Digital Credit Card: ಅಮೆರಿಕದಲ್ಲಿ ಲಭ್ಯ ಆ್ಯಪಲ್ ಕಾರ್ಡ್

ಟೆಕ್‌ ಲೋಕದ ದಿಗ್ಗಜ ಆ್ಯಪಲ್ ಇದೇ ಮೊದಲ ಬಾರಿಗೆ ವರ್ಚುವಲ್ ಕ್ರೆಡಿಟ್ ಕಾರ್ಡ್ ಅನ್ನು ಬಳಕೆದಾರರಿಗೆ ಬಿಡುಗಡೆ ಮಾಡಿದೆ.

ಆ್ಯಪಲ್ ಕಾರ್ಡ್‌ಗೆ ಯಾವುದೇ ಶುಲ್ಕವಿರುವುದಿಲ್ಲ, ಯಾವುದೇ ಕಾರ್ಡ್ ಸಂಖ್ಯೆ, ಸಿವಿವಿ ಸೆಕ್ಯೂರಿಟಿ ಕೋಡ್, ವ್ಯಾಲಿಡಿಟಿ ಮುಕ್ತಾಯದ ದಿನಾಂಕ ಅಥವಾ ಸಹಿ ಇಲ್ಲದ ಕಾರ್ಡ್ ಇದಾಗಿದ್ದು, ಬಳಕೆದಾರರಿಗೆ ಇತರ ಯಾವುದೇ ಕ್ರೆಡಿಟ್ ಕಾರ್ಡ್‌ಗಿಂತ ಹೆಚ್ಚಿನ ಭದ್ರತೆ ಮತ್ತು ಸುರಕ್ಷತೆ ಇರುವ ಕಾರ್ಡ್ ಇದಾಗಿದೆ.

ಗೋಲ್ಡ್‌ಮನ್ ಸ್ಯಾಕ್ಸ್ ಆ್ಯಪಲ್ ಕ್ರೆಡಿಟ್ ಕಾರ್ಡ್ ಸೇವೆ ನೀಡುವ ಸಂಸ್ಥೆಯಾಗಿದ್ದು, ಮಾಸ್ಟರ್‌ಕಾರ್ಡ್ ಮೂಲಕ ಜಾಗತಿಕ ಪೇಮೆಂಟ್ ನೆಟ್‌ವರ್ಕ್ ಬಳಸಲಿದೆ.

ಐಫೋನ್‌ನ ವ್ಯಾಲೆಟ್ ಆ್ಯಪ್‌ ಮೂಲಕ ಆ್ಯಪಲ್ ಕ್ರೆಡಿಟ್ ಕಾರ್ಡ್‌ಗೆ ಅಪ್ಲೈ ಮಾಡಬಹುದಾಗಿದ್ದು, ನೋಂದಣಿ ಬಳಿಕ ತಕ್ಷಣವೇ ಬಳಕೆಗೆ ಲಭ್ಯವಾಗಲಿದೆ.

ಆ್ಯಪಲ್ ಡಿಜಿಟಲ್ ಕ್ರೆಡಿಟ್ ಕಾರ್ಡ್‌ಗೆ ಅಮೆರಿಕದಲ್ಲಿ ಭಾರಿ ಬೇಡಿಕೆ ಕಂಡುಬಂದಿದ್ದು, ಶೀಘ್ರದಲ್ಲೇ ಇತರ ದೇಶಗಳಲ್ಲೂ ಸೇವೆ ದೊರೆಯಲಿದೆ.

ಆ್ಯಪಲ್ ಕಾರ್ಡ್ ರಿವಾರ್ಡ್ ಯೋಜನೆಯಡಿ ಗ್ರಾಹಕರಿಗೆ ಡೈಲಿ ಕ್ಯಾಶ್‌ ದೊರೆಯಲಿದೆ. ಪ್ರತಿ ಬಾರಿ ಆ್ಯಪಲ್ ಕಾರ್ಡ್ ಬಳಸಿ ಪಾವತಿ ಮಾಡಿದಾಗಲೂ ಕನಿಷ್ಠ ಶೇ. 2 ಡೈಲಿ ಕ್ಯಾಶ್‌ಬ್ಯಾಕ್ ಲಭ್ಯವಾಗುತ್ತದೆ. ಎಲ್ಲ ರೀತಿಯ ಖರೀದಿಗೂ ಆ್ಯಪಲ್ ಕಾರ್ಡ್ ಬಳಸಬಹುದಾಗಿದ್ದು, ಶೀಘ್ರವೇ ಮತ್ತಷ್ಟು ಆ್ಯಪ್ ಮತ್ತು ಸೇವೆಗಳನ್ನು ಆ್ಯಪಲ್ ತನ್ನ ನೆಟ್‌ವರ್ಕ್‌ನಲ್ಲಿ ಒಳಗೊಳ್ಳಲಿದೆ.

ಪ್ರತಿ ವಾರ ಮತ್ತು ತಿಂಗಳು ಆ್ಯಪಲ್ ವ್ಯಾಲೆಟ್ ಆ್ಯಪ್ ಮೂಲಕ ವರದಿ ನೀಡಿ, ಗ್ರಾಹಕರ ಖರೀದಿ, ಕಾರ್ಡ್ ಬಳಕೆಯ ವಿವರ ನೀಡಲಿದೆ. ಅದರೆ ಗರಿಷ್ಠ ಭದ್ರತೆ ಮತ್ತು ಸುರಕ್ಷತೆ ಇರುವ ಕಾರ್ಡ್ ಇದಾಗಿದ್ದು, ಆ್ಯಪಲ್‌ಗೆ ಗ್ರಾಹಕರು ಕಾರ್ಡ್ ಬಳಸಿ ಏನು ಖರೀದಿಸಿದ್ದಾರೆ ಮತ್ತು ಎಂಬೆಲ್ಲ ವಿವರ ಆ್ಯಪಲ್‌ಗೆ ಲಭ್ಯವಾಗುವುದಿಲ್ಲ.