ನೋವಿದೆ ಎಂದು ವೈದ್ಯರ ಬಳಿ ಸುಳ್ಳು ಹೇಳುವಂತಿಲ್ಲ!

ಕೆಲವರಿಗೆ ವೈದ್ಯರ ಬಳಿ ಹೋದಾಗ ವಿಪರೀತ ನೋವಿದೆ ಎಂದು ಹೇಳಿಕೊಳ್ಳುವ ಅಭ್ಯಾಸವಿರುತ್ತದೆ. ಮತ್ತೆ ಕೆಲವರಿಗೆ ಇಂಜೆಕ್ಷನ್ ಭಯದಿಂದ ನೋವಿಲ್ಲದಿದ್ದರೂ, ವೈದ್ಯರಿಗೆ ಗೊತ್ತಾಗುವುದಿಲ್ಲ ಎಂದು ನೋವಿರುವಂತೆ ನಟಿಸಿ ನಾಟಕ ಮಾಡುವ ಕ್ರಮವಿರುತ್ತದೆ.

ಆದರೆ ಇನ್ನುಮುಂದೆ ವೈದ್ಯರ ಬಳಿ ಹೋಗಿ ಹಾಗೆಲ್ಲ ಹೇಳುವಂತಿಲ್ಲ. ಅಮೆರಿಕದ ಇಂಡಿಯಾನ ಯೂನಿವರ್ಸಿಟಿ ಸ್ಕೂಲ್ ಆಫ್ ಮೆಡಿಸಿನ್‌ನ ತಜ್ಞರು ವ್ಯಕ್ತಿಯೋರ್ವ ಎಷ್ಟು ನೋವು ಅನುಭವಿಸುತ್ತಿದ್ದಾನೆ ಎಂದು ನಿಖರವಾಗಿ ಪತ್ತೆಹಚ್ಚುತ್ತಾರೆ.

ರೋಗಿಯ ರಕ್ತದ ಬಯೋಮಾರ್ಕರ್‌ ಮೂಲಕ ನೋವು ಹೇಗೆ ವ್ಯಕ್ತಿಯ ಮೇಲೆ ಪ್ರಭಾವ ಬೀರುತ್ತದೆ ಎನ್ನುವುದನ್ನು ಪತ್ತೆಹಚ್ಚಲಾಗುತ್ತದೆ. ಜತೆಗೆ ರೋಗಿಗೆ ನೋವು ಬಾಧಿಸುವ ಸಾಧ್ಯತೆಯಿದೆಯೇ ಮತ್ತು ನೋವಿನ ಪ್ರಮಾಣಕ್ಕೆ ಅನುಗುಣವಾಗಿ ಔಷಧ ಎಷ್ಟು ಬೇಕಾಗುತ್ತದೆ ಎನ್ನವುದನ್ನು ಅವರು ನಿರ್ಧರಿಸುತ್ತಾರೆ.

ಜತೆಗೆ ಚಿಕಿತ್ಸೆಗೆ ಸ್ಪಂದನೆ ಮತ್ತು ನೋವು ಯಾವಾಗ ಕಡಿಮೆಯಾಗಬಹುದು ಎನ್ನುವುದನ್ನು ಕೂಡ ಅವರು ಲೆಕ್ಕಹಾಕಲು ಸಾಧ್ಯವಾಗುತ್ತದೆ.

ಈ ರೀತಿ ನೋವನ್ನು ನಿಖರವಾಗಿ ಪತ್ತೆಹಚ್ಚುವುದರಿಂದ, ಅನಗತ್ಯವಾಗಿ ನೋವು ನಿವಾರಕ ಗುಳಿಗೆ ಮತ್ತು ಇಂಜೆಕ್ಷನ್ ನೀಡಬೇಕಾಗಿಲ್ಲ ಎನ್ನುವುದು ವೈದ್ಯರ ವಾದವಾಗಿದೆ. ಜತೆಗೆ ಜನರು ಕೂಡ ನೋವಿದೆ ಎಂದು ಹೇಳಿ ಅನಾವಶ್ಯಕವಾಗಿ ಮಾತ್ರೆ ತೆಗೆದುಕೊಳ್ಳುವುದನ್ನ ಇದು ತಪ್ಪಿಸಲಿದೆ ಎಂದಿದ್ದಾರೆ.