ಅಮೆರಿಕನ್ ಸೇನೆಯ ಈ ಡ್ರೋನ್ ಕಣ್ಣಿಂದ ಶತ್ರು ತಪ್ಪಿಸಿಕೊಳ್ಳಲು ಸಾಧ್ಯವೇ ಇಲ್ಲ!

ಡ್ರೋನ್ ಆವಿಷ್ಕಾರದಿಂದ ವಿವಿಧ ಕೆಲಸ ಕಾರ್ಯಗಳು ಜನರಿಗೆ ಅನುಕೂಲ ಮಾಡಿಕೊಟ್ಟಿವೆ. ಸೇನೆಯಲ್ಲೂ ಡ್ರೋನ್ ಬಳಕೆಯಾಗುತ್ತದೆ. ಆದರೆ ಅಮೆರಿಕನ್ ಸೇನೆ ಬಳಿ ಇರುವ 6 ಇಂಚು ಗಾತ್ರದ ಪುಟ್ಟ ಡ್ರೋನ್ ಕಣ್ಣಿಂದ ಮಾತ್ರ ಶತ್ರುಗಳು ಯಾವುದೇ ಕಾರಣಕ್ಕೂ ತಪ್ಪಿಸಿಕೊಳ್ಳುವಂತಿಲ್ಲ.

ಯುದ್ಧಭೂಮಿಯಲ್ಲಿ ಸೈನಿಕರ ಜೀವ ಅಮೂಲ್ಯ, ಹಾಗೆಯೇ ಶತ್ರುಗಳನ್ನು ನಿಯಂತ್ರಿಸುವುದು ಕೂಡ ಪ್ರಮುಖವಾಗಿರುತ್ತದೆ. ಅದಕ್ಕಾಗಿಯೇ ಅಮೆರಿಕ ಸೇನೆ ಒರೆಗಾನ್ ಮೂಲದ ಎಫ್ಎಲ್‌ಐಆರ್‌ ಸಿಸ್ಟಮ್ಸ್ ಮೂಲಕ ಬ್ಲ್ಯಾಕ್ ಹಾರ್ನೆಟ್ ಹೆಸರಿನ ಅತ್ಯಂತ ಚಿಕ್ಕ ಡ್ರೋನ್ ಅನ್ನು ಬಳಸುತ್ತಿದೆ.


ಗುಪ್ತಚರ ಉದ್ದೇಶಕ್ಕೆ ಬಳಕೆಯಾಗುವ ಈ ಪುಟ್ಟ ಡ್ರೋನ್ ಅಸಾಧಾರಣ ಶಕ್ತಿ ಹೊಂದಿದೆ. ಕೇವಲ 33 ಗ್ರಾಂ ತೂಕದ ಬ್ಲ್ಯಾಕ್ ಹಾರ್ನೆಟ್‌ ಒಂದು ಬಾರಿ ಚಾರ್ಜ್ ಮಾಡಿದರೆ 25 ನಿಮಿಷ ಹಾರಾಟ ನಡೆಸಬಲ್ಲದು. ಗಂಟೆಗೆ 21.48 ಕಿಮೀ. ವೇಗ ಹೊಂದಿರುವ ಈ ಡ್ರೋನ್, ಎಚ್‌ಡಿ ಫೋಟೋ ತೆಗೆಯುತ್ತದೆ.

ಅಲ್ಲದೆ ಲೈವ್ ವಿಡಿಯೋವನ್ನು ಎನ್‌ಕ್ರಿಪ್ಟೆಡ್ ಸಿಗ್ನಲ್ ಮೂಲಕ ಕಂಟ್ರೋಲ್ ಸ್ಟೇಶನ್‌ಗೆ ಕಳುಹಿಸುತ್ತದೆ. ಪ್ರತಿಕೂಲ ಹವಾಮಾನದಲ್ಲೂ ಕಾರ್ಯವೆಸಗುವ ಬ್ಲ್ಯಾಕ್ ಹಾರ್ನೆಟ್, ಜಿಪಿಎಸ್, ಮತ್ತಿತರ ಅತ್ಯಾಧುನಿಕ ಸೌಲಭ್ಯ ಹೊಂದಿದೆ.

ಕೇವಲ ಯುದ್ಧಭೂಮಿಯಲ್ಲಿ ಮಾತ್ರವಲ್ಲದೆ, ಪ್ರಾಕೃತಿಕ ವಿಕೋಪದ ಸಂದರ್ಭದಲ್ಲೂ ಈ ಡ್ರೋನ್ ಉಪಕಾರಿಯಾಗಿದೆ.