TRAI Rules: ಬರಲಿದೆ 11 ಅಂಕಿಗಳ ಮೊಬೈಲ್ ನಂಬರ್!

ದೇಶದಲ್ಲಿ ಹೊಸ ಫೋನ್ ನಂಬರ್ ಕ್ರಮ ಜಾರಿಗೆ ಬಂದರೆ, ಮುಂದಿನ ಸರಣಿಯಲ್ಲಿ ಈಗಿರುವ 10 ಅಂಕಿಗಳ ಬದಲಾಗಿ 11 ಅಂಕಿಗಳ ನಂಬರ್ ಇರಲಿದೆ.

ಭಾರತೀಯ ಟೆಲಿಕಾಂ ನಿಯಂತ್ರಣ ಪ್ರಾಧಿಕಾರ ಟ್ರಾಯ್ ಹೊಸ ನಂಬರ್ ವ್ಯವಸ್ಥೆ ಜಾರಿಗೆ ಕುರಿತಂತೆ ಚಿಂತನೆ ನಡೆಸಿದ್ದು, ಹೊಸ ಸಂಪರ್ಕ ಮತ್ತು ಮೊಬೈಲ್ ಸಂಖ್ಯೆಗೆ ಬೇಡಿಕೆ ಬರುತ್ತಿದ್ದು, ಅದನ್ನು ಪೂರೈಸಲು ಈ ಕ್ರಮಕ್ಕೆ ಮುಂದಾಗುತ್ತಿದೆ.

ಮೊಬೈಲ್ ಗ್ರಾಹಕರ ಬಳಕೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಜತೆಗೆ ಹಲವರು ಒಂದಕ್ಕಿಂತ ಹೆಚ್ಚಿನ ಸಂಖ್ಯೆಗಳನ್ನು ಹೊಂದುತ್ತಿರುವುದರಿಂದ ಸಮಸ್ಯೆಯಾಗುತ್ತಿದೆ. ಹೀಗಾಗಿ ಹೆಚ್ಚಿನ ಮೊಬೈಲ್ ಸಂಖ್ಯೆಗಳ ಅಗತ್ಯ ಎದುರಾಗಿದೆ. ಈ ಕುರಿತಾದ ಸಾಧ್ಯತೆ ಮತ್ತು ಆಯ್ಕೆಗಳನ್ನು ಪ್ರಸ್ತುತ ಟ್ರಾಯ್ ಪರಿಶೀಲಿಸುತ್ತಿದೆ.

9,8 ಮತ್ತು 7ರಿಂದ ಆರಂಭವಾಗುವ 10 ಅಂಕಿಗಳ ಸಂಖ್ಯೆಯನ್ನು ಬಳಸಿ, 210 ಕೋಟಿ ಮೊಬೈಲ್ ಸಂಖ್ಯೆ ವಿತರಿಸಲು ಸಾಧ್ಯವಿದೆ.
ಈಗಿರುವ ನಂಬರ್ ಹೊರತುಪಡಿಸಿ, 2050ರ ವೇಳೆಗೆ ಹೆಚ್ಚುವರಿ 260 ಕೋಟಿ ಮೊಬೈಲ್ ಸಂಖ್ಯೆಗಳ ಅವಶ್ಯಕತೆ ಬೀಳಲಿದೆ.

ಈ ಮೊದಲು 1993 ಮತ್ತು 2003ರಲ್ಲಿ ಟ್ರಾಯ್ ದೇಶದಲ್ಲಿ ನಂಬರ್ ಕ್ರಮವನ್ನು ಪರಿಷ್ಕರಿಸಿತ್ತು. 2003ರಲ್ಲಿ ಕೈಗೊಂಡ ನಂಬರ್ ಪರಿಷ್ಕರಣೆ ಕ್ರಮದಿಂದ 75 ಕೋಟಿ ಫೋನ್ ನಂಬರ್ ಸೃಷ್ಟಿಸಿದ್ದು, ಅದರಲ್ಲಿ 45 ಕೋಟಿ ಮೊಬೈಲ್ ಮತ್ತು 30 ಕೋಟಿ ನಂಬರ್‌ಗಳನ್ನು ಲ್ಯಾಂಡ್‌ಲೈನ್ ಸಂಪರ್ಕಕ್ಕೆ ನೀಡಲಾಗಿದೆ.

ಆದರೆ ಪ್ರಸ್ತುತ ಅತಿವೇಗದಲ್ಲಿ ಬೆಳೆಯುತ್ತಿರುವ ಮೊಬೈಲ್ ಮಾರುಕಟ್ಟೆಯ ಬೇಡಿಕೆ ಪೂರೈಸಲು ಹೊಸ ನಂಬರ್ ಚಲಾವಣೆಗೆ ತರುವುದು ಟ್ರಾಯ್‌ಗೆ ಅನಿವಾರ್ಯವಾಗಿದ್ದು, ಈ ಬಗ್ಗೆ ಟ್ರಾಯ್ ಕ್ರಮಕ್ಕೆ ಮುಂದಾಗಿದೆ. ಹೀಗಾಗಿ ಈಗಿರುವ 10 ಅಂಕಿ ಬದಲಿಗೆ, 11 ಅಂಕಿಗಳ ಮೊಬೈಲ್ ಸಂಖ್ಯೆ ಜಾರಿಗೆ ತರುವ ಪ್ರಸ್ತಾಪ ಟ್ರಾಯ್ ಮುಂದಿದೆ. ಜತೆಗೆ ಫಿಕ್ಸೆಡ್ ಲ್ಯಾಂಡ್‌ಲೈನ್ ಸಂಖ್ಯೆಯನ್ನು ಕೂಡ 10ಕ್ಕೆ ಏರಿಸುವ ಪ್ರಸ್ತಾಪವನ್ನು ಟ್ರಾಯ್ ಹೊಂದಿದ್ದು, ಡೇಟಾ ಒನ್ಲಿ ನಂಬರ್‌ಗಳನ್ನು ಕೂಡ ಈಗಿರುವ 10 ಅಂಕಿ ಬದಲಿಗೆ 13ಕ್ಕೆ ಏರಿಸುವ ಬಗ್ಗೆಯೂ ಚರ್ಚಿಸಲಾಗಿದೆ.