ಶೀಘ್ರದಲ್ಲೇ ವಾಟ್ಸ್‌ಆ್ಯಪ್‌ನ ರಿಯಲ್‌ ವಿಂಡೋಸ್‌ ಆವೃತ್ತಿ?

ವಿಶ್ವದ ಕೋಟ್ಯಾನುಕೋಟಿ ಜನರಿಗೆ ಅಚ್ಚುಮೆಚ್ಚಿನ ಸಂವಹನ ಮಾಧ್ಯಮವಾಗಿರುವ (ಮೆಸೆಂಜರ್‌ ಆ್ಯಪ್‌) ವಾಟ್ಸ್‌ಆ್ಯಪ್‌, ಪೂರ್ಣ ಪ್ರಮಾಣದ ಪ್ರತ್ಯೇಕ ಕಂಪ್ಯೂಟರ್‌ ಅಪ್ಲಿಕೇಷನ್‌ ಬಿಡುಗಡೆ ಮಾಡಲಿದೆ ಎನ್ನುವ ಸುದ್ದಿ ಬಲವಾಗಿ ಹರಡಿದೆ. ವಾಟ್ಸ್‌ಆ್ಯಪ್‌ ಮೊಬೈಲ್‌ ಆ್ಯಪ್‌ನ ಎಲ್ಲ ಫೀಚರ್‌ಗಳನ್ನೂ ಒಳಗೊಂಡ ಪ್ರತ್ಯೇಕ ಡೆಸ್ಕ್‌ಟಾಪ್‌ ವರ್ಷನ್‌ ತರಲು ಫೇಸ್‌ಬುಕ್‌ ಮತ್ತೊಂದು ಟೆಕ್ನಾಲಜಿ ದೈತ್ಯ ಕಂಪನಿ ಮೈಕ್ರೋಸಾಫ್ಟ್‌ ಜತೆ ಕೆಲಸ ಮಾಡುತ್ತಿದೆ. 'ಯೂನಿವರ್ಸಲ್‌ ವಿಂಡೋಸ್‌ ಪ್ಲ್ಯಾಟ್‌ಫಾರಂ' ಅಡಿಯಲ್ಲಿ ಈ ಅಪ್ಲಿಕೇಷನ್‌ ಅಭಿವೃದ್ಧಿಯಾಗುತ್ತಿದೆ ಎಂದು ದಿ ನೆಕ್ಸ್ಟ್‌ ವೆಬ್‌ ಕಣಿ ಹೇಳಿದೆ.

ಪ್ರತಿಯೊಬ್ಬರ ಮೊಬೈಲ್‌ಗಳಲ್ಲಿ ಕುಳಿತಿರುವ ಈ ಅಪ್ಲಿಕೇಷನ್‌ನ ಪೂರ್ಣ ಪ್ರಮಾಣದ ಡೆಸ್ಕ್‌ಟಾಪ್‌ ಆವೃತ್ತಿ ಈಗ ಲಭ್ಯವಿಲ್ಲ. ಈಗಿರುವ ಡೆಸ್ಕ್‌ಟಾಪ್‌ ಆ್ಯಪ್‌ ಮೊಬೈಲ್‌ ಆ್ಯಪ್‌ನ ಮಿರರ್‌ ಅಷ್ಟೆ. ಅಲ್ಲಿ, ವಾಯ್ಸ್‌ ಮತ್ತು ವಿಡಿಯೋ ಕಾಲಿಂಗ್‌ ಸೌಲಭ್ಯವಿಲ್ಲ. ಮೊಬೈಲ್‌ ಆ್ಯಪ್‌ ಅನ್ನು ಡೆಸ್ಕ್‌ಟಾಪ್‌ನೊಂದಿಗೆ ಕ್ಯೂ ಆರ್‌ ಕೋಡ್‌ನಿಂದ ಸಂಪರ್ಕಿಸಿ ಬಳಬಹುದಷ್ಟೆ. ಇದಕ್ಕೆ ಮೊಬೈಲ್‌ ಆನ್‌ ಆಗಿರುವುದು ಮತ್ತು ಇಂಟರ್ನೆಟ್‌ ಚಾಲ್ತಿಯಲ್ಲಿರುವುದು ಕಡ್ಡಾಯ.

ಆದರೆ ದಿ ನೆಕ್ಸ್ಟ್‌ ವೆಬ್‌ ವರದಿ ಮಾಡಿರುವಂತೆ ವಾಟ್ಸ್‌ಆ್ಯಪ್‌ನ ಪೂರ್ಣ ಡೆಸ್ಕ್‌ಟಾಪ್‌ ಅಪ್ಲಿಕೇಷನ್‌ ಬಂದರೆ, ಮೊಬೈಲ್‌ನ ಹಂಗಿಲ್ಲದೆ ಪೂರ್ಣ ವಾಟ್ಸ್‌ಆ್ಯಪ್‌ ಅನ್ನು ಎಂಜಾಯ್‌ ಮಾಡಬಹುದು.