ಪಬ್‌ಜಿಗೆ ದಾಳಿ ಇಡಲಿವೆ ಝೊಂಬಿಗಳು: ಮುಂದಿನ ವಾರ ಹೊಸ ಅಪ್‌ಡೇಟ್

ಯುವಜನತೆಯ ಮೆಚ್ಚಿನ ಆನ್‌ಲೈನ್ ಗೇಮ್‌ ಪಬ್‌ಜಿ ಮೊಬೈಲ್‌ ಗೇಮ್‌ಗೆ ಮುಂದಿನ ವಾರ ಝೊಂಬಿಗಳು ದಾಳಿ ನಡೆಸುವುದು ನಿಶ್ಚಿತವಾಗಿದೆ.

ಪಬ್‌ಜಿ ಮೊಬೈಲ್ ಗೇಮಿಂಗ್ ಅನ್ನು ಮತ್ತಷ್ಟು ಜನಪ್ರಿಯವಾಗಿಸಲು ಈಗಾಗಲೇ ಹಲವು ಅಪ್‌ಡೇಟ್‌ಗಳನ್ನು ಬಿಡುಗಡೆಮಾಡಿದೆ. ಜತೆಗೆ ಗೇಮ್‌ಪ್ರಿಯರ ಸಲಹೆ ಸೂಚನೆಗಳಂತೆ, ಹೊಸ ಹೊಸ ಆಯ್ಕೆಗಳನ್ನು ಅಪ್‌ಡೇಟ್‌ನಲ್ಲಿ ಸೇರ್ಪಡೆ ಮಾಡುತ್ತಿದೆ.

ಟೆನ್ಸೆಂಟ್ ಗೇಮ್ಸ್ ಮುಂದಿನ ವಾರ ಪಬ್‌ಜಿ ಮೊಬೈಲ್‌ ಗೇಮ್‌ಗೆ 0.11.0 ಆವೃತ್ತಿಯನ್ನು ಬಿಡುಗಡೆ ಮಾಡುವ ನಿರೀಕ್ಷೆಯಿದ್ದು, ಝೊಂಬಿ ಮೋಡ್ ಪರಿಚಯಿಸಲಿದೆ.

ಪಬ್‌ಜಿ ಅಪ್‌ಡೇಟ್ ಕುರಿತು ಮಿ. ಘೋಸ್ಟ್‌ ಗೇಮಿಂಗ್ ಲೀಕ್ ಮಾಡಿರುವ ಮಾಹಿತಿ ಪ್ರಕಾರ ಫೆ. 19ರಂದು ಪಬ್‌ಜಿ 0.11.0 ಆವೃತ್ತಿ ಬಿಡುಗಡೆಯಾಗುತ್ತಿದ್ದು, ಅದರ ಜತೆಗೆ G63C ಗನ್‌ ಕೂಡ ಗೇಮ್‌ಪ್ರಿಯರಿಗೆ ಲಭ್ಯವಾಗಲಿದೆ.


ಉಳಿದಂತೆ ಪಬ್‌ಜಿ ಮೊಬೈಲ್ ಪ್ರೈಮ್ ಮತ್ತು ಪ್ರೈಮ್ ಪ್ಲಸ್ ಆವೃತಿಗೆ ಚಂದಾದಾರತ್ವವನ್ನು ಇದೇ ಸಂದರ್ಭದಲ್ಲಿ ದೊರೆಯಬಹುದು ಎನ್ನಲಾಗಿದೆ.

ಪ್ರಸ್ತುತ ಲಭ್ಯವಿರುವ ವಿಕೆಂಡಿ ಸ್ನೋ ಮ್ಯಾಪ್‌ನಲ್ಲಿ G63C ಗನ್ ಬಾಟ್‌ಗಳನ್ನು ಕೊಲ್ಲಲು ಬಳಕೆಯಾಗಲಿದೆ. ಝೊಂಬಿ ಮೋಡ್‌ ಬಿಡುಗಡೆ ಮಾಡುವ ಕುರಿತು ಟೆನ್ಸೆಂಟ್ ಗೇಮ್ಸ್ ಅಧಿಕೃತವಾಗಿ ಯಾವುದೇ ಹೇಳಿಕೆ ನೀಡಿಲ್ಲವಾದರೂ, ಫೆ. 18ರಂದು ಸರ್ವರ್ ನಿರ್ವಹಣೆಯ ಕಾರಣದಿಂದ ಆಫ್‌ಲೈನ್ ಹೋಗಲಿದ್ದು, ಅದೇ ಸಂದರ್ಭದಲ್ಲಿ ಹೊಸ ಆಯ್ಕೆಗಳನ್ನು ಬಳಕೆದಾರರಿಗೆ ಪರಿಚಯಿಸಲಿದೆ ಎಂದು ಮಿ. ಘೋಸ್ಟ್‌ ಗೇಮಿಂಗ್ ಲೀಕ್ ಹೇಳಿದೆ.