ಕಾರ್ಯಕ್ಷಮತೆ, ವೇಗದ ಸರದಾರ OnePlus 7 Pro

ಒನ್‌ಪ್ಲಸ್ 7 ಪ್ರೊ ಇತ್ತೀಚೆಗೆ ಭಾರಿ ಸದ್ದು ಮಾಡಿದ ಪ್ರೀಮಿಯಂ ಫೋನ್. ಐಫೋನ್, ಗೂಗಲ್ ಪಿಕ್ಸೆಲ್, ಸ್ಯಾಮ್ಸಂಗ್ ಗ್ಯಾಲಕ್ಸಿಗಳಿಗೆ ಸ್ಫರ್ಧೆಯೊಡ್ಡುತ್ತಿದೆ ಇದು. ಚೀನಾ ಮೂಲದ ಒನ್‌ಪ್ಲಸ್‌ಗೆ ಕರ್ನಾಟಕದಲ್ಲಿಯೂ ಸಾಕಷ್ಟು ಅಭಿಮಾನಿಗಳಿದ್ದಾರೆ. ಹೀಗಾಗಿಯೇ ಈ ಬಾರಿ ಕಂಪನಿಯು ತನ್ನ ಫ್ಲ್ಯಾಗ್‌ಶಿಪ್ ಫೋನನ್ನು ಬೆಂಗಳೂರಿನಲ್ಲೇ ಭಾರತೀಯ ಮಾರುಕಟ್ಟೆಗೆ ಬಿಡುಗಡೆ ಮಾಡಿತ್ತು. 6GB ಯಿಂದ 12 GBವರೆಗಿನ RAM ಹಾಗೂ 128 GB ಮತ್ತು 256 GB ಆಂತರಿಕ ಮೆಮೊರಿಯ ಒಟ್ಟು ನಾಲ್ಕು ಆವೃತ್ತಿಗಳಲ್ಲಿ ಲಭ್ಯವಿರುವ ಈ ಫೋನ್‌ಗಳಲ್ಲಿ, ರಿವ್ಯೂಗೆ ಬಂದಿರುವ 12GB/256GB ನೆಬ್ಯುಲಾ ನೀಲಿ ಬಣ್ಣ ಆವೃತ್ತಿ ಹೇಗಿದೆ? ನೋಡೋಣ.

2019ರ ಮೇ ತಿಂಗಳಾರಂಭದಲ್ಲಿ ಒನ್‌ಪ್ಲಸ್ 7 ಜತೆಗೆ ಹೆಚ್ಚು ಶಕ್ತಿಶಾಲಿಯಾದ, ವೇಗವಾಗಿ ಕೆಲಸ ಮಾಡಬಲ್ಲ, ಅತ್ಯುತ್ತಮ ಫೋಟೋಗಳನ್ನು ಒದಗಿಸಬಲ್ಲ, ಸುಧಾರಿತ ವೈಶಿಷ್ಟ್ಯಗಳುಳ್ಳ ಪ್ರೋ ಆವೃತ್ತಿಯನ್ನೂ ಏಕಕಾಲದಲ್ಲಿ ಬಿಡುಗಡೆ ಮಾಡಲಾಗಿತ್ತು.

