ಯಾಹೂ ಮೆಸೆಂಜರ್ ಸೇವೆ ಸ್ಥಗಿತ

ಹೊಸದಿಲ್ಲಿ: ಒಂದು ಕಾಲದಲ್ಲಿ ಇಂಟರ್‌ನೆಟ್‌ ಪ್ರಿಯರ ನೆಚ್ಚಿನ ಚಾಟ್‌ ಟೂಲ್ ಆಗಿದ್ದ ಯಾಹೂ ಮೆಸೆಂಜರ್ ಮಂಗಳವಾರ ತನ್ನ ಸೇವೆಯನ್ನು ಸ್ಥಗಿತಗೊಳಿಸಿದೆ. ಟೆಲಿಕಾಂ ಕಂಪನಿ ವೆರಿಝೋನ್ ಒಡೆತನದ ಓತ್‌ ಅಡಿ ಕಾರ್ಯನಿರ್ವಹಿಸುತ್ತಿದ್ದ ಯಾಹೂ ಮೆಸೆಂಜರ್ ಸೇವೆಯನ್ನು ಸ್ಥಗಿತಗೊಳಿಸುವುದಾಗಿ ಹೇಳಿದ್ದು, ಬಳಕೆದಾರರು ಚಾಟ್‌ ಹಿಸ್ಟರಿಯನ್ನು ಡೌನ್‌ಲೋಡ್ ಮಾಡಿಕೊಳ್ಳಲು ಆರು ತಿಂಗಳ ಕಾಲಾವಕಾಶ ನೀಡಲಾಗಿತ್ತು.

ಯಾಹೂ ಮೆಸೆಂಜರ್ ಸೇವೆ ಸ್ಥಗಿತಗೊಳಿಸುತ್ತಿರುವ ಹಿನ್ನೆಲೆಯಲ್ಲಿ ಸಂಸ್ಥೆ ಸ್ವ್ಕಿರೆಲ್ ಎಂಬ ಗ್ರೂಪ್ ಮೆಸೇಜಿಂಗ್ ಆ್ಯಪ್ ಅನ್ನು ಸಿದ್ಧಗೊಳಿಸುತ್ತಿದೆ. ವಾಟ್ಸಾಪ್, ಇನ್ಸ್ಟಾಗ್ರಾಂ ಆಗಮನದ ಹಿನ್ನೆಲೆಯಲ್ಲಿ ಯಾಹೂ ಮೆಸೆಂಜರ್ ಬಳಕೆದಾರರ ಸಂಖ್ಯೆಯಲ್ಲಿ ಗಣನೀಯ ಪ್ರಮಾಣದ ಇಳಿಕೆಯಾಗಿತ್ತು.

1998ರ ಮಾರ್ಚ್‌ 9ರಂದು ಯಾಹೂ ಪೇಜರ್ ಹೆಸರಿನಲ್ಲಿ ಸೇವೆ ಆರಂಭಿಸಿದ್ದ ಯಾಹೂ, 1999ರಲ್ಲಿ ಯಾಹೂ ಮೆಸೆಂಜರ್ ಎಂದು ಮರುನಾಮಕರಣಗೊಂಡಿತ್ತು. 2009ರಲ್ಲಿ ಯಾಹೂ ಮೆಸೆಂಜರ್ 12.26 ಕೋಟಿ ಬಳಕೆದಾರರನ್ನು ಹೊಂದಿತ್ತು. ಯಾಹೂ ಮೆಸೆಂಜರ್ ಸೇವೆ ಸ್ಥಗಿತಗೊಳಿಸುತ್ತಿರುವ ಹಿನ್ನೆಲೆಯಲ್ಲಿ ಟ್ವಿಟರ್ ತುಂಬಾ ಮೆಸೆಂಜರ್‌ಗೆ ವಿದಾಯದ ಸಂದೇಶಗಳು ಹರಿದಾಡಿದವು.