Tecno Phantom 9 ಬಿಡುಗಡೆ: ಜು.17ರಿಂದ ಫ್ಲಿಪ್‌ಕಾರ್ಟ್‌ನಲ್ಲಿ ಲಭ್ಯ

ಹೊಸದಿಲ್ಲಿ: ಹಾಂಕಾಂಗ್ ಮೂಲದ ಟ್ರಾನ್ಸಿಯಾನ್ ಕಂಪನಿಯು ತನ್ನ ಪ್ರೀಮಿಯಂ ಸರಣಿಯ ಫ್ಲ್ಯಾಗ್‌ಶಿಪ್ ಫೋನ್ ಟೆಕ್‌ನೋ ಫ್ಯಾಂಟಮ್ 9 ಸ್ಮಾರ್ಟ್ ಫೋನ್ ಅನ್ನು ಬುಧವಾರ ಜಾಗತಿಕ ಮಾರುಕಟ್ಟೆಗೆ ಬಿಡುಗಡೆ ಮಾಡಿದ್ದು, ಫ್ಲಿಪ್‌ಕಾರ್ಟ್ ಇ-ಕಾಮರ್ಸ್ ತಾಣದ ಮೂಲಕ ಆನ್‌ಲೈನ್ ಮಾರಾಟ ಕ್ಷೇತ್ರಕ್ಕೂ ಕಾಲಿರಿಸಿತು.

14,999 ರೂ. ಬೆಲೆಯಲ್ಲಿ 6 ಜಿಬಿ RAM ಹಾಗೂ 128GB ಆಂತರಿಕ ಮೆಮೊರಿ ಹೊಂದಿರುವ ಈ ಫೋನ್, ಜುಲೈ 17ರಿಂದ ಫ್ಲಿಪ್‌ಕಾರ್ಟ್ ತಾಣದಲ್ಲಿ ಮಾರಾಟಕ್ಕೆ ಲಭ್ಯವಿದೆ.

ಪ್ರಮುಖ ಸ್ಪೆಸಿಫಿಕೇಶನ್‌ಗಳು
ಸ್ಕ್ರೀನ್ ಮೇಲಿನ ಫಿಂಗರ್ ಪ್ರಿಂಟ್ ಸ್ಕ್ಯಾನರ್, 32 ಮೆಗಾಪಿಕ್ಸೆಲ್ ಸೆಲ್ಫೀ ಕ್ಯಾಮೆರಾ, 16, 2 ಹಾಗೂ 8 ಮೆಗಾಪಿಕ್ಸೆಲ್ ಸಾಮರ್ಥ್ಯದ ಪ್ರಧಾನ ಕ್ಯಾಮೆರಾ ಹೊಂದಿರುವ ಈ ಫೋನ್, ಆಂಡ್ರಾಯ್ಡ್ 9 (ಪೈ) ಕಾರ್ಯಾಚರಣಾ ವ್ಯವಸ್ಥೆ ಆಧಾರಿತ ಹಾಯ್ ಒಎಸ್ ಮೂಲಕ ಕಾರ್ಯಾಚರಿಸುತ್ತದೆ. ಇದರಲ್ಲಿ ಮುಂಭಾಗದಲ್ಲಿ ಯಾವುದೇ ರೀತಿಯ ಮಂದ ಬೆಳಕಿನಲ್ಲೂ ಸೆಲ್ಫೀ ಅಥವಾ ವೀಡಿಯೊ ಕಾಲಿಂಗ್‌ನಲ್ಲಿ ಚಿತ್ರಗಳು ಸರಿಯಾಗಿ ಕಾಣಿಸುವಂತಾಗಲು ಅವಳಿ ಫ್ಲ್ಯಾಶ್ ಲೈಟ್‌ಗಳಿವೆ. 164 ಗ್ರಾಂ ಹಗುರ, ಹೀಲಿಯೋ ಪಿ35 ಒಕ್ಟಾಕೋರ್ ಪ್ರೊಸೆಸರ್ ಹೊಂದಿರುವ ಈ ಫೋನ್‌ನಲ್ಲಿ ಮೆಮೊರಿ ಕಾರ್ಡ್‌ಗೆ ಪ್ರತ್ಯೇಕ ಸ್ಲಾಟ್ ಇದ್ದು, 256 ಜಿಬಿ ವರೆಗೂ ವಿಸ್ತರಿಸಬಹುದಾಗಿದೆ.


