ಸಾಮಾಜಿಕ ಮಾಧ್ಯಮಗಳಲ್ಲಿ ಫೋನ್‌ಪೇ ಮೇಲೆ ಆಕ್ರೋಶ: ಪ್ರೊಸೆಸಿಂಗ್ ಶುಲ್ಕ ವಾಪಸ್?

ಫೋನ್‌ಪೇ ಮೂಲಕ ಮೊಬೈಲ್ ರೀಚಾರ್ಜ್‌ಗಳ ಮೇಲೆ ವಿಧಿಸಲಾಗುತ್ತಿರುವ ಪ್ರೊಸೆಸಿಂಗ್ ಶುಲ್ಕವು ಒಂದು ಪ್ರಯೋಗವಾಗಿದೆ ಮತ್ತು ವಾಣಿಜ್ಯ ರೋಲ್‌ಔಟ್ ಅಲ್ಲ ಎಂದು ಫೋನ್‌ಪೇ ಅಧಿಕೃತವಾಗಿ ಹೇಳಿದೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಫೋನ್‌ಪೇ ಬಳಕೆದಾರರು ಈ ಬಗ್ಗೆ ಆಕ್ರೋಶವನ್ನು ವ್ಯಕ್ತಪಡಿಸಿದ ನಂತರ, 'ಇದು ಒಂದು ಪ್ರಯೋಗವಾಗಿದೆ ಮತ್ತು ವಾಣಿಜ್ಯ ರೋಲ್‌ಔಟ್ ಅಲ್ಲ' ಎಂದು ಫೋನ್‌ಪೇ ತಿಳಿಸಿದೆ. ಹಾಗಾಗಿ, ಗ್ರಾಹಕರ ಪ್ರತಿಕ್ರಿಯೆಯನ್ನು ಅವಲಂಬಿಸಿ ಹೆಚ್ಚುವರಿ ಶುಲ್ಕ ವಿಧಿಸುವುದನ್ನು ಫೋನ್‌ಪೇ ಹಿಂದಕ್ಕೆ ತೆಗೆದುಕೊಳ್ಳಬಹುದು ಎಂದು ಕೆಲವು ಮಾಧ್ಯಮಗಳು ವರದಿ ಮಾಡಿವೆ.

ಹೌದು, ಮೊಬೈಲ್ ರೀಚಾರ್ಜ್‌ನ ಮೇಲೆ ಪ್ರೊಸೆಸಿಂಗ್ ಶುಲ್ಕವನ್ನು ಆರಂಭಿಸಿರುವ ಫೋನ್‌ಪೇ ಎರಡು ದಿನಗಳ ಹಿಂದಷ್ಟೇ ಮೊಬೈಲ್ ರೀಚಾರ್ಜ್‌ಗಳ ಮೇಲೆ ಶುಲ್ಕ ವಿಧಿಸುವುದಾಗಿ ತಿಳಿಸಿತ್ತು. ಡಿಜಿಟಲ್ ಪಾವತಿಗಳ ನಾಯಕನಾಗಿ ಬೆಳೆದುನಿಂತ ನಂತರ, ತನ್ನ PhonePe ಅಪ್ಲಿಕೇಷನ್‌ನಲ್ಲಿ 50 ರೂ.ಗಿಂತ ಹೆಚ್ಚಿನ ಫೋನ್ ರೀಚಾರ್ಜ್‌ಗಳ ಮೇಲೆ 1 ರಿಂದ 2 ರೂಗಳ ಪ್ರೊಸೆಸಿಂಗ್ ಶುಲ್ಕವನ್ನು ವಿಧಿಸಲು ಆರಂಭಿಸಿತ್ತು. ಕಡಿಮೆ ಸಂಖ್ಯೆಯ ಬಳಕೆದಾರರೊಂದಿಗೆ ಇದನ್ನು ಪ್ರಾಯೋಗಿಕ ಆಧಾರದ ಮೇಲೆ ಮಾಡಲಾಗುತ್ತಿದೆ ಎಂದು ಕಂಪನಿಯ ವಕ್ತಾರರು ತಿಳಿಸಿ, 51 ರಿಂದ 100 ರೂ.ವರೆಗಿನ ರೀಚಾರ್ಜ್‌ಗಳಿಗೆ 1 ರೂ. ಶುಲ್ಕ ಮತ್ತು 100 ರೂ.ಗಿಂತ ಹೆಚ್ಚಿನದಕ್ಕೆ 2 ರೂ.ಶುಲ್ಕವನ್ನು ವಿಧಿಸುವುದಾಗಿ ಹೇಳಿದ್ದರು.

