iPhone: ಮೂರು ಹೊಸ ಐಫೋನ್‌ಗಳ ಬಿಡುಗಡೆಗೆ ಕ್ಷಣಗಣನೆ

[This story originally published in Gadgets Now on sept 12, 2018]

ಕುಪರ್ಟಿನೋ: ವಿಭಿನ್ನ ಗ್ರಾಹಕ ವರ್ಗವನ್ನು ಹೊಂದಿರುವ ಆ್ಯಪಲ್‌, ತನ್ನ ಮೊಬೈಲ್‌ ಫೋನ್‌ಗಳಲ್ಲೂ ವಿಭಿನ್ನತೆಯನ್ನು ತರಲು ಮುಂದಾಗಿದೆ.

2018ರಲ್ಲಿ ಮೂರು ಹೊಸ ಐಫೋನ್‌ಗಳನ್ನು ಬಿಡುಗಡೆ ಮಾಡುವ ಬಗ್ಗೆ ಹಲವಾರು ವಿಚಾರಗಳು ಚರ್ಚೆಯಾಗುತ್ತಿದೆ. ಪ್ರಮುಖವಾಗಿ ಡ್ಯುವೆಲ್‌ ಸಿಮ್‌ಕಾರ್ಡ್‌ ಬಳಕೆ ಸಾಧ್ಯವಿದೆ ಎಂದು ಹೇಳಲಾಗುತ್ತಿದೆ.

ಇಂದು ಕ್ಯಾಲಿಫೋರ್ನಿಯಾದ ಕುಪರ್ಟಿನೋದಲ್ಲಿ ಐಫೋನ್‌ ಸೀರೀಸ್‌ನ ಮೂರು ಫೋನ್‌ಗಳನ್ನು ಅನಾವರಣಗೊಳಿಸಲಾಗುತ್ತಿದೆ.

ಐಫೋನ್‌ ಎಕ್ಸ್‌ಎಸ್‌, ಐಫೋನ್‌ ಎಕ್ಸ್‌ಎಸ್‌ ಮ್ಯಾಕ್ಸ್‌ ಹಾಗೂ ಐಫೋನ್‌ ಎಕ್ಸ್‌ ಆರ್‌ ಮೂರು ಫೋನ್‌ಗಳನ್ನು ಅನಾವರಣಗೊಳಿಸಲಿದೆ ಎನ್ನಲಾಗಿದೆ. ಇವುಗಳನ್ನು ಐಫೋನ್‌ ಎಕ್ಸ್‌ನ ಅಪ್‌ಡೇಟ್‌ ಮಾದರಿಗಳು ಎನ್ನಲಾಗುತ್ತಿದೆ. ಭಾರತೀಯ ಕಾಲಮಾನ ರಾತ್ರಿ 10.30ಕ್ಕೆ ಹೊಸ ಫೋನ್‌ಗಳನ್ನು ಆ್ಯಪಲ್‌ ಬಿಡುಗಡೆಗೊಳಿಸಲಿದೆ.


ಐಫೋನ್‌ ಎಕ್ಸ್‌ಎಸ್‌ನಲ್ಲಿ 5.8 ಇಂಚಿನ ಸ್ಕ್ರೀನ್‌ ಹಾಗೂ ಐಫೋನ್‌ ಎಕ್ಸ್‌ಗಿಂತ ಹೆಚ್ಚು ಸಾಮರ್ಥ್ಯದ ಪ್ರೊಸೆಸರ್ ಹಾಗೂ ಕ್ಯಾಮರಾಗಳು ಇರಲಿವೆ ಎಂದು ತಿಳಿದು ಬಂದಿದೆ. ಇದಕ್ಕೆ ಅಂದಾಜು 800-900 ಡಾಲರ್‌ಗಳಷ್ಟು ಮಾರುಕಟ್ಟೆ ಬೆಲೆ ನಿಗದಿಪಡಿಸಲಾಗಿದೆ (ಇಂದಿನ ರೂ. ಮೌಲ್ಯದಲ್ಲಿ 57,756- 64,975 ರೂ).