ವಿನ್ಯಾಸ ಮತ್ತು ವೈಶಿಷ್ಟ್ಯಗಳು
ಹೈ-ಎಂಡ್ ಫ್ಲ್ಯಾಗ್‌ಶಿಪ್ ಫೋನ್‌ಗಳಾದ ಸ್ಯಾಮ್ಸಂಗ್ ಗೆಲಾಕ್ಸಿ ಎಸ್ 10, ಐಫೋನ್ XR, ಗೂಗಲ್ ಪಿಕ್ಸೆಲ್ 3ಎ ಆವೃತ್ತಿಗಳಿಗೆ ಸ್ಫರ್ಧೆ ನೀಡಲು ಬಂದಿರುವ ಈ ಫೋನ್‌ನ ಲುಕ್ ಆಕರ್ಷಕವಾಗಿದೆ. ಕರ್ವ್ ಆಗಿರುವ ಗಾಜಿನ ಪಾರ್ಶ್ವಗಳಿರುವ (ಸೈಡ್ ಬೆಝೆಲ್) 6.41 ಇಂಚಿನ ಸ್ಕ್ರೀನ್ ಗಮನ ಸೆಳೆಯುತ್ತದೆ. ಆನ್‌ಸ್ಕ್ರೀನ್ ಫಿಂಗರ್‌ಪ್ರಿಂಟ್ ಜತೆಗೆ ಧುತ್ತನೇ ಪಾಪ್-ಅಪ್ ಆಗುವ ಸೆಲ್ಫೀ ಕ್ಯಾಮೆರಾ ಇದರ ಆಕರ್ಷಣೆಯೇ ಸರಿ.
ಇದರಿಂದಾಗಿಯೇ ಸ್ಕ್ರೀನ್‌ನಲ್ಲಿ ನಾಚ್ (Notch) ಇಲ್ಲದೆ, ಪೂರ್ಣ ಪ್ರಮಾಣದಲ್ಲಿ ಚಿತ್ರ ಅಥವಾ ವೀಡಿಯೊಗಳನ್ನು ನೋಡುವುದು ಸಾಧ್ಯ. ಹಿಂಭಾಗದಲ್ಲಿ ಹೊಳೆಯುವ ನೆಬ್ಯುಲಾ ನೀಲಿ ಬಣ್ಣದ ಕವಚ ಈಗಿನ ಟ್ರೆಂಡ್ ಆಗಿದ್ದು, ಪ್ರೀಮಿಯಂ ಲುಕ್ ನೀಡುತ್ತದೆ. ಜತೆಗೆ ತ್ರಿವಳಿ ಕ್ಯಾಮೆರಾ ಹಾಗೂ ಫ್ಲ್ಯಾಶ್ ವಿಶೇಷ ಗಮನ ಸೆಳೆಯುತ್ತದೆ. ವೈಬ್ರೇಟ್ ಹಾಗೂ ರಿಂಗ್ ಆಗುವ ಆಯ್ಕೆಗಾಗಿ ಬಲ ಭಾಗದಲ್ಲೊಂದು ಫಿಸಿಕಲ್ ಸ್ವಿಚ್ ಇದೆ. ಕೆಳಭಾಗದಲ್ಲಿ ಸ್ಟೀರಿಯೋ ಸ್ಪೀಕರ್, ಸಿಮ್ ಕಾರ್ಡ್ ಟ್ರೇ, ಟೈಪ್ ಸಿ ಚಾರ್ಜಿಂಗ್ ಕಮ್ ಹೆಡ್‌ಫೋನ್ ಪೋರ್ಟ್ ಮತ್ತು ಮೈಕ್ ಇದೆ. ಮೇಲಿನ ಎಡಭಾಗದಲ್ಲಿ ಪಾಪ್-ಅಪ್ ಸೆಲ್ಫೀ ಕ್ಯಾಮೆರಾ ಇದೆ. ಇದಂತೂ ಕುತೂಹಲದ ಕೇಂದ್ರಬಿಂದು. ವಿವೊ 15 ಪ್ರೋದಲ್ಲಿರುವ ಪಾಪ್-ಅಪ್ ಸೆಲ್ಫೀ ಕ್ಯಾಮೆರಾಕ್ಕಿಂತ ಇದು ವೇಗವಾಗಿಯೂ ಮತ್ತು ಸುಲಲಿತವಾಗಿಯೂ ಕೆಲಸ ಮಾಡಿರುವುದು ಗಮನಕ್ಕೆ ಬಂತು.

