ಟ್ವಿಟರ್​ ಸುಪರ್ ಫಾಲೋಸ್​ ಫೀಚರ್​; ಟ್ವಿಟರ್​ನಲ್ಲಿ ಹಣ ಸಂಪಾದನೆಯ ಹೊಸ ಮಾರ್ಗ

ಟ್ವಿಟರ್ ಶೀಘ್ರದಲ್ಲೇ ಹೊಸ ಫೀಚರ್ ಒಂದನ್ನು ಪರಿಚಯಿಸಲಿದ್ದು, ಈ ಫೀಚರ್ ಮೂಲಕ 10 ಸಾವಿರಕ್ಕೂ ಹೆಚ್ಚು ಫಾಲೋವರ್ಸ್ ಹೊಂದಿರುವ ಖಾತೆದಾರರು, ತಮ್ಮ ಫಾಲೋವರ್ಸ್ ಕಂಟೆಂಟ್ ನೋಡಲು ಅವರಿಂದ ಶುಲ್ಕ ಪಡೆದುಕೊಳ್ಳಬಹುದಾಗಿದೆ. ಕಳೆದ ಫೆಬ್ರವರಿಯಲ್ಲೇ ಈ ಫೀಚರ್ ಬಗ್ಗೆ ಟ್ವಿಟರ್ ಹೇಳಿಕೊಂಡಿತ್ತು. ಸುಪರ್ ಫಾಲೋಸ್ ಫೀಚರ್ ಹೇಗಿರಬಹುದು ಎಂಬ ಬಗ್ಗೆ ಈಗ ಮಾಹಿತಿಗಳು ಬಹಿರಂಗವಾಗಿವೆ.

ರಿವರ್ಸ್ ಎಂಜಿನಿಯರ್ ಜೇನ್ ಮಾಂಚುನ್ ವಾಂಗ್ ಎಂಬುವರು ಸುಪರ್ ಫಾಲೋಸ್ ಹೇಗಿಬಹುದೆಂಬುದನ್ನು ವಿಶ್ಲೇಷಿಸಿದ್ದಾರೆ. ತಾವು ಫಾಲೋ ಮಾಡುವ ಖಾತೆಯಿಂದ ಹೆಚ್ಚುವರಿ ಕಂಟೆಂಟ್ ಪಡೆಯಲು ಟ್ವಿಟರ್ ಬಳಕೆದಾರರು ಶುಲ್ಕ ಪಾವತಿ ಮಾಡುವ ‘ಸುಪರ್ ಫಾಲೋವರ್ಸ್’ ಫೀಚರ್ ಅನ್ನು ಟ್ವಿಟರ್ ಶೀಘ್ರದಲ್ಲೇ ಪರಿಚಯಿಸಲಿದೆ ಎಂದು ವಾಂಗ್ ತಿಳಿಸಿದ್ದಾರೆ.

“ಸುಪರ್ ಫಾಲೋಸ್ ಅಪ್ಲಿಕೇಶನ್ ಪರಿಚಯಿಸಲು ಟ್ವಿಟರ್ ಕೆಲಸ ಮಾಡುತ್ತಿದೆ. ಕನಿಷ್ಠ 10 ಸಾವಿರ ಫಾಲೋವರ್ಸ್ ಹೊಂದಿರುವ, ಕಳೆದ 30 ದಿನಗಳ ಅವಧಿಯಲ್ಲಿ ಕನಿಷ್ಠ 25 ಟ್ವೀಟ್ ಪೋಸ್ಟ್ ಮಾಡಿರುವ ಹಾಗೂ ಕನಿಷ್ಠ 18 ವರ್ಷ ವಯಸ್ಸಾಗಿರುವ ಟ್ವಿಟರ್ ಖಾತೆದಾರರು ಸುಪರ್ ಫಾಲೋಸ್ ಆ್ಯಕ್ಟಿವೇಟ್ ಮಾಡಲು ಅರ್ಹರಾಗಿರುತ್ತಾರೆ. ಇನ್ನು ಸುಪರ್ ಫಾಲೋಸ್ ಬಳಕೆದಾರರು ಆಯ್ಕೆ ಮಾಡಲು ವಿವಿಧ ಕಂಟೆಂಟ್ಗಳ ಪಟ್ಟಿಯೊಂದನ್ನು ಟ್ವಿಟರ್ ತಯಾರಿಸಿದೆ. ವಯಸ್ಕರ ಕಂಟೆಂಟ್ ಹಾಗೂ ಓನ್ಲಿ ಫ್ಯಾನ್ಸ್ ಈ ಕ್ಯಾಟೆಗರಿಗಳೂ ಅದರಲ್ಲಿವೆ.” ಎಂದು ವಾಂಗ್ ಟ್ವಿಟರ್ ಪೋಸ್ಟ್ ಒಂದರಲ್ಲಿ ಬರೆದಿದ್ದಾರೆ.

