ಮೊಬೈಲ್‌ ಬಳಕೆದಾರರ ಸಂಖ್ಯೆ 118 ಕೋಟಿಗೆ ಏರಿಕೆ

ಹೊಸದಿಲ್ಲಿ: ದೇಶದಲ್ಲಿ ಮೊಬೈಲ್‌ ಚಂದಾದಾರರ ಸಂಖ್ಯೆ ಕಳೆದ ಫೆಬ್ರವರಿಯ ವೇಳೆಗೆ 118.36 ಕೋಟಿಗೆ ಏರಿಕೆಯಾಗಿದೆ. ಫೆಬ್ರವರಿಯಲ್ಲಿ 118.19 ಕೋಟಿ ಚಂದಾದಾರರಿದ್ದರು.

ಖಾಸಗಿ ವಲಯದ ರಿಲಯನ್ಸ್‌ ಜಿಯೊ ಹಾಗೂ ಸಾರ್ವಜನಿಕ ವಲಯದ ಬಿಎಸ್ಸೆನ್ನೆಲ್‌ ಎರಡೂ ಕಂಪನಿಗಳು ಫೆಬ್ರವರಿಯಲ್ಲಿ 86.39 ಲಕ್ಷ ಮೊಬೈಲ್‌ ಚಂದಾದಾರರನ್ನು ಸೇರಿಸಿದ್ದವು. ಇತರ ಟೆಲಿಕಾಂ ಕಂಪನಿಗಳು ಒಟ್ಟು 69.93 ಲಕ್ಷ ಗ್ರಾಹಕರನ್ನು ಕಳೆದುಕೊಂಡಿವೆ.

ಭಾರತದಲ್ಲಿ ಒಟ್ಟು ಟೆಲಿಕಾಂ ಚಂದಾದಾರರ ಸಂಖ್ಯೆಯು ಫೆಬ್ರವರಿ ಅಂತ್ಯದ ವೇಳೆಗೆ 120.54 ಕೋಟಿಗೆ ವೃದ್ಧಿಸಿದೆ ಎಂದು ಟ್ರಾಯ್‌ ವರದಿ ತಿಳಿಸಿದೆ.

ರಿಲಯನ್ಸ್‌ ಜಿಯೊ ಒಂದೇ ಫೆಬ್ರವರಿಯಲ್ಲಿ 77.93 ಲಕ್ಷ ಗ್ರಾಹಕರನ್ನು ಸೇರಿಸಿದೆ. ಜಿಯೊ 30 ಕೋಟಿ ಗ್ರಾಹಕರ ನೆಲೆಯನ್ನು ಹೊಂದಿದೆ. ಬಿಎಸ್ಸೆನ್ನೆಲ್‌ 9 ಲಕ್ಷ ಹೊಸ ಮೊಬೈಲ್‌ ಗ್ರಾಹಕರನ್ನು ಸೇರಿಸಿದೆ. ಅದರ ಒಟ್ಟು ಗ್ರಾಹಕರ ಸಂಖ್ಯೆ 11.62 ಲಕ್ಷ. ವೊಡಾಫೋನ್‌ ಫೆಬ್ರವರಿಯಲ್ಲಿ 57 ಲಕ್ಷ ಮೊಬೈಲ್‌ ಗ್ರಾಹಕರನ್ನು ಕಳೆದುಕೊಂಡಿದೆ.