ನಾವೆಲ್ಲ ನಮ್ಮ ಸ್ಮಾರ್ಟ್‌ಪೋನ್‌ಗಳಲ್ಲಿ ಒಂದಲ್ಲ ಒಂದು ಬಗೆಯ ಲಾಕಿಂಗ್‌, ಅನ್‌ಲಾಕಿಂಗ್‌ ವ್ಯವಸ್ಥೆ ಮಾಡಿಕೊಂಡಿರುತ್ತೇವೆ. ಅದರಲ್ಲೂ ಹೆಚ್ಚಿನವರು, ಪಾಸ್‌ವರ್ಡ್‌ಗಳನ್ನು ನೆನಪಿಡುವ ತಲೆನೋವೇ ಬೇಡವೆಂದು, ನಾಲ್ಕಾರು ಚುಕ್ಕೆಗಳನ್ನು ಅತ್ತಿಂದಿತ್ತ ಜೋಡಿಸುವ ಗೆರೆ ಅಥವಾ ಪ್ಯಾಟರ್ನ್‌ ಅನ್ನು ರೂಪಿಸಿಕೊಂಡಿರುತ್ತೇವೆ. ಇದನ್ನು ನೆನಪಿಟ್ಟುಕೊಳ್ಳಲು ಸುಲಭ ಎಂಬುದು ನಮ್ಮ ತರ್ಕ. ಆದರೆ ಇದು ಅಪಾಯಕಾರಿ. ಯಾಕೆಂದರೆ, ಇದು ನಿಮಗೆ ಹೇಗೆ ಬಿಡಿಸಲು ಸುಲಭವೋ, ಕಳ್ಳರಿಗೂ ಸುಲಭ.
ಇದು ಈಗ ಮೆರಿಲ್ಯಾಂಡ್‌ ಯೂನಿವರ್ಸಿಟಿಯಲ್ಲಿ ನಡೆಸಿದ ಅಧ್ಯಯನದಿಂದಲೂ ರುಜುವಾತಾಗಿದೆ. ಒಂದೆರಡು ಮೀಟರ್‌ ದೂರದಿಂದ ನಿಮ್ಮ ಪ್ಯಾಟರ್ನ್‌ ಬಳಕೆಯನ್ನು ಗಮನಿಸುವ ಚಾಲಾಕಿಗಳು ಸುಲಭವಾಗಿ ಅದನ್ನು ಟ್ರೇಸ್‌ ಮಾಡಬಲ್ಲರು. ಪಕ್ಕದಲ್ಲಿದ್ದಾತ ಪ್ಯಾಟರ್ನ್‌ ಬಿಡಿಸುವುದನ್ನು ಒಮ್ಮೆ ಮಾತ್ರ ನೋಡುವ ಮೂರನೇ ಒಂದರಷ್ಟು ವ್ಯಕ್ತಿಗಳು ಅದನ್ನು ತಾವೂ ಬಿಡಿಸಬಲ್ಲರಂತೆ. ಆದರೆ ಪಾಸ್‌ವರ್ಡ್‌ಗಳನ್ನು ನೆನಪಿಟ್ಟುಕೊಳ್ಳುವುದು, ನಕಲಿಸುವುದು ಇಷ್ಟು ಸುಲಭವಲ್ಲ.
ಪ್ಯಾಟರ್ನ್‌ಗಳಲ್ಲಿ ನಾವು ಸಾಮಾನ್ಯವಾಗಿ ಏನು ಮಾಡುತ್ತೇವೆಂದರೆ, ಯಾವುದಾದರೊಂದು ಇಂಗ್ಲಿಷ್‌ ಅಕ್ಷರವನ್ನು ರೂಪಿಸಿಕೊಂಡಿರುತ್ತೇವೆ; ಎಡ ಮೇಲ್ಬದಿಯಿಂದಲೇ ಶುರು ಮಾಡುತ್ತೇವೆ; ನಾಲ್ಕಾರು ಬಗೆಯದ್ದನ್ನೇ ಸಾಮಾನ್ಯವಾಗಿ ಎಲ್ಲರೂ ಮಾಡುತ್ತಾರೆ. ಹೀಗಾಗಿ ಇದು ಊಹಿಸಲು ಸಾಧ್ಯ, ಹಾಗಾಗಿ ಅಪಾಯಕಾರಿಯಂತೆ.