ಹಿಂದೆ ಬಿದ್ದ ಎಚ್‌ಟಿಸಿ

ಅತ್ಯಾಧುನಿಕತೆಯ ಸ್ಮಾರ್ಟ್‌ಫೋನ್‌ಗಳ ತಯಾರಿಕೆಯಲ್ಲಿ ಮುಂಚೂಣಿಯಲ್ಲಿದ್ದ ತೈವಾನ್‌ನ ಎಚ್‌ಟಿಸಿ ಕಂಪನಿ ಇದೀಗ ಹಿನ್ನಡೆ ಅನುಭವಿಸುತ್ತಿದೆ. ಜೂನ್‌ ತಿಂಗಳೊಂದರಲ್ಲೇ ಫೋನ್‌ಗಳ ಮಾರಾಟದಲ್ಲಿ ಶೇ.68ರಷ್ಟು ಕುಸಿತವಾಗಿದೆ.
ಇದು ಕಳೆದ ಎರಡು ವರ್ಷದಲ್ಲೇ ಅತಿ ದೊಡ್ಡ ಪ್ರಮಾಣವಾಗಿದೆ. ಪ್ರತಿ ಸ್ಪರ್ಧಿ ಕಂಪನಿಗಳಿಗೆ ಟಕ್ಕರ್‌ ಕೊಡುವಲ್ಲಿ ಸಂಪೂರ್ಣವಾಗಿ ಸೋಲುತ್ತಿದೆ. ಹಿಂದೊಮ್ಮೆ ಗ್ರಾಹಕರು ಮತ್ತು ಹೂಡಿಕೆದಾರರ ಅಚ್ಚುಮೆಚ್ಚಿನ ಕಂಪನಿಯಾಗಿದ್ದ ಎಚ್‌ಟಿಸಿಗೆ, ಆ್ಯಪಲ್‌, ಸ್ಯಾಮ್ಸಂಗ್‌, ಶಿಯೊಮಿ ಕಂಪನಿಗಳ ಸ್ಪರ್ಧೆಯನ್ನು ಎದುರಿಸಲಾಗುತ್ತಿಲ್ಲ.
ಹಾಗಾಗಿ, ಮಾರುಕಟ್ಟೆಯಲ್ಲಿ ಎಚ್‌ಟಿಸಿ ಸ್ಮಾರ್ಟ್‌ಫೋನ್‌ಗಳೂ ತಮ್ಮ ಜನಪ್ರಿಯತೆಯನ್ನು ಕಳೆದುಕೊಳ್ಳುತ್ತಿವೆ ಎಂಬುದರಲ್ಲಿ ಯಾವುದೇ ಅನುಮಾನವಿಲ್ಲ. ಇದೇ ಪ್ರವೃತ್ತಿ ಹೀಗೆಯೇ ಮುಂದುವರಿದರೆ ಕಂಪನಿಯ ಹಿತಾಸಕ್ತಿಗೆ ಖಂಡಿತವಾಗಿ ಧಕ್ಕೆ ಬರಲಿದೆ ಎನ್ನುತ್ತಾರೆ ವಿಶ್ಲೇಷಕರು.