ಬೆಂಗಳೂರು: ಒನ್ಪ್ಲಸ್ ಮಂಗಳವಾರ ಭಾರತೀಯ ಮಾರುಕಟ್ಟೆಗೆ ಬಿಡುಗಡೆ ಮಾಡಿರುವ ಒನ್ಪ್ಲಸ್ 7 ಪ್ರೊ ಸ್ಮಾರ್ಟ್ ಫೋನ್ ಅತ್ಯಾಧುನಿಕ ವೈಶಿಷ್ಟ್ಯಗಳೊಂದಿಗೆ ಹಲವು ವಿಶೇಷತೆಗಳನ್ನು ಹೊತ್ತು ತಂದಿದೆ. ಪ್ರೀಮಿಯಂ ವಿಭಾಗದಲ್ಲಿ ಸಾಕಷ್ಟು ಕುತೂಹಲ ಕೆರಳಿಸಿರುವ ಈ ಫೋನ್ ಖರೀದಿಸುವ ಯೋಚನೆ ನಿಮ್ಮದಾಗಿದ್ದರೆ, ನೀವು ತಿಳಿದಿರಲೇಬೇಕಾದ ಕೆಲವು ವೈಶಿಷ್ಟ್ಯಗಳು ಇಲ್ಲಿವೆ.
- ಒನ್ಪ್ಲಸ್ 7 ಪ್ರೊ ಈ ಕಂಪನಿ ಹೊರತಂದಿರುವ ಅತ್ಯಂತ ದುಬಾರಿ ಫೋನ್. ಮಾರುಕಟ್ಟೆಯಲ್ಲಿ ಇದು ಐಫೋನ್ XR, ಸ್ಯಾಮ್ಸಂಗ್ ಗೆಲಾಕ್ಸಿ ಎಸ್10, ಗೂಗಲ್ ಪಿಕ್ಸೆಲ್ 3ಎ XL ಮುಂತಾದವುಗಳಿಗೆ ಸ್ಫರ್ಧೆ ನೀಡುತ್ತಿದೆ. ಅಲ್ಲದೆ ತಾನು ಉತ್ಪಾದಿಸಿದ ಅತ್ಯಂತ ಸುಂದರ ವಿನ್ಯಾಸದ ಹಾಗೂ ಶಕ್ತಿಶಾಲಿ ಫೋನ್ ಇದು ಎಂದು ಒನ್ಪ್ಲಸ್ ಹೇಳಿಕೊಂಡಿದೆ.
- ಭಾರತದಲ್ಲಿ ಅತ್ಯಾಧುನಿಕವಾದ ಕ್ವಾಲ್ಕಾಂ ಸ್ನ್ಯಾಪ್ಡ್ರ್ಯಾಗನ್ 855 ಪ್ರೊಸೆಸರ್ನಲ್ಲಿ ಚಲಾವಣೆಯಾಗುತ್ತಿರುವ ಮೊದಲ ಫೋನ್ ಒನ್ಪ್ಲಸ್ 7 ಪ್ರೊ
- 48 ಮೆಗಾಪಿಕ್ಸೆಲ್ ರೆಸೊಲ್ಯುಶನ್ ಸಹಿತವಾದ ತ್ರಿವಳಿ ಕ್ಯಾಮೆರಾಗಳನ್ನು ಹೊಂದಿರುವ ಮೊದಲ ಒನ್ಪ್ಲಸ್ ಫೋನ್ ಎಂದರೆ ಒನ್ಪ್ಲಸ್ 7 ಪ್ರೊ. ಇದರಲ್ಲಿ f/1.6 ಅಪರ್ಚರ್ ಸಹಿತವಾದ ಸೋನಿ IMX586 ಸೆನ್ಸರ್ ಇದೆ. ಜತೆಗೆ 16 MP ಅಲ್ಟ್ರಾ ವೈಡ್ಆ್ಯಂಗಲ್ ಕ್ಯಾಮೆರಾ, 3x ಆಪ್ಟಿಕಲ್ ಝೂಮ್ ಇರುವ 8 ಮಗಾಪಿಕ್ಸೆಲ್ ಟೆಲಿಫೋಟೋ ಕ್ಯಾಮೆರಾ ಕೂಡ ಇದರಲ್ಲಿದೆ.
- ಯಾವುದೇ ನಾಚ್ ಇಲ್ಲದಿರುವ, ಎರಡೂ ಬದಿಗಳಲ್ಲಿ ಬೆಝೆಲ್-ಲೆಸ್ ಆಗಿ, ಬಾಗಿದ ಅಂಚುಗಳಿರುವ 6.7 ಇಂಚು ಸ್ಕ್ರೀನ್ ಇದ್ದು, ಫ್ಲೂಯಿಡ್ AMOLED ಡಿಸ್ಪ್ಲೇ ಹೊಂದಿದೆ. 516 ಡಿಪಿಐ ಸಾಂದ್ರತೆಯೊಂದಿಗೆ ಇರುವ 3120x1440 ಪಿಕ್ಸೆಲ್ QHD+ ರೆಸೊಲ್ಯುಶನ್ ಮೂಲಕ ಸ್ಫುಟವಾದ ಚಿತ್ರಗಳನ್ನು ನೋಡಬಹುದು.
