Samsung Foldable Smartphone: ಸ್ಯಾಮ್‌ಸಂಗ್ ಮಡಚುವ ಫೋನ್ ಶೀಘ್ರದಲ್ಲಿ

ಹೊಸದಿಲ್ಲಿ: ಮಡಚಬಲ್ಲ ಸ್ಮಾರ್ಟ್‌ಫೋನ್‌ಗಳ ಬಗ್ಗೆ ಜನರಿಗೆ ಕುತೂಹಲವಿದ್ದು, ಫೋಲ್ಡೇಬಲ್ ಫೋನ್‌ ಕುರಿತು ಚರ್ಚೆ ನಡೆಯುತ್ತಿರುವಂತೆಯೇ ಕೊರಿಯನ್ ಸ್ಮಾರ್ಟ್‌ಫೋನ್‌ ದೈತ್ಯ ಸ್ಯಾಮ್‌ಸಂಗ್ ಶೀಘ್ರದಲ್ಲೇ ಫೋಲ್ಡೇಬಲ್ ಸ್ಮಾರ್ಟ್‌ಫೋನ್‌ ಮಾರುಕಟ್ಟೆಗೆ ಪರಿಚಯಿಸುವುದಾಗಿ ಘೋಷಿಸಿದೆ.

ಅದರ ಜತೆಗೇ ಗೂಗಲ್ ಕೂಡ ತನ್ನ ನೂತನ ಆ್ಯಂಡ್ರಾಯ್ಡ್ ಆಪರೇಟಿಂಗ್ ವ್ಯವಸ್ಥೆ ಫೋಲ್ಡೇಬಲ್ ಸ್ಮಾರ್ಟ್‌ಫೋನ್‌ಗಳಿಗೆ ಸೂಕ್ತ ಬೆಂಬಲ ವ್ಯಕ್ತಪಡಿಸುತ್ತದೆ ಎಂದಿದೆ.

ಹೊಸ ಮಡಚಬಲ್ಲ ಸ್ಮಾರ್ಟ್‌ಫೋನ್‌ಗೆ ಸ್ಯಾಮ್‌ಸಂಗ್ ಇನ್ನೂ ಹೆಸರು ಮತ್ತು ವಿನ್ಯಾಸ ಅಂತಿಮಗೊಳಿಸಿಲ್ಲ. ಆದರೆ ಅದು ಇನ್ಫಿನಿಟಿ ಫ್ಲೆಕ್ಸ್ ಡಿಸ್ಲ್ಪೇ ಹೊಂದಿರುತ್ತದೆ ಎಂದಿದೆ.

ಬುಧವಾರ ನಡೆದ ಸ್ಯಾಮ್‌ಸಂಗ್ ಡೆವಲಪರ್ ಕಾನ್ಫರೆನ್ಸ್‌ನಲ್ಲಿ ಸ್ಯಾಮ್‌ಸಂಗ್ ತನ್ನ ನೂತನ ಫೋಲ್ಡೇಬಲ್ ಸ್ಮಾರ್ಟ್‌ಫೋನ್ ಅನ್ನು ಘೋಷಿಸಿದೆ.

ಕಂಪನಿಯ ಮೊಬೈಲ್‌ ಹೆಡ್ ಡಿಜೆ ಕೊಹ್, ಕಳೆದ ಹಲವು ವರ್ಷಗಳಿಂದ ಮಡಚಬಲ್ಲ ಸ್ಮಾರ್ಟ್‌ಫೋನ್‌ಗಳ ಮಾರುಕಟ್ಟೆ ಪ್ರವೇಶ ಕುರಿತು ಮಾತನಾಡುತ್ತಿದ್ದರು. ಇದೀಗ ಆ ಸಮಯ ಬಂದಿದ್ದು, ನೂತನ ಫೋನ್ ಯಾವಾಗ ಬಿಡುಗಡೆಯಾಗಲಿದೆ ಮತ್ತು ಯಾವೆಲ್ಲ ವೈಶಿಷ್ಟ್ಯ ಹೊಂದಿರಲಿದೆ ಎನ್ನುವುದನ್ನು ಸ್ಯಾಮ್‌ಸಂಗ್ ಬಹಿರಂಗಪಡಿಸಿಲ್ಲ.

ಆದರೆ ಗೂಗಲ್‌ನ ಡೇವ್ ಬರ್ಕೆ ಪ್ರಕಾರ, ಮುಂದಿನ ವರ್ಷ ಸ್ಯಾಮ್‌ಸಂಗ್ ಫೋಲ್ಡೇಬಲ್ ಸ್ಮಾರ್ಟ್‌ಫೋನ್ ಬಿಡುಗಡೆ ಮಾಡಲಿದೆ ಎಂದಿದ್ದಾರೆ.