ಐಫೋನ್‌ ಎಕ್ಸ್‌ ಎಸ್‌ ಮ್ಯಾಕ್ಸ್‌ನಲ್ಲಿ ಸ್ಕ್ರೀನ್‌ ಅಳತೆ 6.5 ಇಂಚು ಇರಲಿದೆ. ಐಫೋನ್‌ನಲ್ಲಿ ಇದು ಅತ್ಯಂತ ದೊಡ್ಡ ಫೋನ್‌ ಎನ್ನಲಾಗುತ್ತಿದ್ದು, ಬೆಲೆಯೂ ಗರಿಷ್ಟ ಮೊತ್ತದಲ್ಲಿರುತ್ತದೆ ಎನ್ನಲಾಗಿದೆ. 900-1000 ಡಾಲರ್‌ (60 ರಿಂದ 70 ಸಾವಿರ ರೂ) ನಿಗದಿಪಡಿಸಲಾಗಿದೆ. ಇದಲ್ಲದೆ ಐಫೋನ್‌ ಎಕ್ಸ್‌ ಆರ್‌ಆರ್‌ ಕಡಿಮೆ ಬೆಲೆಯಲ್ಲಿ ದೊರೆಯಲಿದ್ದು, ವಿವಿಧ ಬಗೆಯ ಬಣ್ಣಗಳಲ್ಲಿ ಲಭ್ಯವಾಗಲಿದೆ. ಇದರ ಸ್ಕ್ರೀನ್‌ ಗಾತ್ರ 6.1 ಇಂಚಿರಲಿದೆ. 600-700 ಡಾಲರ್‌ (43 ರಿಂದ 50 ಸಾವಿರ ರೂ) ನಲ್ಲಿ ಇವುಗಳು ಮಾರುಕಟ್ಟೆಯಲ್ಲಿ ಲಭ್ಯವಾಗುವ ಸಾಧ್ಯತೆ ಇದೆ.

ಮೂರು ಫೋನ್‌ಗಳಲ್ಲಿ ಐಒಎಸ್‌12 ವರ್ಷನ್‌ ನೊಂದಿಗೆ ಮಾರುಕಟ್ಟೆಗೆ ಬರಲಿದೆ. ಪ್ರಮುಖ ಸುದ್ದಿ ಏನೆಂದರೆ, ಮೂರೂ ಹೊಸ ಫೋನ್‌ಗಳಿಗೆ ಎರಡು ಸಿಮ್‌ ಕಾರ್ಡ್‌ ಹಾಕಲು ಅವಕಾಶ ಇರಲಿದೆ.

ಭಾರತದ ಮಾರುಕಟ್ಟೆಗೂ ಸೆಪ್ಟೆಂಬರ್‌ ಮೂರನೇ ವಾರದಲ್ಲೇ ಹೊಸ ಐಫೋನ್‌ಗಳು ಲಗ್ಗೆ ಇಡಲಿವೆ ಎಂದು ತಿಳಿದು ಬಂದಿದೆ. ಆ್ಯಪಲ್‌ನಿಂದ ಆ್ಯಪಲ್‌ ವಾಚ್‌ಗಳೂ ಮೊಬೈಲ್‌ ಅನಾವರಣ ಕಾರ್ಯಕ್ರಮದಲ್ಲೇ ಬಿಡುಗಡೆಯಾಗಲಿದೆ. ಹೊಸ ವಿನ್ಯಾಸ ಹಾಗೂ ಹೊಸ ಬಗೆಯ ಸೌಲಭ್ಯಗಳು ಇರಲಿದೆ. ಇಷ್ಟು ಮಾತ್ರವಲ್ಲದೆ ಐಬುಕ್‌ ಏರ್‌ ಗೆ ರೆಟಿನಾ ಡಿಸ್‌ಪ್ಲೇ ತಂತ್ರಾಂಶವನ್ನೂ ಅಳವಡಿಸಲಾಗಿದ್ದು, ಇವುಗಳನ್ನೂ ಅನಾವರಣಗೊಳಿಸಲಾಗುವುದು ಎಂದು ಮಾಹಿತಿ ಬಂದಿದೆ.