ಕ್ಯಾಮಾನ್ ಐ-ಏಸ್: ಕಡಿಮೆ ಬೆಲೆ, ಉತ್ತಮ ಕ್ಯಾಮೆರಾ, ಸ್ಮಾರ್ಟ್ ವೈಶಿಷ್ಟ್ಯಗಳು

ಹಾಂಕಾಂಗ್‌ನ ಟ್ರಾನ್‌ಶನ್ಸ್ ಹೋಲ್ಡಿಂಗ್ಸ್ ಹೊರತಂದಿರುವ ಟೆಕ್ನೋ ಬ್ರ್ಯಾಂಡ್‌ನ ಮೊಬೈಲ್ ಫೋನ್‌ಗಳಲ್ಲಿ ಗಮನ ಸೆಳೆದಿರುವುದು ಅತ್ಯಂತ ಅಗ್ಗದ ದರದಲ್ಲಿ ತೀರಾ ಹೊಸದಾದ ಒರಿಯೋ ಕಾರ್ಯಾಚರಣೆ ವ್ಯವಸ್ಥೆಯಿರುವ ಟೆಕ್ನೋ ಕ್ಯಾಮಾನ್ ಐ ಏಸ್ ಮಾಡೆಲ್.

13 ಹಾಗೂ 8 ಮೆಗಾಪಿಕ್ಸೆಲ್ ಕ್ಯಾಮೆರಾಗಳು, ಡ್ಯುಯಲ್ ಸಿಮ್, ಆಂಡ್ರಾಯ್ಡ್ 8.1 ಒರಿಯೋ ಕಾರ್ಯಾಚರಣಾ ವ್ಯವಸ್ಥೆ ಆಧಾರಿತ HiOS, 3050 mAh ಬ್ಯಾಟರಿ - ಇದರ ಪ್ರಮುಖ ವೈಶಿಷ್ಟ್ಯಗಳು.

6799 ರೂ.ಗೆ ಮಾರುಕಟ್ಟೆಯಲ್ಲಿ ಲಭ್ಯವಿರುವವುಗಳಲ್ಲಿ ಕ್ಯಾಮಾನ್ ಐ-ಏಸ್ ಮಾಡೆಲ್ ಗಮನ ಸೆಳೆಯುತ್ತದೆ. ಆಗಸ್ಟ್ ತಿಂಗಳಲ್ಲಿ ಮಾರುಕಟ್ಟೆಗೆ ಬಿಡುಗಡೆಯಾದ ಈ ಫೋನ್ ಆನ್‌ಲೈನ್‌ನಲ್ಲಿ ಮಾತ್ರ ಲಭ್ಯ. ತಿಂಗಳ ಕಾಲ ಬಳಸಿದಾಗ ಹೇಗನಿಸಿತು? ಇಲ್ಲಿದೆ ವಿಮರ್ಶೆ.

5.5 ಇಂಚು ಸ್ಕ್ರೀನ್ ಇರುವುದರಿಂದ ಒಂದು ಕೈಯಲ್ಲಿ ಹಿಡಿದು ಕೆಲಸ ಮಾಡುವುದು ತೀರಾ ಸುಲಭ. ಸುಂದರವಾದ ವಿನ್ಯಾಸವನ್ನೂ ಹೊಂದಿದ್ದು, ಟಚ್ ಸ್ಕ್ರೀನ್ ಹಿಂದಿನ ಕ್ಯಾಮಾನ್ ಬೇಸಿಕ್ ಮಾಡೆಲ್‌ಗಿಂತ ಉತ್ತಮವಾಗಿ ಕೆಲಸ ಮಾಡುತ್ತದೆ. ಐಪಿಎಸ್ ಡಿಸ್‌ಪ್ಲೇ ಉತ್ತಮ ಗುಣಮಟ್ಟದ ಚಿತ್ರ ವೀಕ್ಷಣೆಗೆ ಅನುಕೂಲಕರವಾಗಿದೆ. ಮಲ್ಟಿ ವಿಂಡೋ ಆಯ್ಕೆ, ಒಂದು ಕೈಯಲ್ಲಿ ಬಳಸುವ ಮೋಡ್ ಹಾಗೂ ವಾಟ್ಸ್ಆ್ಯಪ್ ಮೋಡ್‌ಗಳು ಕೂಡ ಇದರಲ್ಲಿವೆ.

