ಜಿಯೋ ಫ್ರೀ ಆಫರ್‌ ಮೇಲೆ ಯಾವುದೇ ನಿರ್ಬಂಧವಿಲ್ಲ

ಹೊಸದಿಲ್ಲಿ: ರಿಲಯನ್ಸ್‌ ಜಯೋ ಸೇವೆಗಳ ಮೇಲೆ ನಿರ್ಬಂಧ ಹೇರುವಂತೆ ಕೋರಿ ಏರ್‌ಟೆಲ್‌ ಹಾಗೂ ಇತರೇ ಕಂಪನಿಗಳು ಸಲ್ಲಿಸಿದ್ದ ಮೇಲ್ಮನವಿ ಅರ್ಜಿಯನ್ನು ದೂರಸಂಪರ್ಕ ವಿವಾದ ಇತ್ಯರ್ಥ ಮತ್ತು ಮೇಲ್ಮನವಿ ನ್ಯಾಯಮಂಡಳಿ(TDSAT) ತಿರಸ್ಕರಿಸಿದ್ದು, ಟ್ರಾಯ್‌ ನಿರ್ಧಾರವನ್ನು ಮರು ಪರಿಶೀಲಿಸುವಂತೆ ಹೇಳಿದೆ.

ಜಿಯೋ ತನ್ನ ಉಚಿತ ಸೌಲಭ್ಯದಿಂದ ಟೆಲಿಕಾಂ ನಿಯಮಾವಳಿಗಳನ್ನು ಉಲ್ಲಂಘನೆ ಮಾಡುತ್ತಿದೆ. ಹೀಗಾಗಿ ಕೂಡಲೇ ಜಿಯೋ ಒದಗಿಸುವ ಉಚಿತ ಕೊಡುಗೆಗಳಿಗೆ ತಡೆಯಾಜ್ಞೆ ನೀಡಬೇಕೆಂದು ಏರ್‌ಟೆಲ್‌ ಮತ್ತು ಐಡಿಯಾ ಟಿಡಿಎಸ್‌ಎಟಿಗೆ ಮೇಲ್ಮನವಿ ಅರ್ಜಿ ಸಲ್ಲಿಸಿತ್ತು. ಕಳೆದ ವಾರ ವಿಚಾರಣೆ ನಡೆಸಿ ತೀರ್ಪು ಕಾಯ್ದಿರಿಸಿದ್ದ ಟಿಡಿಎಸ್‌ಎಟಿ, ಗುರುವಾರದಂದು ಟ್ರಾಯ್‌ಗೆ ಉಚಿತ ಸೇವೆಗಳನ್ನು ಮರು ಪರಿಶೀಲಿಸುವಂತೆ ಕೇಳಿದೆ.

ಆರಂಭದಲ್ಲಿ ಜಿಯೋ ತನ್ನ ಗ್ರಾಹಕರಿಗೆ 91 ದಿನಗಳ ಕಾಲ ಉಚಿತ ಸೌಲಭ್ಯಗಳನ್ನು ನೀಡಿತ್ತು. ಇದಾದ ಬಳಿಕ ತನ್ನ ಸೌಲಭ್ಯವನ್ನು ಮುಂದುವರಿಸಿತ್ತು. ಇದನ್ನು ಪ್ರಶ್ನಿಸಿದ್ದ ಏರ್‌ಟೆಲ್‌ ಹಾಗೂ ಐಡಿಯಾ ಟ್ರಾಯ್‌ಗೆ ಜಿಯೋ ವಿರುದ್ಧ ಕ್ರಮ ತೆಗೆದುಕೊಳ್ಳುವಂತೆ ಮನವಿ ಮಾಡಿತ್ತು.

ರಿಲಯನ್ಸ್ ಜಿಯೋ ಉಚಿತ ಧ್ವನಿ ಕರೆ ಮತ್ತು ಡೇಟಾ ಪ್ಲಾನ್ ಯಾವುದೇ ರೀತಿಯ ದೂರಸಂಪರ್ಕ ನಿಯಮಾವಳಿಗಳನ್ನು ಉಲ್ಲಂಘಿಸಿಲ್ಲ ಎಂದು ಜನವರಿ 31 ರಂದೇ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (TRAI) ತಿಳಿಸಿತ್ತು. ಅಲ್ಲದೇ ಜಿಯೋ ಉಚಿತ ಕೊಡುಗೆಗಳನ್ನು ಮುಂದುವರಿಸುವಂತೆ ಅನುಮತಿ ನೀಡಿತ್ತು.

ಹೀಗಾಗಿ ಟ್ರಾಯ್‌ ನಿರ್ಧಾರವನ್ನು ಪ್ರಶ್ನಿಸಿ ಎರಡೂ ಕಂಪನಿಗಳು ಮೇಲ್ಮನವಿ ಸಲ್ಲಿಸಿದ್ದವು. ಈ ಅರ್ಜಿಯನ್ನು ಟಿಡಿಎಸ್‌ಎಟಿ ತಿರಸ್ಕರಿಸಿದೆ.

ಕಳೆದ ತಿಂಗಳಷ್ಟೇ ಜಿಯೋ ಸಿಮ್ ಬಳಸುತ್ತಿರುವವರು ಜಿಯೋ ಪ್ರೈಮ್ ಸದಸ್ಯರಾಗಬಹುದು ಎಂದು ಸಂಸ್ಥೆ ಹೇಳಿಕೊಂಡಿತ್ತು. ಅಲ್ಲದೇ ಮಾರ್ಚ್ 01 ರಿಂದ ಮಾರ್ಚ್ 31ರ ವರೆಗೆ ಪ್ರೈಮ್ ಸದಸ್ಯತ್ವ ಅಭಿಯಾನ ನಡೆಯಲಿರುವುದಾಗಿ ಹೇಳಿತ್ತು.