ಹಿಂದಿನ ಒನ್‌ಪ್ಲಸ್ 6ಟಿಯ ಸುಧಾರಿತ ರೂಪವಿದು ಎಂದು ಹೇಳಲಡ್ಡಿಯಿಲ್ಲ. ಇದರ ಬೆಲೆ ಮತ್ತು ವೈಶಿಷ್ಟ್ಯಗಳನ್ನು ನೋಡಿದರೆ, ಆ್ಯಪಲ್, ಸ್ಯಾಮ್‌ಸಂಗ್ ಮತ್ತು ಗೂಗಲ್‌ನ ಪಿಕ್ಸೆಲ್ ಫೋನ್‌ಗಳ ಸಮೀಪದಲ್ಲಿದೆ. ಭಾರತದಲ್ಲಿ ಕ್ವಾಲ್‌ಕಾಂ ಸ್ನ್ಯಾಪ್‌ಡ್ರ್ಯಾಗನ್ 855 ಆವೃತ್ತಿಯ ಮೊದಲ ಫೋನ್ ಇದಾಗಿದ್ದು, ಆಂಡ್ರಾಯ್ಡ್ 9.0 (ಪೈ) ಕಾರ್ಯಾಚರಣಾ ವ್ಯವಸ್ಥೆ ಆಧಾರಿತ ಆಕ್ಸಿಜನ್ ಸ್ಕಿನ್, ಡಾಲ್ಬಿ ಅಟ್ಮೋಸ್ ಸ್ಟೀರಿಯೋ ಸ್ಪೀಕರ್‌ಗಳು ಇದರ ವಿಶೇಷತೆ.

ಈಗ ಕ್ಯಾಮೆರಾದ ನಿಖರತೆಯ ಮೇಲೆಯೇ ಬಹುತೇಕ ಫೋನ್ ತಯಾರಿಕಾ ಕಂಪನಿಗಳು ಹೆಚ್ಚಿನ ಆಸ್ಥೆ ವಹಿಸುತ್ತಿವೆ. ಬಿಡುಗಡೆಯ ದಿನ ಒನ್‌ಪ್ಲಸ್ ಸಂಸ್ಥಾಪಕರು ಕೂಡ ಕ್ಯಾಮೆರಾ ಮತ್ತು ವೇಗಕ್ಕೆ ಹೆಚ್ಚು ಒತ್ತು ನೀಡಿದರು. ಅದರಂತೆಯೇ, 'ಗೋ ಬಿಯಾಂಡ್ ಸ್ಪೀಡ್' ಧ್ಯೇಯವಾಕ್ಯಕ್ಕೆ ಚ್ಯುತಿ ಬಾರದಂತೆ ಇದರ ಯಂತ್ರಾಂಶ ಮತ್ತು ತಂತ್ರಾಂಶಗಳು ರೂಪುಗೊಂಡಿವೆ. ವಾರ್ಪ್ ಚಾರ್ಜ್ 30 ಎಂಬ ವೇಗದ ಚಾರ್ಜಿಂಗ್ ವ್ಯವಸ್ಥೆಯ ಮೂಲಕ ಅತ್ಯಂತ ಬೇಗನೇ ಬ್ಯಾಟರಿ ಚಾರ್ಜ್ ಮಾಡಬಹುದು. ಒನ್‌ಪ್ಲಸ್ 7 ಪ್ರೊ ಬ್ಯಾಟರಿ ಸಾಮರ್ಥ್ಯ 4000 mAh.

ಒನ್‌ಪ್ಲಸ್ 7 ಪ್ರೊ ಲಭ್ಯತೆ ಮತ್ತು ಆವೃತ್ತಿಗಳು
6GB/128GB ಆವೃತ್ತಿಗೆ 48,999 ರೂ.
8GB/256GB ಆವೃತ್ತಿಗೆ 52,999 ರೂ.
12GB/256GB ಆವೃತ್ತಿ ಬೆಲೆ 57,999 ರೂ. ನೆಬ್ಯುಲಾ ಬ್ಲೂ ಬಣ್ಣ
8GB/256GB ಆವೃತ್ತಿ ಬೆಲೆ 52,999 ರೂ. ಬಾದಾಮಿ ಬಣ್ಣ
(ರಾತ್ರಿ ವೇಳೆ ತೆಗೆದ ಚಿತ್ರ)


