Spam ತಡೆಗೆ ವಾಟ್ಸಾಪ್‌ಗೆ ಬರಲಿದೆ ಹೊಸ ವೈಶಿಷ್ಟ್ಯ

ಹೊಸದಿಲ್ಲಿ: ವಾಟ್ಸಾಪ್‌ನಲ್ಲಿ ಹರಿದಾಡುತ್ತಿರುವ ಸ್ಪ್ಯಾಮ್ ಅಥವಾ ಸುಳ್ಳು ಸಂದೇಶಗಳನ್ನು ಫಾರ್ವರ್ಡ್ ಮಾಡುವುದರಿಂದ ಜನರ ಗೊಂದಲಕ್ಕೆ ಕಡಿವಾಣ ಹಾಕಲು ಕಿರು ಸಂದೇಶವಾಹಕ ಆ್ಯಪ್ ನಿರ್ಧರಿಸಿದೆ. ಒಂದು ಗ್ರೂಪಿನಿಂದ ಮತ್ತೊಂದಕ್ಕೆ ಅಥವಾ ಬೇರೆಯವರಿಗೆ ಫಾರ್ವರ್ಡ್ ಮಾಡಲಾಗುವ ಸಂದೇಶಗಳಲ್ಲಿ 'ಫಾರ್ವರ್ಡೆಡ್ ಮೆಸೇಜ್' ಎಂದು ಸ್ಪಷ್ಟವಾಗಿ ತೋರಿಸುವ ವೈಶಿಷ್ಟ್ಯವೊಂದು ಅಭಿವೃದ್ಧಿಯಾಗುತ್ತಿದೆ.

ಗ್ರೂಪುಗಳಿಗೆ ಗುಂಪು ಗುಂಪಾಗಿ ಪೋಸ್ಟ್‌ಗಳನ್ನು ಫಾರ್ವರ್ಡ್ ಮಾಡುವ ಸ್ಪ್ಯಾಮರ್‌ಗಳು ಕಳುಹಿಸುವ ಎಲ್ಲ ಸಂದೇಶಗಳ ಮೇಲೆ ಗುಳ್ಳೆಯ ರೂಪದಲ್ಲಿ 'ಫಾರ್ವರ್ಡೆಡ್ ಮೆಸೇಜ್' ಎಂಬ ಲೇಬಲ್ ಇರುತ್ತದೆ. ಈ ವೈಶಿಷ್ಟ್ಯವು ಸದ್ಯಕ್ಕೆ ಪರೀಕ್ಷಾ ಹಂತದಲ್ಲಿದೆ. ಒಂದೇ ಸಂದೇಶವು ಹಲವಾರು ಬಾರಿ ಫಾರ್ವರ್ಡ್ ಆದಾಗ ಈ ಲೇಬಲ್ ಗುಳ್ಳೆ ಕಾಣಿಸಿಕೊಳ್ಳಲಿದೆ.

ಸ್ಪ್ಯಾಮರ್‌ಗಳು ಒಂದೇ ಸಂದೇಶವನ್ನು ಹಲವಾರು ಗುಂಪುಗಳಿಗೆ, ತನ್ನ ಕಾಂಟ್ಯಾಕ್ಟ್ಸ್ ಪಟ್ಟಿಯಲ್ಲಿದ್ದ ಹಲವಾರು ಮಂದಿಗೆ ಸ್ಪ್ಯಾಮ್ ಸಂದೇಶಗಳನ್ನು ಕಳುಹಿಸುವಾಗ ಇದು ಕಾಣಿಸಿಕೊಳ್ಳಲಿದೆ. ಇಂಥ ಸ್ಪ್ಯಾಮ್ ಸಂದೇಶಗಳಲ್ಲಿ ಅನಗತ್ಯ ಜಾಹೀರಾತುಗಳು ಅಥವಾ ಸುಳ್ಳು ಸುದ್ದಿಗಳೋ ಇಲ್ಲವೇ ಹಾನಿಕಾರಕ ಲಿಂಕ್‌ಗಳೋ ಇರಬಲ್ಲವು. ಈ ಕಾರಣಕ್ಕಾಗಿ ಬಳಕೆದಾರರನ್ನು ಎಚ್ಚರಿಸಲು ಈ ತಂತ್ರ ಅನುಸರಿಸಲಾಗುತ್ತದೆ.