ನ್ಯೂ ಆಪ್‌: TrueCaller
ಬ್ಯಾಂಕ್‌ ಇರಲಿ, ಮತ್ಯಾವುದೇ ವ್ಯವಹಾರವಿರಲಿ, ಒನ್‌ ಟೈಮ್‌ ಪಾಸ್‌ವರ್ಡ್‌ ಬೇಕು. ಅಗತ್ಯ ವಿವರಗಳನ್ನು ನಮೂದಿಸಿ ಒಟಿಪಿಗೆ ಕಾಯುವುದು ದೊಡ್ಡ ಕಿರಿಕಿರಿ. ಅದು ಬಂದರೂ ಟೆಕ್ಸ್ಟ್‌ ಮೆಸೇಜ್‌ಗಳ ರಾಶಿಯಲ್ಲಿ ಸೇರಿಕೊಂಡಿರುವ ಒಟಿಪಿಯನ್ನು ಹುಡುಕುವುದು ಕಷ್ಟ. ಹತ್ತಾರು ಸಂಖ್ಯೆಗಳ ನಡುವೆ ತುಂಬ ಗೊಂದಲವಾಗುತ್ತದೆ.
ಟ್ರೂಕಾಲರ್‌ ಎನ್ನುವ ಆ್ಯಪ್‌ ಇಡೀ ಪ್ರಕ್ರಿಯೆಯನ್ನು ಸುಲಭ ಮಾಡಿಕೊಡುತ್ತದೆ. ಒಟಿಪಿಯನ್ನು ಹೈಲೈಟ್‌ ಮಾಡಿ ತೋರಿಸುತ್ತದೆ. ಈ ಆ್ಯಪ್‌ಅನ್ನು ನಿಮ್ಮ ಸ್ಮಾರ್ಟ್‌ ಫೋನ್‌ನಲ್ಲಿ ಅಳವಡಿಸಿಕೊಂಡರೆ ಹಲವು ಅನುಕೂಲಗಳಿವೆ. ನಿಮ್ಮ ಸಂಪರ್ಕಗಳು, ಕರೆ ಇತಿಹಾಸ, ಕಾಲ್‌ ಲಾಗ್ಸ್‌, ಬ್ಲ್ಯಾಕ್‌ ಲಿಸ್ಟ್‌, ಸೆಟ್ಟಿಂಗ್‌ ಆದ್ಯತೆಗಳು ಹೀಗೆ ಎಲ್ಲವನ್ನೂ ಬ್ಯಾಕ್‌ಅಪ್‌ನಲ್ಲಿ ಶೇಖರಿಸಿಡಲು ಇದು ಸಹಕಾರಿ.
ನಿಮಗೆ ಯಾರದ್ದೋ ಕರೆ ಬಂದಿರುತ್ತದೆ, ಆ ಹೆಸರು ನಿಮ್ಮ ಸಂಪರ್ಕ ವಿಳಾಸದಲ್ಲಿ ನಮೂದಾಗಿರುವುದಿಲ್ಲ. ಕೇವಲ ಸಂಖ್ಯೆ ಮಾತ್ರ ಕಾಣಿಸುತ್ತದೆ. ಯಾರದಿದು ನಂಬರ್‌ ಎಂದು ತಲೆ ಕೆರೆದುಕೊಳ್ಳುವಂತಾಗುತ್ತದೆ ಅಲ್ಲವೇ? ಟ್ರೂ ಕಾಲರ್‌ ಹಾಕಿಕೊಂಡರೆ ಈ ನಂಬರ್‌ನವರ ಜತೆ ನೀವು ಹಿಂದೆ ಸಂವಾದ ಮಾಡಿದ ವಿವರಗಳು ಲಭ್ಯವಾಗುತ್ತದೆ; ಅವರು ಯಾರು ಎಂಬುದನ್ನು ಕಂಡುಕೊಳ್ಳಲು ಕ್ಲೂ ಸಿಗುತ್ತದೆ.
ಇದರಲ್ಲಿ ಸ್ಪ್ಯಾಮ್‌ ಫೋಲ್ಡ್‌ ಇದ್ದು,ವಿವಿಧ ಗ್ರಾಹಕ ವಸ್ತುಗಳ ಪ್ರಚಾರ, ಮಾರಾಟದ ಸಂದೇಶಗಳು ಇಲ್ಲಿ ಬಂದು ನೆಲೆಯಾಗುತ್ತವೆ. ಇದರಿಂದ ನಿಮಗೆ ಅಗತ್ಯವಾದ ಮೆಸೇಜ್‌ಗಳ ನಡುವೆ ಬಂದು ಎಲ್ಲ ಸ್ಥಳವನ್ನು ಆಕ್ರಮಿಸಿಕೊಂಡು ಬೇಕಾದುದರ ಆಯ್ಕೆಗೆ ತಡೆಯಾಗುವ ಕಿರಿಕಿರಿ ಇಲ್ಲವಾಗುತ್ತದೆ.