ಕನ್ನಡ ಯೂಸರ್ ಇಂಟರ್ಫೇಸ್

ವೈಶಿಷ್ಟ್ಯಗಳು
OS: ಆಂಡ್ರಾಯ್ಡ್ OS v8.1 (Oreo)
ಚಿಪ್‌ಸೆಟ್: ಮೀಡಿಯಾಟೆಕ್ MT6739
CPU: ಕ್ವಾಡ್-ಕೋರ್ 1.5 GHz ಕಾರ್ಟೆಕ್ಸ್-A53
ಡಿಸ್‌ಪ್ಲೇ: 5.5 ಇಂಚು IPS ಕೆಪಾಸಿಟಿವ್ ಟಚ್ ಸ್ಕ್ರೀನ್, 720 x 1440 px ರೆಸೊಲ್ಯುಶನ್
RAM: 2 GB
ಸ್ಟೋರೇಜ್: 16 GB
ಬಾಹ್ಯ ಸ್ಟೋರೇಜ್: microSD
ಕ್ಯಾಮೆರಾ: 8 MP ಹಾಗೂ ಹಿಂಭಾಗದಲ್ಲಿ 13 MP, ಆಟೋಫೋಕಸ್, ಎಲ್ಇಡಿ ಫ್ಲ್ಯಾಶ್
ಸೆನ್ಸರ್‌ಗಳು: ಅಕ್ಸೆಲರೋಮೀಟರ್, ಕಂಪಾಸ್, ಪ್ರಾಕ್ಸಿಮಿಟಿ, ಲೈಟ್

ಕ್ಯಾಮೆರಾ
13 ಮೆಗಾಪಿಕ್ಸೆಲ್ ಹಿಂಭಾಗದ ಹಾಗೂ 8 ಮೆಗಾಪಿಕ್ಸೆಲ್ ಸೆಲ್ಫೀ ಕ್ಯಾಮೆರಾಗಳ ಲೆನ್ಸ್ ಉತ್ತಮವಾಗಿದ್ದು, ಹೊರಾಂಗಣದಲ್ಲಿ ಉತ್ತಮ ಫೋಟೋ ಒದಗಿಸುತ್ತದೆ. ಮುಂಭಾಗದಲ್ಲಿಯೂ ಫ್ಲ್ಯಾಶ್ ಇರುವುದು ವಿಶೇಷ. ಕ್ಯಾಮೆರಾದಲ್ಲಿ ವೀಡಿಯೊ ಜತೆಗೆ ಎಐ ಕ್ಯಾಮೆರಾ, ಬ್ಯೂಟಿ ಮತ್ತು ಪನೋರಮಾ ಮೋಡ್‌ಗಳಿವೆ. ಕತ್ತಲಿನಲ್ಲಿ ತೆಗೆಯುವ ಫೋಟೋಗಳು ಸ್ವಲ್ಪ ಪಿಕ್ಸಲೇಟ್ ಆಗಿವೆ. ಅದೇ ರೀತಿ, ಫೋಟೋಗಳೆಲ್ಲ ಸೇವ್ ಆಗುವ ಗ್ಯಾಲರಿ ಆ್ಯಪ್‌ನಲ್ಲಿ ಮಹತ್ವದ ಅಥವಾ ಖಾಸಗಿ ಫೋಟೋಗಳನ್ನು ಮರೆ ಮಾಡುವ ಆಯ್ಕೆಯೂ ಇದೆ. ಪಿನ್ ನಂಬರ್ ಹೊಂದಿಸಿಟ್ಟರಾಯಿತು. ಅದೇ ರೀತಿ, ಫೋಟೋ ಎಡಿಟಿಂಗ್‌ನಲ್ಲಿ ಮೇಕಪ್ ಎಂಬ ವೈಶಿಷ್ಟ್ಯವಿದ್ದು, ನಮ್ಮ ಮುಖಕ್ಕೆ ಬೇಕಾದಂತೆ ಮೇಕಪ್ ಮಾಡಿಕೊಳ್ಳಬಹುದು, ಹುಬ್ಬು ಟ್ರಿಮ್ ಮಾಡಬಹುದು, ಮುಖದ ಚಹರೆಯನ್ನು ಸಂಪೂರ್ಣವಾಗಿ ನಮಗೆ ಬೇಕಾದಂತೆ ಬದಲಾಯಿಸುವ ಆಯ್ಕೆಯಿದೆ.

