Zomato, UberEats ಗೆ ಟ್ವೀಟಿಗರ ಬಹಿಷ್ಕಾರ ಯಾಕೆ ಗೊತ್ತೇ?

ಬೆಂಗಳೂರು: ಹಿಂದೂಯೇತರ ವ್ಯಕ್ತಿಯು ಆಹಾರ ಡೆಲಿವರಿ ಮಾಡಿದರೆಂಬ ಕಾರಣಕ್ಕೆ, ಗ್ರಾಹಕನೊಬ್ಬ ಆಹಾರವನ್ನೇ ನಿರಾಕರಿಸಿ ಸುದ್ದಿ ಮಾಡಿದ್ದು, ಆಹಾರಕ್ಕೆ ಧರ್ಮ ಇಲ್ಲ ಎಂದು ಜೊಮ್ಯಾಟೋ ಎಂಬ ಫುಡ್ ಡೆಲಿವರಿ ಆ್ಯಪ್ ಪ್ರತ್ಯುತ್ತರ ನೀಡಿದ್ದು ಕಳೆದೆರಡು ದಿನಗಳಿಂದ ಆನ್‌ಲೈನ್‌ನಲ್ಲಿ ಭಾರಿ ಸುದ್ದಿಯಾಗಿದೆ.

ಈ ಜಟಾಪಟಿಯ ಮುಂದುವರಿದ ಭಾಗವಾಗಿ, ಆಹಾರಕ್ಕೆ ಧರ್ಮ ಇಲ್ಲ ಎಂದಾದರೆ, ಹಲಾಲ್ ಮಾಂಸವೇ ಬೇಕೆಂದು ಕೇಳುವ ಗ್ರಾಹಕರಿಗೆ ಅದರ ಟ್ಯಾಗ್‌ನೊಂದಿಗೆ ವಿತರಿಸುತ್ತಿಲ್ಲವೇ ಎಂದು ಟ್ವಿಟರ್‌ನಲ್ಲಿ ಪ್ರಶ್ನಿಸತೊಡಗಿದ್ದಾರೆ. ಇದಕ್ಕೆ ಜೊಮ್ಯಾಟೋ ಸಮಜಾಯಿಷಿ ನೀಡಿದ್ದು, ಕೆಲವು ರೆಸ್ಟೋರೆಂಟ್‌ಗಳು ತಮ್ಮ ವಿಶೇಷ ಖಾದ್ಯವನ್ನು ಪ್ರಚುರಪಡಿಸಲು ಈ ರೀತಿ ಒತ್ತಾಯಿಸಿದ ಪರಿಣಾಮ ಆ್ಯಪ್‌ನಲ್ಲಿ ಹಲಾಲ್ ಟ್ಯಾಗ್ ಇದೆ ಎಂದು ಹೇಳಿದೆ.
ಈ ಜಟಾಪಟಿಯ ನಡುವೆ ಹಲವಾರು ಗ್ರಾಹಕರು ಗೂಗಲ್ ಪ್ಲೇ ಹಾಗೂ ಐಒಎಸ್ ಆ್ಯಪ್ ಸ್ಟೋರ್‌ನಲ್ಲಿ ಜೊಮ್ಯಾಟೋ ಆ್ಯಪ್‌ಗೆ ಒಂದು ಸ್ಟಾರ್ ರೇಟಿಂಗ್ ನೀಡಿದ್ದಾರೆ ಮತ್ತು ಕೆಲವರಂತೂ ಅದನ್ನು ಅನ್ಇನ್‌ಸ್ಟಾಲ್ ಮಾಡಿಕೊಳ್ಳತೊಡಗಿದ್ದಾರೆ.


ಈ ಕಾರಣಕ್ಕಾಗಿ ಗುರುವಾರ ಟ್ವಿಟರ್‌ನಲ್ಲಿ #ZomatoUninstalled ಎಂಬ ಹ್ಯಾಶ್‌ಟ್ಯಾಗ್ ನಂ.1 ಸ್ಥಾನದಲ್ಲಿ ಟ್ರೆಂಡ್ ಆಗಿತ್ತು. ಇಷ್ಟೇ ಆದರೆ ಪರವಾಗಿರಲಿಲ್ಲ, ಜತೆಗೆ ಉಬರ್‌ಈಟ್ಸ್ ಎಂಬ ಆ್ಯಪ್, ಜೊಮ್ಯಾಟೋಗೆ ಬೆಂಬಲ ನೀಡಿದ್ದಕ್ಕಾಗಿ #BoycottUberEats ಎಂಬ ಹ್ಯಾಶ್ ಟ್ಯಾಗ್ ಕೂಡ ಟ್ರೆಂಡ್ ಆಗಿಬಿಟ್ಟಿದೆ.