ಆಕರ್ಷಕ ವಿನ್ಯಾಸ, ಹಗುರ ತೂಕದಲ್ಲಿ ಲಭ್ಯವಿರುವ ಟೆಕ್‌ನೋ ಫ್ಯಾಂಟಮ್ 9, 15 ಸಾವಿರ ರೂ. ಒಳಗಿನ ಫೋನ್‌ಗಳಲ್ಲಿ ಫಿಂಗರ್‌ಪ್ರಿಂಟ್ ಸ್ಕ್ಯಾನರ್ ಹೊಂದಿರುವ ಮೊದಲ ಫೋನ್ ಎಂಬ ಹೆಗ್ಗಳಿಕೆಯನ್ನು ಹೊಂದಿದೆ. ಕೃತಕ ಬುದ್ಧಿಮತ್ತೆ (ಎಐ) ಆಧಾರಿತ ತ್ರಿವಳಿ ಕ್ಯಾಮೆರಾಗಳು, 16 ಮೆಗಾಪಿಕ್ಸೆಲ್ ಪ್ರೈಮರಿ ಕ್ಯಾಮೆರಾ, 8 ಮೆಗಾಪಿಕ್ಸೆಲ್ ವೈಡ್-ಆ್ಯಂಗಲ್ ಕ್ಯಾಮೆರಾ ಹಾಗೂ 2 ಮೆಗಾಪಿಕ್ಸೆಲ್ ಡೆಪ್ತ್-ಸೆನ್ಸಿಂಗ್ ಕ್ಯಾಮೆರಾ ಸೆನ್ಸರ್‌ಗಳ ಮೂಲಕವಾಗಿ ಅದ್ಭುತವಾದ ಚಿತ್ರಗಳನ್ನು ಸೆರೆಹಿಡಿಯಬಹುದಾಗಿದೆ ಎಂದು ಕಂಪನಿ ಹೇಳಿಕೊಂಡಿದೆ.

6.4 ಇಂಚಿನ FHD+ AMOLED ಸ್ಕ್ರೀನ್ ಜತೆಗೆ ಡಾಟ್ ನಾಚ್ (Notch) ಮೂಲಕ, ಪೂರ್ಣ ಪರದೆಯಲ್ಲಿ ಚಿತ್ರಗಳು, ಟಿವಿ ಶೋ ಹಾಗೂ ಮೂವೀಗಳನ್ನು ವೀಕ್ಷಿಸುವ ಅನುಕೂಲವಿದೆ. 3500 mAh ಬ್ಯಾಟರಿ ಸಾಮರ್ಥ್ಯ ಇದರಲ್ಲಿದ್ದು, ಎಲ್ಲ ಟೆಕ್‌ನೋ ಫೋನ್‌ಗಳಂತೆಯೇ 111 ಲಾಭ ಲಭ್ಯವಿದೆ. ಅಂದರೆ 1 ಬಾರಿ ಸ್ಕ್ರೀನ್ ರೀಪ್ಲೇಸ್‌ಮೆಂಟ್, 100 ದಿನಗಳ ಫೋನ್ ರೀಪ್ಲೇಸ್‌ಮೆಂಟ್ ಹಾಗೂ 1 ತಿಂಗಳ ವಿಸ್ತರಿತ ವಾರಂಟಿ ಸೇವೆ ಲಭ್ಯವಿದೆ.