ಹಾರ್ಡ್‌ವೇರ್
2ಜಿಬಿ RAM ಹಾಗೂ 16 ಜಿಬಿ ಮೆಮೊರಿ ಇದ್ದು, 1.5 GHz ಕ್ವಾಡ್ ಕೋರ್ Mediatek MT6739 ಪ್ರೊಸೆಸರ್ ಇರುವುದರಿಂದ ಈ ಶ್ರೇಣಿಯಲ್ಲಿ ಉತ್ತಮ ಕೆಲಸ ನಿರ್ವಹಿಸುತ್ತದೆ. ಸ್ಕ್ರೀನ್ ರೆಸೊಲ್ಯುಶನ್ 720 x 1440 px ಇರುವುದರಿಂದ ಚಿತ್ರಗಳ ಸ್ಪಷ್ಟತೆ ಇದೆ. ಕನ್ನಡ ಯೂಸರ್ ಇಂಟರ್ಫೇಸ್ ಆಯ್ಕೆ ಮಾಡಿಕೊಳ್ಳಬಹುದಾಗಿದ್ದು, ಕನ್ನಡ ಕೀಬೋರ್ಡ್ ಕೂಡ ಇದೆ.

ಕಣ್ಣಿಗೆ ರಕ್ಷಣೆ
ಕಣ್ಣಿಗೆ ತ್ರಾಸವಾಗದಂತೆ, ಅಡಾಪ್ಟಿವ್ ಬ್ರೈಟ್‌ನೆಸ್ ಎಂಬ ವೈಶಿಷ್ಟ್ಯವಿದ್ದು, ಇದಕ್ಕೆ ಪೂರಕವಾಗಿ ಐ-ಕೇರ್ ಎಂಬ ವೈಶಿಷ್ಟ್ಯದ ಮೂಲಕ ಬೆಳಕು ಕಡಿಮೆ ಇರುವಾಗ, ಕಣ್ಣಿಗೆ ಮಾತ್ರ ಸ್ಕ್ರೀನ್ ಬೆಳಕು ಹೆಚ್ಚು ಬೀಳುವುದರಿಂದ ಆಗುವ ಕಣ್ಣಿನ ಆರೋಗ್ಯದ ಸಮಸ್ಯೆಯನ್ನು ಕಡಿಮೆ ಮಾಡುವ ಆಯ್ಕೆಯಿದೆ. ಹೆಚ್ಚು ಹೊತ್ತು ಸ್ಕ್ರೀನ್ ನೋಡುತ್ತಿದ್ದರೆ ನಿದ್ದೆಯ ಮೇಲೆ ಪ್ರಭಾವ ಬೀರುತ್ತದೆ ಎಂದು ಕೆಲವು ಅಧ್ಯಯನಗಳು ಹೇಳಿರುವ ಹಿನ್ನೆಲೆಯಲ್ಲಿ, ಪ್ರಕಾಶಮಾನವಾದ ಬೆಳಕು ಕಣ್ಣಿಗೆ ಹಾನಿಯುಂಟು ಮಾಡದಂತೆ ಈ ವೈಶಿಷ್ಟ್ಯವು ತಡೆಯುತ್ತದೆ.

