Oneplus 5ಗೆ ಎರಡು ದಿನಗಳಲ್ಲಿ 3 ಲಕ್ಷ ರಿಜಿಸ್ಟ್ರೇಷನ್

ಸಾಕಷ್ಟು ದಿನಗಳಿಂದ ಅತ್ತ ಸ್ಮಾರ್ಟ್‌ಫೋನ್ ಪ್ರಿಯರನ್ನು, ಇತ್ತ ಟೆಕ್ ಪ್ರಿಯರನ್ನು ಸೆಳೆಯುತ್ತಿದೆ ಒನ್ ಪ್ಲಸ್ 5 ಸ್ಮಾರ್ಟ್‌ಫೋನ್. ಈ ಫೋನ್ ಜೂನ್ 20ರಂದು ಬಿಡುಗಡೆ ಮಾಡಲು ಒನ್ ಪ್ಲಸ್ ಕಂಪೆನಿ ಸಿದ್ಧವಾಗಿದೆ. ಬಿಡುಗಡೆಗೂ ಮೊದಲೇ ಈ ಕಂಪೆನಿ ಚೀನಾದಲ್ಲಿ ಮುಂಗಡ ರಿಜಿಸ್ಟ್ರೇಷನ್ ಆರಂಭಿಸಿದೆ

ವಿಶೇಷ ಎಂದರೆ ಕಂಪೆನಿ ಊಹಿಸಿದ್ದಕ್ಕಿಂತಲೂ ಭಾರಿ ಸಂಖ್ಯೆಯಲ್ಲಿ ಈ ಫೋನನ್ನು ರಿಜಿಸ್ಟ್ರೇಷನ್ ಮಾಡಿಕೊಂಡಿದ್ದಾರೆ. ಚೀನಾದ ರೀಟೇಲರ್ 'ಜಿಂಗ್‌ಡಾಂಗ್.ಕಾಮ್' ನಲ್ಲಿ ಒನ್‌ಪ್ಲಸ್ 5 ಸ್ಮಾರ್ಟ್‍ಫೋನ್ ರಿಜಿಸ್ಟ್ರೇಷನ್‌ಗಳನ್ನು ಕಂಪೆನಿ ಸ್ವೀಕರಿಸುತ್ತಿದೆ. ರಿಜಿಸ್ಟ್ರೇಷನ್ ಆರಂಭಿಸಿದ 48 ಗಂಟೆಗಳಲ್ಲೇ ಮೂರು ಲಕ್ಷ ಮಂದಿ ರಿಜಿಸ್ಟ್ರೇಷನ್ ಮಾಡಿಕೊಂಡಿದ್ದಾರೆ. ಈ ಸಂಖ್ಯೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆಗಳೂ ಇವೆ ಎಂದಿದೆ ಕಂಪೆನಿ.

ಪೇರೆಂಟ್ ಕಂಪೆನಿ ಒಪ್ಪೋ ಆರ್ 11 ಡಿಸೈನ್ ರೀತಿಯಲ್ಲೇ ಒನ್‌ಪ್ಲಸ್ 5 ಸ್ಮಾರ್ಟ್‌ಫೋನ್ ಇರಲಿದೆ ಎಂಬ ವರದಿಗಳು ನಿರಾಸೆಗೊಳಿಸಿದ್ದರೂ, ಈ ಫೋನ್ ಮೇಲಿನ ಕ್ರೇಜ್ ಮಾತ್ರ ಇನ್ನಷ್ಟು ಹೆಚ್ಚಾಗಿದೆ. ಇದುವರೆಗೆ ಬಂದ ವದಂತಿಗಳ ಪ್ರಕಾರ ಒನ್‍ಪ್ಲಸ್ ಸ್ಮಾರ್ಟ್‌ಫೋನ್ ಸ್ನಾಪ್ ಡ್ರಾಗನ್ 835 ಚಿಪ್ ಸೆಟ‌ನೊಂದಿಗೆ 8ಜಿಬಿ ರ್‍ಯಾಮ್ ಹೊಂದಿರುತ್ತದೆ ಎಂಬ ಮಾತುಗಳು ಕೇಳಿಬರುತ್ತಿವೆ.

ಉಳಿದಂತೆ 128 ಜಿಬಿ ಸ್ಟೋರೇಜ್ ಇರಲಿದೆಯಂತೆ. ಕಂಪೆನಿ ಈಗಾಗಲೆ ಬಿಡುಗಡೆ ಮಾಡಿರುವ ಟೀಸರ್‌ನಲ್ಲಿ ಡ್ಯುಯಲ್ ಕ್ಯಾಮೆರಾ ಇದೆ ಎಂಬುದು ಗೊತ್ತಾಗಿದೆ. ಯುಎಫ್ಎಸ್ (ಯೂನಿವರ್ಸಲ್ ಫ್ಲ್ಯಾಶ್ ಸ್ಟೋರೇಜ್) ಸಹ ಇರಲಿದೆಯಂತೆ. ಜೂ.20ರಂದು ಗ್ಲೋಬಲ್ ಆಗಿ ಲಾಂಚ್ ಆಗುತ್ತಿದ್ದರೆ ಭಾರತ ಸೇರಿದಂತೆ ಏಷ್ಯಾ ಮಾರುಕಟ್ಟೆಗೆ ಜೂ.22ರಂದು ದಾಂಗುಡಿ ಇಡಲಿದೆ.