ಕ್ಯಾಮೆರಾ ಹೇಗಿದೆ...
48 ಮೆಗಾಪಿಕ್ಸೆಲ್ ರೆಸೊಲ್ಯುಶನ್ ಸಹಿತವಾದ ತ್ರಿವಳಿ ಕ್ಯಾಮೆರಾಗಳನ್ನು ಹೊಂದಿರುವ ಮೊದಲ ಒನ್‌ಪ್ಲಸ್ ಫೋನ್ ಎಂದರೆ ಒನ್‌ಪ್ಲಸ್ 7 ಪ್ರೊ. ಇದರಲ್ಲಿ f/1.6 ಅಪರ್ಚರ್ ಸಹಿತವಾದ ಸೋನಿ IMX586 ಸೆನ್ಸರ್ ಇದೆ. ಜತೆಗೆ 16 MP ಅಲ್ಟ್ರಾ ವೈಡ್ಆ್ಯಂಗಲ್ ಕ್ಯಾಮೆರಾ, 10x ಆಪ್ಟಿಕಲ್ ಝೂಮ್ ಇರುವ 8 ಮೆಗಾಪಿಕ್ಸೆಲ್ ಟೆಲಿಫೋಟೋ ಕ್ಯಾಮೆರಾ ಕೂಡ ಇದರಲ್ಲಿದೆ. ಇಷ್ಟು ಅತ್ಯಾಧುನಿಕ ವೈಶಿಷ್ಟ್ಯಗಳಿರುವಾಗ ಇದರಲ್ಲಿ ತೆಗೆದ ಫೋಟೋಗಳು ಹೇಗಿವೆ? ಕೆಲವೊಂದು ಚಿತ್ರಗಳನ್ನು ಗಮನಿಸಿದರೆ ತಿಳಿಯುತ್ತದೆ. ಅತ್ಯಂತ ಹೆಚ್ಚು ಡೀಟೇಲ್ಸ್ ಇರುವ, ಉತ್ತಮ ರೆಸೊಲ್ಯುಶನ್ ಫೋಟೋಗಳು ಈ 48 ಮೆಗಾಪಿಕ್ಸೆಲ್ ಕ್ಯಾಮೆರಾದಿಂದ ಮೂಡಿಬಂದಿವೆ. ತೀರಾ ಕಡಿಮೆ ಬೆಳಕಿರುವಲ್ಲಿಯೂ ಸಖತ್ ಕ್ಲಾರಿಟಿ ಇರುವ ಫೋಟೋಗಳು ಬಂದಿವೆ. ನಿರ್ದಿಷ್ಟ ಪ್ರಮಾಣಕ್ಕೆ ಝೂಮ್ ಮಾಡಿದರೆ ಫೋಟೋಗಳು ಶಾರ್ಪ್ ಆಗಿಯೇ ಕಾಣಿಸುತ್ತವೆ ಮತ್ತು ಪಿಕ್ಸಲೇಟ್ ಆಗದಿರುವುದರಿಂದ, ಇದರಲ್ಲಿ ತೆಗೆದ ಫೋಟೋಗಳನ್ನು ಪ್ರಿಂಟ್ ಮಾಡಿಟ್ಟುಕೊಳ್ಳುವುದಕ್ಕೂ ಯಾವುದೇ ತೊಡಕಾಗದು.
(ರಾತ್ರಿಯ ಮತ್ತೊಂದು ಚಿತ್ರ, ಝೂಮ್ ಇಲ್ಲದೆ)

10x ಝೂಮ್ ಮಾಡಿ ತೆಗೆದ ಫೋಟೋಗಳಲ್ಲಿ ಎಸ್ಎಲ್ಆರ್ ಕ್ಯಾಮೆರಾಗಳಷ್ಟು ನಿಖರತೆ ಬರುವುದಕ್ಕೆ ಸಾಧ್ಯವೇ ಇಲ್ಲ. ಯಾಕೆಂದರೆ ಮೊಬೈಲ್ ಫೋನ್‌ನ ತಂತ್ರಾಂಶದ ಮಿತಿ ಇದೆ. ಆದರೆ, ಇದುವರೆಗೆ ಬಳಸಿರುವ ಫೋನ್‌ಗಳಲ್ಲಿ ಒನ್‌ಪ್ಲಸ್ 7 ಪ್ರೋದಲ್ಲಿ ಹೆಚ್ಚು ಸ್ಪಷ್ಟತೆ ಇರುವ, ದೂರದ ಫೋಟೋ ಲಭ್ಯವಾಗಿದೆ. ಅಗಲವಾದ ಅಪರ್ಚರ್, ಅಲ್ಟ್ರಾವೈಡ್ ಮತ್ತು ಟೆಲಿಫೋಟೋ ಸೆನ್ಸರ್‌ಗಳು ಯಾವುದೇ ಫೋಟೋವನ್ನು ಹೆಚ್ಚು ನಿಖರವಾಗಿಸುತ್ತದೆ.

