ಗ್ರೂಪ್‌ಗಳು ಜನರಿಗೆ ಅನುಕೂಲಕ್ಕಾಗಿ ಒದಗಿಸಿದ್ದಾದರೂ, ಅಲ್ಲಿ ಕೆಲವೊಂದು ಸಂದರ್ಭದಲ್ಲಿ ಬಳಕೆದಾರರು ಅನಗತ್ಯ ಕಿರಿಕಿರಿ ಅನುಭವಿಸುತ್ತಾರೆ. ಯಾರು ಬೇಕಾದರೂ ವಾಟ್ಸಪ್ ಗ್ರೂಪ್ ರಚಿಸಲು ಅವಕಾಶವಿದ್ದು, ಅದಕ್ಕೆ 256 ಜನರನ್ನು ಸೇರ್ಪಡೆ ಮಾಡಬಹುದು.


ಅಲ್ಲದೆ ಗ್ರೂಪ್‌ ರಚಿಸುವವರು ವಾಟ್ಸಪ್ ಖಾತೆ ಹೊಂದಿರುವವರನ್ನು ಬೇಕಾಬಿಟ್ಟಿಯಾಗಿ ಸೇರಿಸುತ್ತಾ ಹೋಗುತ್ತಾರೆ. ಗ್ರೂಪ್‌ಗೆ ಸೇರ್ಪಡೆಯಾಗುವುದು ನಿಮಗೆ ಇಷ್ಟವಿಲ್ಲದಿದ್ದರೂ, ನಿಮ್ಮ ಗೆಳೆಯರು ನಿಮ್ಮನ್ನು ಸೇರಿಸುತ್ತಾ ಹೋಗುವುದರಿಂದ ತಪ್ಪಿಸಲು ವಾಟ್ಸಪ್ ಹೊಸ ಆಯ್ಕೆ ಪರಿಚಯಿಸಲಿದೆ.

ಖಾತೆಯಲ್ಲಿ ಪ್ರೈವೆಸಿ ಅಡಿಯಲ್ಲಿ ಗ್ರೂಪ್ಸ್ ಆಯ್ಕೆ ದೊರೆಯಲಿದ್ದು, ಅದರಲ್ಲಿ ಯಾರು ನಿಮ್ಮನ್ನು ಗ್ರೂಪ್‌ಗೆ ಸೇರಿಸಬಹುದು ಎಂಬ ಆಯ್ಕೆಯಿದೆ.
ಅಲ್ಲಿ ಎಲ್ಲರೂ, ನಮ್ಮ ಕಾಂಟಾಕ್ಟ್‌ಗಳು ಹಾಗು ನೋಬಡಿ ಎಂಬ ಮೂರು ಆಯ್ಕೆಯಿದ್ದು, ಗ್ರೂಪ್ ಸೇರುವ ಕಿರಿಕಿರಿಯಿಂದ ಪಾರಾಗಬಹುದು.

ನೋಬಡಿ ಆಯ್ಕೆ ಮಾಡಿಕೊಂಡರೆ ಯಾರು ಕೂಡ ನಿಮ್ಮನ್ನು ಗ್ರೂಪ್‌ಗೆ ಸೇರಿಸಲು ಸಾಧ್ಯವಿಲ್ಲ. ಹೊಸದಾಗಿ ಗ್ರೂಪ್ ಸೇರಿಸಲು ನಿಮ್ಮ ಅನುಮತಿ ಬೇಕಾಗುತ್ತದೆ, ಜತೆಗೆ ಗ್ರೂಪ್ ಸೇರಲು ನಿಮಗೆ ಆಹ್ವಾನ ಬರುತ್ತದೆ, ಅದು 72 ದಿನ ಚಾಲ್ತಿಯಲ್ಲಿರುತ್ತದೆ. ಇದು ಪರಿಶೀಲನೆಯ ಹಂತದಲ್ಲಿದ್ದು, ಮುಂದೆ ಬಳಕೆದಾರರಿಗೆ ದೊರೆಯಲಿದೆ.