ಐಫೋನ್‌ 8ರ ಸಂಬಂಧ ಇತ್ತೀಚೆಗಷ್ಟೇ ಹೊರ ಬಂದಿರುವ ಫೋಟೋಗಳನ್ನು ಗಮನಿಸಿದರೆ ಹೊಸದೊಂದು ಸುಳಿವು ದೊರೆಯುತ್ತದೆ. ಇದೇ ಮೊದಲ ಬಾರಿಗೆ ಐಫೋನ್‌ ಫೋನ್‌ನಲ್ಲಿ ಆ್ಯಪಲ್‌ ಕಂಪನಿ ಫಿಂಗರ್‌ಪ್ರಿಂಟ್‌ ಸ್ಕ್ಯಾ‌ನರ್‌ ಅನ್ನು ಫೋನ್‌ನ ಹಿಂಬದಿಯಲ್ಲಿ ಅಳವಡಿಸಿದಂತಿದೆ. ಐಫೋನ್‌ 8ರ ಫೋಟೋಗಳು ಲೀಕ್‌ ಆಗಿದ್ದು, ಅವುಗಳಿಂದ ಮಾಹಿತಿ ಗೊತ್ತಾಗಿದೆ.
ಫೋನ್‌ನ ಬ್ಯಾಕ್‌ ಕೇಸಿಂಗ್‌ನಲ್ಲಿ ಭಾರೀ ಬದಲಾವಣೆ ಕಣ್ಣಿಗೆ ಕಾಣುವಂತಿದ್ದು, ಅದರಲ್ಲಿರುವ ಸ್ಲಾಟ್‌ ಹೋಲ್‌ನಂತಿದೆ. ಇದು ಖಂಡಿತವಾಗಿಯೂ ಫೋನ್‌ ಹಿಂಬದಿಯ ಫಿಂಗರ್‌ಪ್ರಿಂಟ್‌ ಸ್ಕ್ಯಾ‌ನರ್‌ ಅಳವಡಿಕೆ ಮಾಡಿರಬಹುದು ಎಂದು ಅಂದಾಜಿಸಲಾಗುತ್ತಿದೆ. ಐಫೋನ್‌ 8ರಲ್ಲೂ ಆ್ಯಪಲ್‌ ಕಂಪನಿ ಫಿಂಗರ್‌ಪ್ರಿಂಟ್‌ ಸ್ಕ್ಯಾ‌ನರ್‌ ಅನ್ನು ಸ್ಕ್ರೀನ್‌ನಲ್ಲೇ ಅಳವಡಿಸಲಿದೆ ಎಂಬ ರೂಮರ್‌ ಇತ್ತು.
ಆದರೆ, ಈಗ ಹೊರ ಬಿದ್ದಿರುವ ಫೋಟೋಗಳನ್ನು ನೋಡಿದರೆ, ಅದು ಫೋನ್‌ ಹಿಂಬದಿಗೆ ಸರಿದಂತಿದೆ. ಈಗಾಗಲೇ ಗ್ರಾಹಕರಲ್ಲಿ ಭಾರೀ ಕುತೂಹಲ ಮೂಡಿಸಿರುವ ಐಫೋನ್‌ 8 ಇನ್ನೂ ಅನೇಕ ಹೊಸತನಗಳನ್ನು ಅಳವಡಿಸಿಕೊಂಡಿದೆ ಎನ್ನುತ್ತಾರೆ ವಿಶ್ಲೇಷಕರು. ಆ್ಯಪಲ್‌ ಕಂಪನಿಯ ಉತ್ಪನ್ನಗಳು ಯಾವಾಗಲೂ ತಂತ್ರಜ್ಞಾನದಲ್ಲಿ ತನ್ನ ಪ್ರತಿಸ್ಪರ್ಧಿ ಕಂಪನಿಗಳಿಗಿಂತಲೂ ಮುಂದೆ ಇರುತ್ತದೆ. ಹಾಗಾಗಿ, ಐಫೋನ್‌ 8 ಹೇಗಿರಲಿದೆ ಎಂಬುದು ಈಗ ಮಿಲಿಯನ್‌ ಡಾಲರ್‌ ಪ್ರಶ್ನೆಯಾಗಿದೆ.