ಮನೆಯನ್ನು ಸ್ಮಾರ್ಟ್ ಆಗಿಸುವ ಗ್ಯಾಜೆಟ್‌

ಜೀವನ ಮಟ್ಟವನ್ನು ಸುಧಾರಿಸಲು ತಂತ್ರಜ್ಞಾನ ಕ್ರಾಂತಿಯು ನೆರವಾಗಿದೆ. ಸ್ಮಾರ್ಟ್‌ ಫೋನ್‌, ಟ್ಯಾಬ್ಲೆಟ್‌ ಇವುಗಳಿಂದಾಗಿ ಮನೆಯು ಸ್ಮಾರ್ಟ್‌ ಹೋಂ ಆಗಿ ಮಾರ್ಪಟ್ಟಿದೆ.

ಮನೆಯ ಲೈಟಿಂಗ್‌ನಿಂದ ಹಿಡಿದು ಭದ್ರತೆಯವರೆಗೆ ಎಲ್ಲವೂ ಈಗ ಸ್ಮಾರ್ಟ್‌ಮಯವಾಗುತ್ತಿದೆ. ಈ ಟ್ರೆಂಡ್‌ಗೆ ಅನುರೂಪವಾಗಿ ಮಾರುಕಟ್ಟೆಯಲ್ಲಿ ಇದಕ್ಕೆ ಪೂರಕವಾದ ಸಾಕಷ್ಟು ಸ್ಮಾರ್ಟ್‌ ಸಾಮಗ್ರಿಗಳು ದೊರೆಯುತ್ತಿವೆ.

ಲೈಟಿಂಗ್‌: ಮನೆಯನ್ನು ಬೆಳಗುವ ಲೈಟಿಂಗ್‌ ಕೇವಲ ಬೆಳಕು ನೀಡುವುದಷ್ಟೇ ಅಲ್ಲ, ಮನೆಯ ಅಲಂಕಾರದ ಭಾಗವಾಗಿ ಕೂಡ ಮಾರ್ಪಟ್ಟಿದೆ. ಸದ್ಯ ಮಾರುಕಟ್ಟೆಯಲ್ಲಿ 16 ದಶ ಲಕ್ಷ ಬಣ್ಣದ ಬಲ್ಬ್ಗಳು ದೊರೆಯುತ್ತವೆ. ಮಾಮೂಲಿ ಸಾಕೆಟ್‌ ಅಳವಡಿಸಬಹುದಾದ ಎಲ್‌ಇಡಿ ಬಲ್ಬ್ಗಳು ಕೂಡ ಬಂದಿವೆ. ಸ್ಮಾರ್ಟ್‌ಫೋನ್‌ಗೆ ಉಚಿತವಾಗಿ ಡೌನ್‌ಲೋಡ್‌ ಮಾಡಿಕೊಳ್ಳುವ ಆ್ಯಪ್‌ಗಳಿಂದ ಅದರ ಬಣ್ಣವನ್ನು ಕುಳಿತಲ್ಲೇ ಬದಲಾಯಿಸಲು ಕೂಡ ಸಾಧ್ಯವಿದೆ.

ಭದ್ರತೆ: ಮನೆಯ ಭದ್ರತೆಯನ್ನು ಹೆಚ್ಚಿಸಿಕೊಳ್ಳಲು ಕೂಡ ತಂತ್ರಜ್ಞಾನ ನೆರವಾಗುತ್ತಿದೆ. ಇವುಗಳ ಪೈಕಿ ಒಂದು ಸೆಕ್ಯುರಿಟಿ ಕ್ಯಾಮರಾ. ದ್ವಿಮುಖ ಆಡಿಯೋ ಸಂವಹನ ಸೌಲಭ್ಯ ಹೊಂದಿರುವ ಇವುಗಳ ಬೆಲೆ 5,000 ರೂ.ನಿಂದ ಆರಂಭವಾಗುತ್ತವೆ. ಫ್ಲ್ಯಾಟ್‌ನ ಹೊರ ಭಾಗದ ಗೋಡೆಗೆ ಪವರ್‌ ಸ್ಯಾಕೆಟ್‌ನಲ್ಲಿ ಇದನ್ನು ಅಳವಡಿಸಿ ವೈ-ಫಿ ನೆಟ್‌ವರ್ಕ್‌ ಮೂಲಕ ಸ್ಮಾರ್ಟ್‌ಫೋನ್‌ ಆ್ಯಪ್‌ಗೆ ಸಂಪರ್ಕಿಸಿದರೆ ಸಾಕು. ಇದಲ್ಲದೆ ಸ್ಮಾರ್ಟ್‌ ಡೋರ್‌ ಲಾಕ್‌ ಕೂಡ ಅಳವಡಿಸಬಹುದು. ಇದನ್ನು ಹೊರತು ಪಡಿಸಿ ಪಿನ್‌ ಕೋಡ್‌ ಲಾಕ್‌, ಫಿಂಗರ್‌ ಪ್ರಿಂಟ್‌ ಲಾಕ್‌, ಬ್ಲ್ಯೂ ಟೂತ್‌ ಲಾಕ್‌ ಮೊದಲಾದವುಗಳು ಕೂಡ ಲಭ್ಯವಿವೆ.

ಹೋಂ ಅಟೋಮೇಶನ್‌: ಪ್ಲಗ್‌ ಆಂಡ್‌ ಪ್ಲೇ ಹೋಂ ಅಟೋಮೇಶನ್‌ ಈಗ ಸಿಗುತ್ತದೆ. ಇದು ಕೇಂದ್ರೀಯ ವ್ಯೂಹವನ್ನು ಹೊಂದಿದ್ದು, ಮನೆಯನ್ನು ವೈ-ಫಿ ಮೂಲಕ ಸಂಪರ್ಕಿಸುತ್ತದೆ. ರಿಮೇಟ್‌ ಕಂಟ್ರೋಲ್‌ ಮೂಲಕ ಇದನ್ನು ಅಪರೇಟ್‌ ಮಾಡಬಹುದು. ಇದರಲ್ಲಿ ಕೂಡ ಸಾಕಷ್ಟು ಬೇರೆ ಬೇರೆ ರೀತಿಯ ಸೌಲಭ್ಯಗಳಿವೆ.

ಮೋಶನ್‌ ಸೆನ್ಸಾರ್‌ ಲೈಟ್‌: ಇವು ಚಲನೆಯ ಆಧಾರದಲ್ಲಿ ಕೆಲಸ ಮಾಡುವ ಲೈಟ್‌ಗಳು. ಸುತ್ತಲಿನ ಯಾವುದೇ ಚಲನೆಯನ್ನು ಆಧರಿಸಿ ಲೈಟ್‌ಗಳು ತನ್ನಿಂದ ತಾನೇ ಆನ್‌ ಆಗುವ ತಂತ್ರಜ್ಞಾನ ಇದರಲ್ಲಿದೆ. ಇದನ್ನು ಮನೆಯ ಭದ್ರತೆಗಾಗಿ ಹೊರಗಿನ ಕಾರಿಡಾರ್‌ನಲ್ಲಿ ಹಾಕಬಹುದು. ಇದಲ್ಲದೆ ಮನೆಯೊಳಗೆ ರಾತ್ರಿ ವೇಳೆ ಬರುವಾಗ ಸ್ವಿಚ್‌ ಹುಡುಕಬೇಕಾದ ಸಮಸ್ಯೆಯನ್ನು ತಪ್ಪಿಸಲು ಕೂಡ ಹಾಕಿಕೊಳ್ಳಬಹುದು.