ಆಗಿದ್ದಿಷ್ಟು: ಆನ್‌ಲೈನ್ ಆಹಾರ ವಿತರಣಾ ಆ್ಯಪ್ ಜೊಮ್ಯಾಟೋ ಮೂಲಕ ಗ್ರಾಹಕರೊಬ್ಬರು, ಟ್ವಿಟರ್‌ನಲ್ಲಿ ಬರೆದುಕೊಂಡಿದ್ದರು. ಒಟ್ಟರ್ಥವೆಂದರೆ, "ಹಿಂದುಯೇತರ ವ್ಯಕ್ತಿಯ ಮೂಲಕ ಆಹಾರ ಕಳಿಸಿದ್ದಾರೆ, ನಾನದನ್ನು ಸ್ವೀಕರಿಸುತ್ತಿಲ್ಲ. ಆರ್ಡರ್ ರದ್ದುಪಡಿಸಲು ಕೋರಿದಾಗ, ಹಣ ಮರುಪಾವತಿಯಾಗುವುದಿಲ್ಲ ಎಂದಿದ್ದಾರೆ. ಆಹಾರ ತೆಗೆದುಕೊಳ್ಳಲು ಬಲವಂತ ಮಾಡುವಂತಿಲ್ಲ ಎಂಬ ಕಾರಣಕ್ಕೆ ನನಗೆ ರೀಫಂಡ್ ಬೇಡ, ನನ್ನ ಆರ್ಡರ್ ರದ್ದುಪಡಿಸಿ" ಎಂದು ಆತ ಬರೆದುಕೊಂಡಿದ್ದರು.


ಇದಕ್ಕೆ ಉತ್ತರಿಸಿರುವ ಜೊಮ್ಯಾಟೋ, ಆಹಾರಕ್ಕೆ ಯಾವುದೇ ಧರ್ಮವಿಲ್ಲ. ಆಹಾರವೇ ಧರ್ಮ ಎಂದು ಟ್ವೀಟ್ ಮಾಡಿತ್ತು. ಇದಕ್ಕೆ ಪ್ರತಿಯಾಗಿ ಟ್ವಿಟರ್ ಬಳಕೆದಾರರು, ಜೊಮ್ಯಾಟೋದ ಲಿಂಕ್ ಸಹಿತವಾಗಿ, '98 ಬೆಸ್ಟ್ ಹಲಾಲ್ ರೆಸ್ಟೋರೆಂಟ್‌ಗಳು' ಎಂದು ಬರೆದಿರುವುದನ್ನು ಎತ್ತಿ ತೋರಿಸಿ, ಹಾಗಿದ್ದರೆ ಇದು ಆಹಾರಕ್ಕೆ ಧರ್ಮ ಇಲ್ಲ ಎಂದಾಗುತ್ತದೆಯೇ ಎಂದು ಪ್ರಶ್ನಿಸಿದ್ದರು.

ಇದಂತೂ ಟ್ವಿಟರ್‌ನಲ್ಲಿ ಭಾರಿ ಪರ-ವಿರೋಧ ಚರ್ಚೆಗೆ ಗ್ರಾಸವಾಗಿತ್ತು. ಕೆರಳಿದ ನೆಟ್ಟಿಗರು ಜೊಮ್ಯಾಟೋ ವಿರುದ್ಧ ಮುಗಿಬಿದ್ದು, ಆ್ಯಪ್ ಅನ್‌ಇನ್‌ಸ್ಟಾಲ್ ಮಾಡತೊಡಗಿದರು ಮತ್ತು ಕೆಲವರು 1 ಸ್ಟಾರ್ ರೇಟಿಂಗ್ ನೀಡಿ, ಅದರ ಮೌಲ್ಯ ತಗ್ಗಿಸಲು ಪಣ ತೊಟ್ಟರು.


ಈ ಮಧ್ಯೆ, ಉಬರ್ ಎಂಬ ವಾಹನ ಪೂರೈಕೆ ಆ್ಯಪ್‌ನ ಭಾಗವಾಗಿರುವ ಉಬರ್‌ಈಟ್ಸ್ ಕೂಡ ಜೊಮ್ಯಾಟೋವನ್ನು ಬೆಂಬಲಿಸಿತು. ನೆಟ್ಟಿಗರ ಆಕ್ರೋಶ ಅದರತ್ತ ತಿರುಗಿ, ಉಬರ್‌ಈಟ್ಸ್ ಅನ್ನೂ ಬಹಿಷ್ಕರಿಸಿ ಎಂಬ ಕರೆಯೊಂದಿಗೆ ಹ್ಯಾಶ್‌ಟ್ಯಾಗ್ ಮೂಲಕ ತಮ್ಮ ಆಕ್ರೋಶದ ಕರೆಯನ್ನು ಟ್ರೆಂಡ್ ಮಾಡತೊಡಗಿದರು.