WhatsApp: ಸುಳ್ಳುಸುದ್ದಿ ತಡೆಯುವ ಯತ್ನದಲ್ಲಿ ವಾಟ್ಸಪ್

ಚುನಾವಣೆಗೆ ದೇಶವೇ ಸಜ್ಜಾಗುತ್ತಿರುವ ಹೊತ್ತಲ್ಲಿ, ಜನರ ಮೇಲೆ ವಿವಿಧ ರೀತಿಯ ಸುದ್ದಿಗಳು ಪ್ರಭಾವ ಬೀರುತ್ತವೆ. ಸುಳ್ಳುಸುದ್ದಿ ಮತ್ತು ನಕಲಿ ಸುದ್ದಿಗಳು ಸಾಮಾಜಿಕ ಶಾಂತಿಭಂಗಕ್ಕೂ ಕಾರಣವಾಗುತ್ತವೆ. ಹೀಗಿರುವಾಗ ಅಂತಹ ಸಮಸ್ಯೆ ತಡೆಯಲು ವಾಟ್ಸಪ್ ಮುಂದಾಗಿದ್ದು, ಮುಂಬರುವ ಅಪ್‌ಡೇಟ್‌ನಲ್ಲಿ ಹೊಸ ಆಯ್ಕೆ ಪರಿಚಯಿಸಲು ಸಿದ್ಧತೆ ನಡೆಸಿದೆ.

ಒಂದು ಸಂದೇಶವನ್ನು ಒಬ್ಬರು ಎಷ್ಟು ಬಾರಿ ಫಾರ್‌ವರ್ಡ್‌ ಮಾಡಿದ್ದಾರೆ ಎಂಬ ಕುರಿತು ಪ್ರತಿ ಸಂದೇಶದಲ್ಲಿ ವಿವರ ದೊರೆಯಲಿದೆ.

ವಾಟ್ಸಪ್ ಪೀಚರ್‌ ಮತ್ತು ಅಪ್‌ಡೇಟ್‌ಗಳ ಕುರಿತು ವಿವರ ನೀಡುವ ವಾಟ್ಸಪ್ ಬೇಟಾ ಇನ್ಫೋ ಈ ಕುರಿತು ವರದಿ ಪ್ರಕಟಿಸಿದ್ದು, ಪ್ರಸ್ತುತ ಲಭ್ಯವಿರುವ ಬೇಟಾ ಟೆಸ್ಟಿಂಗ್ ಆವೃತ್ತಿಯಲ್ಲಿ ವಾಟ್ಸಪ್ ಈ ಕುರಿತ ಆಯ್ಕೆಯನ್ನು ಪರಿಶೀಲಿಸುತ್ತಿದೆ.


ಒಂದೇ ಸಂದೇಶ ಹಲವು ಬಾರಿ ಫಾರ್‌ವರ್ಡ್‌ ಆಗಿದ್ದರೆ, ಸಂದೇಶದ ಕುರಿತ ಇನ್ಫೋದಲ್ಲಿ ಫಾರ್‌ವರ್ಡಿಂಗ್‌ ಇನ್ಫೋ ಮತ್ತು ಫ್ರೀಕ್ವೆಂಟ್ಲಿ ಫಾರ್‌ವರ್ಡೆಡ್‌ ಎಂಬ ಕುರಿತು ಮಾಹಿತಿ ಇರಲಿದೆ.

ಜತೆಗೆ ಈಗಾಗಲೇ ಫಾರ್‌ವರ್ಡೆಡ್‌ ಸಂದೇಶದಲ್ಲಿ ಮೇಲ್ಗಡೆ ಫಾರ್‌ವರ್ಡೆಡ್‌ ಎಂಬ ಟ್ಯಾಗ್ ಕಾಣಿಸಿಕೊಳ್ಳುತ್ತಿದೆ. ನೂತನ ಫೀಚರ್ ಬಳಕೆದಾರರಿಗೆ ಯಾವಾಗ ಲಭ್ಯವಾಗಲಿದೆ ಎಂದು ವಾಟ್ಸಪ್ ತಿಳಿಸಿಲ್ಲ.