ಸುಪರ್ ಫಾಲೋಸ್ ಎಂಬುದು ಟ್ವಿಟರ್ ಬಳಕೆದಾರರು ತಮ್ಮ ಫಾಲೋವರ್ಸ್ಗಳಿಗೆ ಬೋನಸ್ ಟ್ವೀಟ್ ಒಳಗೊಂಡಂತೆ ಹೆಚ್ಚುವರಿ ಕಂಟೆಂಟ್ ನೀಡುವ, ಕಮ್ಯುನಿಟಿ ಗ್ರೂಪ್ಗೆ ಪ್ರವೇಶ ನೀಡುವ, ನ್ಯೂಸ್ ಲೆಟರ್ ಸಬ್ಸ್ಕ್ರಿಪ್ಷನ್ ನೀಡುವ ಅಥವಾ ಯೂಸರ್ ಸಪೋರ್ಟ್ ಬ್ಯಾಜ್ ನೀಡುವ ಅವಕಾಶವಿದ್ದು, ಇದರಲ್ಲಿ ಯಾವುದನ್ನಾದರೂ ಪಡೆಯ ಬಯಸುವ ತಮ್ಮ ಫಾಲೋವರ್ಸ್ಗಳಿಂದ ಶುಲ್ಕ ಆಕರಿಸುವ ಫೀಚರ್ ಆಗಿದೆ.

ಈ ಬಗ್ಗೆ ಉದಾಹರಣೆ ನೀಡುವ ಸ್ಕ್ರೀನಶಾಟ್ ಒಂದನ್ನು ಟ್ವಿಟರ್ ಹಂಚಿಕೊಂಡಿದ್ದು, ಈ ಸೇವೆಗಳಿಗೆ ಪ್ರತಿತಿಂಗಳು 4.99 ಡಾಲರ್ ಶುಲ್ಕವಿರುವ ಬಗ್ಗೆ ತಿಳಿಸಲಾಗಿದೆ.

ಸುಪರ್ ಫಾಲೋಸ್ ಬಳಕೆದಾರರ ಪ್ರೊಫೈಲ್ ಪೇಜ್ ಒಂದರ ಯೂಸರ್ ಇಂಟರಫೇಸ್ ಒಂದನ್ನು ಮೇ ತಿಂಗಳಲ್ಲಿ ವಾಂಗ್ ಶೇರ್ ಮಾಡಿದ್ದರು. ಇದರಲ್ಲಿ ಸುಪರ್ ಫಾಲೋ ಬಟನ್ ಎರಡು ರೀತಿಗಳಲ್ಲಿ ಇರಬಹುದು ಎಂದು ಕಂಡುಬಂದಿತ್ತು. ಟ್ವಿಟರ್ ಈಗಾಗಲೇ ಕ್ಯಾಶ್ ಜಾರ್ಗಾಗಿ ಕ್ಯಾಶ್ ಟಿಪ್ಪಿಂಗ್ ‘ಕ್ಯಾಶ್ ಬಟನ್’ ಅನ್ನು ಕೆಲ ಬಳಕೆದಾರರಿಗಾಗಿ ಪರಿಚಯಿಸುತ್ತಿದೆ. ಅಲ್ಲದೆ ಈ ಪ್ರೊಫೈಲ್ಗಳಿಗೆ ಹೆಚ್ಚಾಗಿ ಮೊನೊಕ್ರೊಮ್ ವರ್ಣಗಳನ್ನು ಟ್ವಿಟರ್ ಜಾರಿಗೊಳಿಸುತ್ತಿದ್ದು, ಇದರಲ್ಲಿ ಚಿರ್ಪ್ ಫಾಂಟ್ ಬಳಸುತ್ತಿದೆ.

ತನ್ನ ಪ್ಲಾಟ್ಫಾರ್ಮ್ ಅನ್ನು ಹಣಕಾಸಿನ ಗಳಿಕೆಗಾಗಿ ಮಾರ್ಪಡಿಸಲು ಟ್ವಿಟರ್ ಕಳೆದ ಕೆಲ ತಿಂಗಳುಗಳಿಂದ ಕ್ರಿಯಾಶೀಲವಾಗಿತ್ತು. ಸದ್ಯದಲ್ಲೇ ಟ್ವಿಟರ್ ಬ್ಲ್ಯೂ ಎಂಬ ಹೊಸ ಫೀಚರ್ ಕೂಡ ಬರಲಿದ್ದು, ಇದು ಅಮೆರಿಕದ ಬಳಕೆದಾರರಿಗೆ ಆರಂಭದಲ್ಲಿ ಸಿಗಲಿದೆ. ನಂತರ ಭಾರತೀಯ ಬಳಕೆದಾರರಿಗೆ ಲಭ್ಯವಾಗಲಿದ್ದು, ಇದಕ್ಕಾಗಿ 269 ರೂಪಾಯಿ ಶುಲ್ಕ ವಿಧಿಸಲಾಗುವುದು ಎಂದು ತಿಳಿದುಬಂದಿದೆ.