- ಒನ್ಪ್ಲಸ್ 7 ಪ್ರೊ ಫೋನ್ನ ಹಿಂಭಾಗದ ಪ್ಯಾನೆಲ್ ಕೂಡ ಗಾಜಿನಿಂದಲೇ ಆವೃತವಾಗಿದ್ದು, ಆಕರ್ಷಕವಾಗಿದೆ.
- ಇದೇ ಮೊದಲ ಬಾರಿಗೆ ಒನ್ಪ್ಲಸ್ ಫೋನ್ನಲ್ಲಿ ಪಾಪ್-ಔಟ್ ಆಗುವ ಸೆಲ್ಫೀ ಕ್ಯಾಮೆರಾ ಅಳವಡಿಸಲಾಗಿದೆ. ಇದು ನಾಚ್-ಲೆಸ್ ಡಿಸ್ಪ್ಲೇ ನೀಡಲು ನೆರವಾಗಿದೆ.
- ಒನ್ಪ್ಲಸ್ 7 ಪ್ರೊ ಮೂರು ಮೆಮೊರಿ ಆಯ್ಕೆಗಳಲ್ಲಿ ಲಭ್ಯವಿದೆ. 6GB/128GB, 8GB/256GB ಹಾಗೂ 12GB RAM/256GB ಆವೃತ್ತಿಗಳು.
- ಒನ್ಪ್ಲಸ್ 7 ಪ್ರೊ ಬೆಲೆ ಹೀಗಿದೆ: 6GB RAM ಆವೃತ್ತಿಗೆ ರೂ.48,999 8GB RAM ಆವೃತ್ತಿಗೆ ರೂ. 52,999 ಹಾಗೂ 12GB RAM ಆವೃತ್ತಿಗೆ ರೂ. 57,999.
- ವಾರ್ಪ್ ಚಾರ್ಜ್ 30 ಎಂಬ ವೇಗದ ಚಾರ್ಜಿಂಗ್ ವ್ಯವಸ್ಥೆಯ ಮೂಲಕ ಅತ್ಯಂತ ಬೇಗನೇ ಬ್ಯಾಟರಿ ಚಾರ್ಜ್ ಮಾಡಬಹುದು. ಒನ್ಪ್ಲಸ್ 7 ಪ್ರೊ ಬ್ಯಾಟರಿ ಸಾಮರ್ಥ್ಯ 4000mAh.
- ಒನ್ಪ್ಲಸ್ 7 ಪ್ರೊ ನಲ್ಲಿ ಆಂಡ್ರಾಯ್ಡ್ 9.0 (ಪೈ) ಆಧಾರಿತ ಅತ್ಯಾಧುನಿಕ ಆಕ್ಸಿಜನ್ ಒಎಸ್ 9.5 ಕಾರ್ಯಾಚರಣಾ ವ್ಯವಸ್ಥೆಯಿದೆ ಮತ್ತು ಆಂಡ್ರಾಯ್ಡ್ ಕ್ಯೂ (10.0) ಆಧಾರಿತ ಡೆವಲಪರ್ ಆಯ್ಕೆಯನ್ನೂ ಬೆಂಬಲಿಸುತ್ತದೆ.
- ಡಾಲ್ಬಿ ಅಟ್ಮಾಸ್ ಮೂಲಕ ಡ್ಯೂಯಲ್ ಸ್ಪೀಕರ್ ಸಿಸ್ಟಂ ಈ ಒನ್ಪ್ಲಸ್ 7 ಪ್ರೊ ಫೋನ್ನಲ್ಲಿದೆ.
- ಹಿಂದಿನ ಫೋನ್ನಂತೆಯೇ ಒನ್ಪ್ಲಸ್ 7 ಪ್ರೊ ನಲ್ಲೂ 3.5 ಮಿಮೀ ಹೆಡ್ಫೋನ್ ಜ್ಯಾಕ್ ಇಲ್ಲ, ಬದಲಾಗಿ ಟೈಪ್ ಸಿ ಜ್ಯಾಕ್ ಇದೆ.
- ಒನ್ಪ್ಲಸ್ 7 ಪ್ರೊ ಮೂರು ಬಣ್ಣಗಳಲ್ಲಿ ಲಭ್ಯ ಇದೆ. ನೆಬ್ಯುಲಾ ಬ್ಲೂ (ನೀಲಿ - 8+ 256 GB, 12 + 256GB), ಮಿರರ್ ಗ್ರೇ (ಕಪ್ಪು 6+128 GB, 8+256 GB) ಹಾಗೂ ಆಲ್ಮಂಡ್ (ಬಾದಾಮಿ ಬಣ್ಣ- 8+ 256 GB).