ಅದರಂತೆ, PhonePe ಪ್ಲಾಟ್‌ಫಾರ್ಮ್‌ನಲ್ಲಿ ಮೊಬೈಲ್‌ ರೀಚಾರ್ಜ್ ಮಾಡಿಸಿದರೆ ಶುಲ್ಕ ವಿಧಿಸಲಾಗುತ್ತಿತ್ತು. ಇಷ್ಟು ದಿನ ಮೊಬೈಲ್‌ ರೀಚಾರ್ಜ್‌ ಮೊತ್ತ ಮಾತ್ರ ಭರಿಸುತ್ತಿದ್ದ ಮಂದಿ ಇನ್ಮುಂದೆ ರೀಚಾರ್ಜ್‌ ಶುಲ್ಕವನ್ನು ಕೂಡ ಭರಿಸಬೇಕಾಗುತ್ತದೆ ಎನ್ನಲಾಗಿತ್ತು. 'ಮೊಬೈಲ್‌ ರೀಚಾರ್ಜ್‌ ಮಾಡುವವರಿಗೆ ಮಾತ್ರ ಈ ನಿಯಮ ಅನ್ವಯವಾಗಲಿದ್ದು, ಇದನ್ನು ಪ್ರಾಯೋಗಿಕವಾಗಿ ಜಾರಿಗೊಳಿಸಿರುವುದರಿಂದ ಸದ್ಯ ಎಲ್ಲಾ ಫೋನ್‌ಪೇ ಬಳಕೆದಾರರಿಗೆ ಅನ್ವಯಿಸುವುದಿಲ್ಲ. ಆದರೆ ಸಂಸ್ಕರಣಾ ಶುಲ್ಕವು ಸದ್ಯಕ್ಕೆ ಮೊಬೈಲ್ ರೀಚಾರ್ಜ್‌ಗಳಿಗೆ ಮಾತ್ರ ಅನ್ವಯಿಸುತ್ತದೆ' ಇನ್ನು ಈ ಶುಲ್ಕ 50ರೂ. ಗಿಂತ ಹೆಚ್ಚಿನ ರೀಚಾರ್ಜ್‌ಗಳಿಗೆ ಮಾತ್ರ ಅನ್ವಯಿಸುತ್ತದೆ ಎಂದು ಕಂಪೆನಿ ಹೇಳಿಕೊಂಡಿತ್ತು.

ಈ ಮೊದಲು ಫೋನ್‌ಪೇ ಹೇಳಿದಂತೆ, ನಾವು ನಮ್ಮ ಪ್ಲಾಟ್‌ಫಾರ್ಮ್‌ನಲ್ಲಿ ಒಂದು ಪ್ರಯೋಗವನ್ನು ನಡೆಸುತ್ತಿದ್ದೇವೆ. ಅಲ್ಲಿ ಕೆಲವು ಬಳಕೆದಾರರು ರೀಚಾರ್ಜ್‌ಗಳಿಗಾಗಿ ಪಾವತಿಸುತ್ತಿದ್ದಾರೆ. ನಾವು ನಡೆಸುತ್ತಿರುವ ಪ್ರಯೋಗದ ಒಂದು ಭಾಗವಾಗಿ ಹೆಚ್ಚಿನ ರೀಚಾರ್ಜ್‌ಗಳಿಗೆ ಯಾವುದೇ ಶುಲ್ಕವನ್ನು ವಿಧಿಸಲಾಗುತ್ತಿಲ್ಲ ಅಥವಾ ರೂ 1 ಪಾವತಿಸಲಾಗುತ್ತಿದೆ. ಆದಾಗ್ಯೂ, PhonePe ನಲ್ಲಿನ ಇತರ ವಹಿವಾಟುಗಳು ಮತ್ತು ಹಣ ವರ್ಗಾವಣೆಗಳು ಉಚಿತವಾಗಿ ಉಳಿಯುತ್ತವೆ ಎಂದು ಫೋನ್ ಪೇ ವಕ್ತಾರರು ತಿಳಿಸಿದ್ದಾರೆ. ಹಾಗಾಗಿ, ಇನ್ಮುಂದೆ 50ರೂ ಬೆಲೆಯ ರೀಚಾರ್ಜ್‌ಗಳಿಗೆ 1ರೂ.ಶುಲ್ಕವನ್ನು ವಿಧಿಸಲಾಗುತ್ತದೆ. 100ರೂ. ಮೇಲಿನ ಎಲ್ಲಾ ಮೊಬೈಲ್ ರೀಚಾರ್ಜ್‌ಗಳು 2ರೂ.ಬೆಲೆಯ ಶುಲ್ಕವನ್ನು ವಿಧಿಸಲಾಗುತ್ತದೆ ಎಂದು ಹೇಳಿತ್ತು.
ಇನ್ಮುಂದೆ ನಿಮ್ಮ ಮೊಬೈಲ್ ಮೂಲಕವೇ ನಿಮ್ಮ ಜಮೀನು ಸರ್ವೆ ಮಾಡಬಹುದು!
ವಾಲ್‌ಮಾರ್ಟ್-ಮಾಲೀಕತ್ವದ ಫೋನ್ ಪೇ ಕಂಪನಿಯು ಮಾಸಿಕ ಏಕೀಕೃತ ಪಾವತಿ ಇಂಟರ್ಫೇಸ್ (UPI) ಹಾಗೂ ಭಾರತ್ ಬಿಲ್‌ಪೇ ಸೇವೆಗಳ (BBPS) ವಹಿವಾಟುಗಳಲ್ಲಿ ಅತ್ಯಧಿಕ ಮಾರುಕಟ್ಟೆ ಪಾಲನ್ನು ಹೊಂದಿದೆ. ಭಾರತದ ಜನಪ್ರಿಯ ಡಿಜಿಟಲ್ ನಗದು ಪಾವತಿ ಅಪ್ಲಿಕೇಶನ್‌ ಆಗಿ, UPI ಮಾಸಿಕ ಸಂಪುಟಗಳಲ್ಲಿ 45 ಪ್ರತಿಶತ ಮತ್ತು ವಹಿವಾಟಿನ ಮಾಸಿಕ ಮೌಲ್ಯದ 47 ಪ್ರತಿಶತ ಪಾಲನ್ನು ಹೊಂದಿದೆ. ಆಗಸ್ಟ್‌ನಲ್ಲಿ BBPS ನಲ್ಲಿ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ಹಂಚಿಕೊಂಡ ಇತ್ತೀಚಿನ ಡೇಟಾವು PhonePe 49 ಪ್ರತಿಶತದಷ್ಟು ವಾಲ್ಯೂಮ್ ಷೇರ್‌ನೊಂದಿಗೆ ಮಾರುಕಟ್ಟೆಯನ್ನು ಮುನ್ನಡೆಸುತ್ತಿದೆ ಎಂದು ತೋರಿಸಿದೆ.