Whatsapp: ವದಂತಿ ಹಬ್ಬಿಸುವ ಖಾತೆ ಬ್ಲಾಕ್‌

ಹೊಸದಿಲ್ಲಿ: ಚುನಾವಣೆಗೆ ಸಂಬಂಧಿಸಿ ವಾಟ್ಸಪ್ ಮೂಲಕ ಸುಳ್ಳು ಸುದ್ದಿ, ಪ್ರಚೋದನಕಾರಿ ಸಂಗತಿ, ವದಂತಿಗಳನ್ನು ಹರಡಿಸುತ್ತಿರುವವರನ್ನು ನಿಯಂತ್ರಿಸಲು ಕ್ರಮ ಆರಂಭವಾಗಿದೆ. ವಾಟ್ಸಪ್ ತನ್ನ ಮೆಸೇಜಿಂಗ್‌ ಸರ್ವಿಸ್‌ನಲ್ಲಿ ಸುಳ್ಳು ಸುದ್ದಿ, ವದಂತಿಗಳನ್ನು ಹರಡುತ್ತಿರುವವರ ಮೊಬೈಲ್‌ ಸಂಖ್ಯೆಯನ್ನು ಬ್ಲಾಕ್‌ ಮಾಡುವುದು ಅಥವಾ ಚಾಟ್ಸ್‌ ವ್ಯವಸ್ಥೆಯನ್ನು ನಿಷ್ಕ್ರಿಯಗೊಳಿಸುವುದು ಇತ್ಯಾದಿ ನಿಯಂತ್ರಣ ಕ್ರಮಗಳನ್ನು ಆರಂಭಿಸಿದೆ.

ಮೊದಲ ಹಂತದ ಮತದಾನ ಏಪ್ರಿಲ್‌ 11ರಂದು ಆರಂಭವಾಗಿದ್ದು, ಅಂದಿನಿಂದಲೇ ವಾಟ್ಸಪ್ ನಿಯಂತ್ರಕ ಕ್ರಮಗಳನ್ನು ಚುರುಕುಗೊಳಿಸಿದೆ. ಚುನಾವಣಾ ಆಯೋಗದ ಜತೆಗಿನ ಇತ್ತೀಚಿನ ಸಂವಹನದಲ್ಲಿ ಈ ಕುರಿತು ವಿವರ ನೀಡಿದೆ.

ಚುನಾವಣಾ ಆಯೋಗದ ಸೂಚನೆಯ ಮೇರೆಗೆ ಆಕ್ಷೇಪಾರ್ಹ ಸಂಗತಿ ಅಥವಾ ಸುಳ್ಳು ಸುದ್ದಿಗಳನ್ನು ಪ್ರಚಾರ ಮಾಡುವವರ ಮೊಬೈಲ್‌ ಸಂಖ್ಯೆಗಳನ್ನು ಪರಿಗಣಿಸಿ, ತನ್ನ ಚಾಟ್‌ ಸರ್ವಿಸ್‌ ರದ್ದುಪಡಿಸುವುದು ಸೇರಿದಂತೆ ನಿಯಂತ್ರಣ ಕ್ರಮಗಳನ್ನು ವಾಟ್ಸಪ್ ಕೈಗೊಳ್ಳುತ್ತಿದೆ.

ಮೊದಲ ಹಂತದ ಮತದಾನ ಆರಂಭವಾದ 48 ಗಂಟೆಗಳ ಅವಧಿಯಲ್ಲಿ ಫೇಸ್‌ಬುಕ್‌ ಇದುವರೆಗೆ 500 ಆಕ್ಷೇಪಾರ್ಹ ಪೋಸ್ಟ್‌ ಮತ್ತು ಲಿಂಕ್‌ಗಳ ವಿರುದ್ಧ ಕ್ರಮ ತೆಗೆದುಕೊಂಡಿದೆ ಎಂದು ಚುನಾವಣಾ ಆಯೋಗದ ಅಧಿಕಾರಿಗಳು ತಿಳಿಸಿದ್ದಾರೆ.

ತೆಲಂಗಾಣ ವಲಯದಲ್ಲಿ ಫೇಸ್‌ಬುಕ್‌ ಪೋಸ್ಟ್‌ಗಳ ವಿರುದ್ಧ ಅತಿ ಹೆಚ್ಚು ದೂರುಗಳನ್ನು ಚುನಾವಣಾ ಆಯೋಗ ಸ್ವೀಕರಿಸಿದೆ.