ವೀಡಿಯೊ ಕೂಡ 4ಕೆ ರೆಸೊಲ್ಯುಶನ್‌ನಲ್ಲಿ ರೆಕಾರ್ಡ್ ಮಾಡಬಹುದು. ಆದರೆ, ಇಷ್ಟು ಸ್ಪಷ್ಟತೆಯ ವೀಡಿಯೊಗಳು ಹೆಚ್ಚು ಸ್ಥಳಾವಕಾಶ ತೆಗೆದುಕೊಳ್ಳುತ್ತವೆ ಎಂಬುದೂ ಅಷ್ಟೇ ದಿಟ. ಸಾಮಾನ್ಯ ವೀಡಿಯೊಗಳಿಗೆ 4ಕೆ ಬೇಕಾಗಿರುವುದಿಲ್ಲ. 1080 ಪಿಕ್ಸೆಲ್ ರೆಸೊಲ್ಯುಶನ್‌ನಲ್ಲಿ ರೆಕಾರ್ಡ್ ಮಾಡಿಕೊಂಡರೆ ಸ್ವಲ್ಪ ಮಟ್ಟಿಗೆ ಫೈಲ್ ಗಾತ್ರ ಕುಗ್ಗುತ್ತದೆ.
(ಸಮೀಪದಿಂದ ಫೋಕಸ್ ಮಾಡಿ ತೆಗೆದ ಚಿತ್ರ)


ಇನ್ನು ಸೆಲ್ಫೀ ಮತ್ತು ಪ್ರಧಾನ ಕ್ಯಾಮೆರಾಗಳೆರಡರಲ್ಲೂ ಪೋರ್ಟ್ರೇಟ್, ನೈಟ್ ಮೋಡ್‌ಗಳಿವೆ. ಕ್ಯಾಮೆರಾ ಆ್ಯಪ್ ಓಪನ್ ಮಾಡಿ ಕೆಳಗಿನಿಂದ ಮೇಲಕ್ಕೆ ಸ್ವೈಪ್ ಮಾಡಿದರೆ, ಮತ್ತಷ್ಟು ಮೋಡ್‌ಗಳು ಕಾಣಿಸುತ್ತವೆ. ಪನೋರಮಾ ಮೋಡ್ ಜತೆಗೆ ಸ್ಲೋ ಮೋಷನ್ ಮೋಡ್ ಅಂತೂ ಅತ್ಯಂತ ಚೆನ್ನಾಗಿ ಕೆಲಸ ಮಾಡುತ್ತದೆ. ಎಲ್ಲ ಮೋಡ್‌ಗಳನ್ನೂ ಕ್ಯಾಮೆರಾ ತೆಗೆದಾಗಲೇ ಕಾಣಿಸುವಂತಾಗಬೇಕಿದ್ದರೆ, ಸೆಟ್ಟಿಂಗ್ಸ್‌ನಲ್ಲಿ ಕಸ್ಟಮೈಸ್ ಮಾಡಬಹುದಾಗಿದೆ. ಕ್ಯಾಮೆರಾ ವೃತ್ತಿಪರರು ಬಳಸುವ ಪ್ರೋ ಮೋಡ್ ಇದೆ. 48 ಮೆಗಾಪಿಕ್ಸೆಲ್ ಸಾಮರ್ಥ್ಯದ ಫೋಟೋ ತೆಗೆಯುವುದು ಇಲ್ಲೇ. ಇದನ್ನು ಬೇಕಿದ್ದಾಗ ಮಾತ್ರವೇ ಬಳಸಿಕೊಳ್ಳಬಹುದು. ಇಲ್ಲವೆಂದಾದರೆ, 48MP ಫೋಟೋಗಳಿಗೆ ಹೆಚ್ಚು ಮೆಮೊರಿ ಬೇಕಾಗುತ್ತದೆ. ಇದರಲ್ಲಿ ಸಾಮಾನ್ಯ ಜೆಪಿಜಿ, 48 MP ಹಾಗೂ ಕಚ್ಚಾ ಫೋಟೋಗಳನ್ನು ತೆಗೆಯುವ ಬಟನ್‌ಗಳಿವೆ. RAW (ಕಚ್ಚಾ) ಫೋಟೋ ಆಯ್ಕೆಯಲ್ಲೇ ಫೋಟೋದ ಸ್ಪಷ್ಟತೆ ಹೆಚ್ಚಿತ್ತು.


