Phone Stolen: ಫೋನ್ ಪತ್ತೆಗೆ ಸರಕಾರದಿಂದಲೇ ನೆರವು

ಸ್ಮಾರ್ಟ್‌ಫೋನ್ ಕಳ್ಳತನ ಮತ್ತು ಫೋನ್ ಕಳೆದುಹೋಗುವುದು ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗುತ್ತಿದೆ. ಫೋನ್ ಕಳವಾದರೆ, ಫೋನ್ ಮೌಲ್ಯಕ್ಕಿಂತ ಹೆಚ್ಚಾಗಿ, ಅದರಲ್ಲಿನ ಪ್ರಮುಖ ಮಾಹಿತಿ, ಸೋಶಿಯಲ್ ಮೀಡಿಯಾ ಲಾಗಿನ್ ಹೀಗೆ ಹಲವು ಪ್ರಮುಖ ಸಂಗತಿಗಳ ಬಗ್ಗೆ ತಲೆಕೆಡಿಸಿಕೊಳ್ಳಬೇಕಾಗುತ್ತದೆ.

ಆದರೆ ಇನ್ನು ಮುಂದೆ ಫೋನ್ ಕಳವಾದರೆ ಅಥವಾ ಮರೆತು ಎಲ್ಲಾದರೂ ಬಿಟ್ಟು ಬಂದರೆ, ಅದನ್ನು ಹುಡುಕಲು ಸರಕಾರವೇ ಸಹಾಯ ಮಾಡಲಿದೆ.

ಮಹಾರಾಷ್ಟ್ರದಲ್ಲಿ ಆರಂಭದಲ್ಲಿ ಪೈಲಟ್ ಯೋಜನೆಯಾಗಿ ಈ ತಂತ್ರಜ್ಞಾನವನ್ನು ಪರೀಕ್ಷಿಸಲಾಗುತ್ತಿದ್ದು, ನಂತರದಲ್ಲಿ ದೇಶಾದ್ಯಂತ ವಿಸ್ತರಿಸಲಾಗುತ್ತದೆ.

2017ರಿಂದ ಟೆಲಿಕಮ್ಯೂನಿಕೇಶನ್ಸ್ ಇಲಾಖೆ ಈ ಕುರಿತ ಯೋಜನೆಯಲ್ಲಿ ತೊಡಗಿದ್ದು, ಸೆಂಟ್ರಲ್ ಇಕ್ವಿಪ್‌ಮೆಂಟ್ ಐಡೆಂಟಿಟಿ ರಿಜಿಸ್ಟರ್ (CEIR) ಸಹಯೋಗದಲ್ಲಿ ಐಎಂಇಐ ಸಂಖ್ಯೆಯ ಮೂಲಕ ಮೊಬೈಲ್ ಫೋನ್ ಪತ್ತೆಗೆ ನೆರವಾಗಲಿದೆ.
ಟೆಲಿಕಾಂ ಸಚಿವ ರವಿಶಂಕರ್ ಪ್ರಸಾದ್, ಈ ಪೈಲಟ್ ಯೋಜನೆಗೆ ಮಹಾರಾಷ್ಟ್ರದಲ್ಲಿ ಚಾಲನೆ ನೀಡಿದ್ದಾರೆ.

ಹೇಗೆ ಕೆಲಸ ಮಾಡುತ್ತದೆ?
ಫೋನ್ ಮರೆತುಹೋದರೆ ಮತ್ತು ಕಳವಾದರೆ, ಮೊದಲು ಸಮೀಪದ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಬೇಕು. ನಂತರ ಟೆಲಿಕಾಂ ಸಚಿವಾಲಯಕ್ಕೆ 14422 ಹೆಲ್ಪ್‌ಲೈನ್ ನಂಬರ್ ಮೂಲಕ ಮಾಹಿತಿ ನೀಡಬೇಕು.

ಪೊಲೀಸ್ ದೂರು ದಾಖಲಿಸಿಕೊಂಡ ಬಳಿಕ, ಟೆಲಿಕಾಂ ಸಚಿವಾಲಯ ನಿಮ್ಮ ಫೋನ್‌ನ IMEI ಸಂಖ್ಯೆಯನ್ನು ಬ್ಲಾಕ್ ಮಾಡುತ್ತದೆ. ಇದರಿಂದ ನಿಮ್ಮ ಫೋನ್‌ ನೆಟ್‌ವರ್ಕ್‌ ಸಂಪರ್ಕಿಸಲು ಸಾಧ್ಯವಾಗುವುದಿಲ್ಲ. ಜತೆಗೆ ಮೊಬೈಲ್ ಸೇವಾದಾರ ಕಂಪನಿ ಕೂಡ ಫೋನ್ ಸಂಖ್ಯೆಯನ್ನು ಬ್ಲಾಕ್ ಮಾಡುತ್ತದೆ. ಫೋನ್ ಕದ್ದವರು ಹೊಸ ಸಿಮ್ ಅಳವಡಿಸಿಲು ಯತ್ನಿಸಿದರೆ ಸಾಧ್ಯವಾಗುವುದಿಲ್ಲ. ಜತೆಗೆ ಪೊಲೀಸರಿಗೆ ಮಾಹಿತಿ ಕೂಡ ರವಾನೆಯಾಗುತ್ತದೆ.

ಪ್ರಸ್ತುತ ಈ ಯೋಜನೆ ಮಹಾರಾಷ್ಟ್ರದಲ್ಲಿ ಮಾತ್ರ ಪ್ರಾಯೋಗಿಕ ಹಂತದಲ್ಲಿದ್ದು, ಮುಂದೆ ಇತರ ರಾಜ್ಯಗಳಿಗೆ ಲಭ್ಯವಾಗಲಿದೆ.
ಆದರೆ IMEI ನಂಬರ್ ತಿರುಚುವ ಸಾಧ್ಯತೆಯಿದ್ದು, ಅಂತಹ ಸಂದರ್ಭದಲ್ಲಿ ಗ್ರಾಹಕರು ನಕಲಿ ಮತ್ತು ಸೆಕೆಂಡ್ ಹ್ಯಾಂಡ್ ಫೋನ್ ಮಾರುಕಟ್ಟೆಯಲ್ಲಿ ಕೊಳ್ಳುವ ಸಂದರ್ಭದಲ್ಲಿ ಎಚ್ಚರಿಕೆ ವಹಿಸುವುದು ಸೂಕ್ತವಾಗಿದೆ.

Google Pay: ಹಲವು ಬ್ಯಾಂಕ್ ಖಾತೆ ಬಳಕೆ ಹೇಗೆ?