ಮೈಕ್ರೋ ಇಂಟೆಲಿಜೆನ್ಸ್
ಸೆಟ್ಟಿಂಗ್ಸ್‌ನಲ್ಲಿರುವ ಈ ವೈಶಿಷ್ಟ್ಯವು ಆಧುನಿಕ ತಂತ್ರಜ್ಞಾನವನ್ನು ಈ ಕೆಳ ಶ್ರೇಣಿಯ ಸ್ಮಾರ್ಟ್ ಫೋನ್‌ನಲ್ಲೂ ಉಪಯುಕ್ತವಾಗಿಸಿದೆ. ಮೊಬೈಲ್ ಸ್ಕ್ರೀನ್ ಆಫ್ ಇದ್ದಾಗ, ತ್ವರಿತವಾಗಿ ಯಾವುದಾದರೂ ಆ್ಯಪ್ ತೆರೆಯಬೇಕೆಂದಿದ್ದರೆ, ಅದಕ್ಕೆ ಮೊದಲೇ ಒಂದು ಗೆಸ್ಚರ್ ಹೊಂದಿಸಿಟ್ಟುಕೊಳ್ಳಬಹುದು. ಅಂತೆಯೇ ಮ್ಯೂಸಿಕ್ ತೆರೆಯುವುದಕ್ಕೂ ಇಂಥದ್ದೇ ಆಯ್ಕೆಯಿದೆ. ಕರೆ ಬರುತ್ತಿರುವಾಗ ತಕ್ಷಣ ರಿಸೀವ್ ಮಾಡಬೇಕಿಲ್ಲವೆಂದಾದರೆ ಮತ್ತು ರಿಂಗ್ ಶಬ್ದವನ್ನು ನಿಲ್ಲಿಸಬೇಕಿದ್ದರೆ, ಫ್ಲಿಪ್ ಮಾಡಿ ಮ್ಯೂಟ್ ಮಾಡುವ ಆಯ್ಕೆ ಇಲ್ಲಿದೆ. ಅದೇ ರೀತಿ, ಮೂರು ಬೆರಳುಗಳನ್ನು ಬಳಸಿ ಕೆಳಗೆ ಸ್ಲೈಡ್ ಮಾಡಿದರೆ, ಸ್ಕ್ರೀನ್‌ಶಾಟ್ ತೆಗೆಯಬಹುದು. ಫೋನ್‌ನ ಸ್ಕ್ರೀನ್ ಮೇಲೆ ಕೈಯಿಂದ ಕವರ್ ಮಾಡಿದರೆ ಕೂಡ, ಒಳಬರುವ ಕರೆಯ ಸದ್ದನ್ನು ನಿಶ್ಶಬ್ಧಗೊಳಿಸುವ ಆಯ್ಕೆಗಳು ಇಲ್ಲಿವೆ.

ಫೇಸ್ ಐಡಿ (ಮುಖ ನೋಡಿ ಸ್ಕ್ರೀನ್ ಓಪನ್ ಮಾಡುವ ಆಯ್ಕೆ) ಹಾಗೂ ಸ್ಮಾರ್ಟ್ ಲಾಕ್ ಆಯ್ಕೆಗಳೂ ಈ ಫೋನ್‌ನಲ್ಲಿರುವುದು ವಿಶೇಷ. ಗೇಮ್‌ಗಳನ್ನು ಆಡುವಾಗ ಅಥವಾ ವೀಡಿಯೋ ಪ್ಲೇ ಆಗುವಾಗ, ಯಾವುದೇ ರೀತಿಯ ಲ್ಯಾಗ್ ಕಂಡುಬಂದಿಲ್ಲ. ಆ ಮಟ್ಟಿಗೆ ಈ ಶ್ರೇಣಿಯಲ್ಲಿ ಗುಣಮಟ್ಟ ಚೆನ್ನಾಗಿದೆ.

ಒಟ್ಟಾರೆ ಹೇಗೆ?
ಇಷ್ಟು ಕಡಿಮೆ ಬೆಲೆಗೆ ಆಧುನಿಕ ತಂತ್ರಜ್ಞಾನದ ವೈಶಿಷ್ಟ್ಯಗಳನ್ನು ಹೊಂದಿರುವುದರಿಂದ ಕಡಿಮೆ ಬೆಲೆಯ ಉತ್ತಮ ಕ್ಯಾಮೆರಾದ ಆಧುನಿಕ ಆಂಡ್ರಾಯ್ಡ್ ಫೋನ್ ಬೇಕೆಂದಾದರೆ ಇದನ್ನು ಖರೀದಿಸಬಹುದು.