TikTok Campaign: ಜನಜಾಗೃತಿ ಮೂಡಿಸಲಿದೆ ಟಿಕ್‌ಟಾಕ್

ದೇಶದಲ್ಲಿ ಜನಪ್ರಿಯವಾಗಿರುವ 15 ಸೆಕೆಂಡ್‌ಗಳ ವೀಡಿಯೋ ಫ್ಲಾಟ್‌ಫಾರ್ಮ್ ಆ್ಯಪ್ ಟಿಕ್‌ಟಾಕ್ ಬಳಸಿ ನಡೆಯುತ್ತಿರುವ ಅವಘಡಗಳು ಹೆಚ್ಚುತ್ತಿದ್ದು, ಅಂತಹ ಸಮಸ್ಯೆ ತಡೆಯಲು ಟಿಕ್‌ಟಾಕ್ ಮುಂದಾಗಿದೆ.

ಬಳಕೆದಾರರಿಗೆ ಜನಜಾಗೃತಿ ಮೂಡಿಸಲು ಟಿಕ್‌ಟಾಕ್ ಕ್ರಮ ಕೈಗೊಳ್ಳಲಿದ್ದು, ಡಿಜಿಟಲ್ ಎಂಪವರ್‌ಮೆಂಟ್ ಫೌಂಡೇಶನ್ ಸಹಯೋಗದಲ್ಲಿ 10 ರಾಜ್ಯಗಳ ಪ್ರಮುಖ ನಗರಗಳಲ್ಲಿ ಮೊದಲ ಹಂತದಲ್ಲಿ ಕಾರ್ಯಾಗಾರ ಕೈಗೊಳ್ಳುವ ಮೂಲಕ ಅರಿವು ಮೂಡಿಸಲಿದೆ.

ಟಿಕ್‌ಟಾಕ್ ಬಳಕೆದಾರರು ಕೈಗೊಳ್ಳಬೇಕಾದ ಮುನ್ನೆಚ್ಚರಿಕೆ ಕ್ರಮಗಳು, ಅಪಾಯಕಾರಿ ತಾಣ ಮತ್ತು ಸಾಹಸ ಪ್ರದರ್ಶನಕ್ಕೆ ಮುಂದಾಗುವ ಮೊದಲು ಸೂಕ್ತ ಸಿದ್ಧತೆ, ಸುರಕ್ಷತಾ ಕ್ರಮಗಳ ಬಗ್ಗೆ ಟಿಕ್‌ಟಾಕ್ ತಿಳಿವಳಿಕೆ ಮೂಡಿಸಲಿದೆ.

ಟಿಕ್‌ಟಾಕ್ ವಿಡಿಯೋ ಮಾಡುವ ಸಂದರ್ಭ ಹಲವರು ಜೀವ ಕಳೆದುಕೊಂಡಿದ್ದಾರೆ. ಅಜಾಗರುಕತೆಯಿಂದ ವೀಡಿಯೋ ಚಿತ್ರೀಕರಿಸುವಾಗ ಅಪಘಾತ ಉಂಟಾಗಿ, ಕೈ ಕಾಲು ಮುರಿದಿರುವ ಹಲವು ಪ್ರಕರಣ ವರದಿಯಾಗಿದ್ದು, ಅಂತಹ ಸಮಸ್ಯೆಯಿಂದ ಪಾರಾಗಲು ಟಿಕ್‌ಟಾಕ್ ಸೂಕ್ತ ಕ್ರಮ ಕೈಗೊಳ್ಳಲಿದೆ.

ಟಿಕ್‌ಟಾಕ್‌ಗೆ ಈಗಾಗಲೇ ಸರಕಾರ ಮತ್ತು ನ್ಯಾಯಾಲಯ ಸೂಚನೆ ನೀಡಿದ್ದು, ಬಳಕೆದಾರರ ಸುರಕ್ಷತೆಗೆ ಕ್ರಮ ಕೈಗೊಳ್ಳಬೇಕು ಎಂದಿದೆ. ಹೀಗಾಗಿ ವಿವಿಧ ರೀತಿಯ ಕಾರ್ಯಕರ್ಮ, ಜಾಹೀರಾತು ಮೂಲಕ ಟಿಕ್‌ಟಾಕ್ ಎಚ್ಚರಿಕೆ ಸೂಚನೆ ನೀಡಲಿದೆ.