Facebook: 60 ಕೋಟಿ ಫೇಸ್‌ಬುಕ್‌ ಪಾಸ್‌ವರ್ಡ್‌ ಸಂಗ್ರಹ

ನ್ಯೂಯಾರ್ಕ್‌: ಸಾಮಾಜಿಕ ಜಾಲತಾಣ ದಿಗ್ಗಜ ಫೇಸ್‌ಬುಕ್‌ ಕಂಪನಿಯಲ್ಲಿ 20,000ಕ್ಕೂ ಹೆಚ್ಚು ಉದ್ಯೋಗಿಗಳು 60 ಕೋಟಿಗೂ ಅಧಿಕ ಬಳಕೆದಾರರ ಯೂಸರ್‌ ಪಾಸ್‌ವರ್ಡ್‌ಗಳ ಸಂಗ್ರಹವನ್ನು ಹೊಂದಿದ್ದಾರೆ ಎಂದು ಕಂಪನಿಯ ಹಿರಿಯ ಉದ್ಯೋಗಿಯೊಬ್ಬರು ಬಹಿರಂಗಪಡಿಸಿದ್ದಾರೆ. ಆದರೆ ಕಂಪನಿಯಿಂದ ಹೊರಗೆ ಯಾವುದೇ ಪಾಸ್‌ವರ್ಡ್‌ ಸೋರಿಕೆಯಾಗಿಲ್ಲ ಎಂದು ಫೇಸ್‌ಬುಕ್‌ ತಿಳಿಸಿದೆ.

ಫೇಸ್‌ಬುಕ್‌ನ ಉದ್ಯೋಗಿಗಳಿಗೆ ಕೋಟ್ಯಂತರ ಬಳಕೆದಾರರ ಪಾಸ್‌ವರ್ಡ್‌ಗಳನ್ನು ಬಳಸುವ ಅವಕಾಶ ಇತ್ತು. ಕೋಟ್ಯಂತರ ಪಾಸ್‌ ವರ್ಡ್‌ಗಳನ್ನು ಸುಲಭವಾಗಿ ಓದಲು ಸಾಧ್ಯವಾಗುವಂತೆ ಟೆಕ್ಸ್ಟ್‌ ಸ್ವರೂಪದಲ್ಲಿ ಸರ್ವರ್‌ನಲ್ಲಿ ಸಂಗ್ರಹಿಸಿಡಲಾಗಿತ್ತು ಎಂದು ಹೆಸರು ಹೇಳಲು ಬಯಸದ ಉದ್ಯೋಗಿಯೊಬ್ಬರು ಹೇಳಿದ್ದಾರೆ. ಇದರೊಂದಿಗೆ ಫೇಸ್‌ಬುಕ್‌ ಮತ್ತೊಂದು ವಿವಾದಕ್ಕೀಡಾಗಿದೆ.

ಡಿಜಿಟಲ್‌ ತಂತ್ರಜ್ಞಾನ ವಲಯದಲ್ಲಿ ಪಾಸ್‌ವರ್ಡ್‌ಗಳನ್ನು ಎನ್‌ಕ್ರಿಪ್ಟೆಡ್‌ ಸ್ವರೂಪದಲ್ಲಿ ಇಡುವುದು ಪದ್ಧತಿ ಹಾಗೂ ಅದು ಸುರಕ್ಷಿತ ವಿಧಾನ. ಆದರೆ ಫೇಸ್‌ಬುಕ್‌ನಲ್ಲಿ ಪ್ಲೇನ್‌ ಟೆಕ್ಸ್ಟ್‌ ರೂಪದಲ್ಲಿ ಇಡಲಾಗಿತ್ತು. ಇದನ್ನು ಓದುವುದು ಸುಲಭ. ಅಂದರೆ ಯಾರು ಬೇಕಾದರೂ ಸುಲಭವಾಗಿ ಈ ಯೂಸರ್‌ ಪಾಸ್‌ವರ್ಡ್‌ ಬಳಸಿಕೊಳ್ಳಬಹುದು.

ಇದರಿಂದಾಗಿ ಎಷ್ಟು ಬಳಕೆದಾರರಿಗೆ ಸಮಸ್ಯೆಯಾಗಲಿದೆ ಎಂಬುದನ್ನು ಫೇಸ್‌ಬುಕ್‌ ತಿಳಿಸಿಲ್ಲ. ಆದರೆ ಬಾಧಿತ ಬಳಕೆದಾರರಿಗೆ ತಿಳಿಸುವ ಪ್ಲಾನ್‌ ಮಾಡುವುದಾಗಿ ಫೇಸ್‌ಬುಕ್‌ ತಿಳಿಸಿದೆ. ಇದರಿಂದ ಅಂಥ ಬಳಕೆದಾರರು ಪಾಸ್‌ ವರ್ಡ್‌ ಬದಲಿಸಬಹುದು ಎಂದಿದೆ. 2019ರ ಜನವರಿಯಲ್ಲಿಯೇ ಈ ಸಂಬಂಧ ಪರಿಶೀಲಿಸಲಾಗಿದೆ. ಆದರೆ ಇದರಿಂದ ಯಾವುದೇ ಬಳಕೆದಾರರಿಗೆ ತೊಂದರೆಯಾಗಿರುವ ಉದಾಹರಣೆ ಇಲ್ಲ ಎಂದು ಫೇಸ್‌ಬುಕ್‌ ಹೇಳಿದೆ.