ಕಾರ್ಯಾಚರಣೆ
ವಿಶೇಷವಾಗಿ ಗೇಮಿಂಗ್ ಪ್ರಿಯರಿಗೆ ಇಷ್ಟವಾಗಬಲ್ಲ ವೈಶಿಷ್ಟ್ಯವೆಂದರೆ, QHD+ ರೆಸೊಲ್ಯುಶನ್‌ನಲ್ಲಿ 90 Hz ರಿಫ್ರೆಶ್ ರೇಟ್ ಇರುವುದು. ಇದರಿಂದಾಗಿ ಅತ್ಯಾಧುನಿಕ ಮೊಬೈಲ್ ಗೇಮ್‌ಗಳಲ್ಲಿ ಎಲ್ಲಿಯೂ ಲ್ಯಾಗಿಂಗ್‌ನ ಲಕ್ಷಣವೂ ಇಲ್ಲದಂತೆ, ಅದ್ಭುತವಾಗಿ ಕಾರ್ಯಾಚರಿಸಿದೆ. ಬಹುಶಃ ಸ್ಪೀಡ್ ಗೇಮಿಂಗ್‌ಗಳಿಗೆ ಅತ್ಯಂತ ಸೂಕ್ತವಾದ ಫೋನ್ ಆಗಿರುವುದರಿಂದಾಗಿಯೇ, 'ಬಿಯಾಂಡ್ ದಿ ಸ್ಪೀಡ್' ಅಂತ ಒನ್‌ಪ್ಲಸ್ ಕರೆದುಕೊಂಡಿದೆ. ಇನ್ನು, ಬ್ರೌಸಿಂಗ್ ಅಂತೂ ಮಲ್ಲಿಗೆ ಹೂವಿನಂತಹಾ ಮೃದುವಾದ ಅನುಭವ. ಫೇಸ್‌ಬುಕ್, ಟ್ವಿಟರ್, ಇನ್‌ಸ್ಟಾಗ್ರಾಂ ಮುಂತಾದ, ಗರಿಷ್ಠ ಬ್ಯಾಂಡ್‌ವಿಡ್ತ್ ಯಾಚಿಸುವ ಆ್ಯಪ್‌ಗಳಲ್ಲಿ ಸುಲಲಿತವಾಗಿ ಸ್ಕ್ರೋಲಿಂಗ್ ಸಾಧ್ಯವಾಯಿತು. ಕ್ಯಾಮೆರಾದ ಅದ್ಭುತ ಸಾಮರ್ಥ್ಯದ ಬಗ್ಗೆ ಎರಡು ಮಾತೇ ಇಲ್ಲ. ಇನ್ನು, ಇಷ್ಟೆಲ್ಲ ಭರ್ಜರಿ ವೈಶಿಷ್ಟ್ಯಗಳಿರುವಾಗ 4000 mAh ಬ್ಯಾಟರಿ ಕಡಿಮೆಯಾಯಿತೇನೋ ಎಂಬ ಭಾವನೆ ಬಂದರೂ, ಕ್ಷಿಪ್ರಗತಿಯ ಚಾರ್ಜಿಂಗ್ ವ್ಯವಸ್ಥೆ ಇರುವ ವಾರ್ಪ್ 30 ಚಾರ್ಜರ್, ಈ ಆತಂಕವನ್ನೂ ನಿವಾರಿಸಿದೆ. ಕೇವಲ 20 ನಿಮಿಷಗಳಲ್ಲಿ ಶೇ.50ರಷ್ಟು ಚಾರ್ಜ್ ಆಗುತ್ತದೆ.

ಒಟ್ಟಾರೆ ಹೇಗಿದೆ?ಎರಡು ವಾರ ಬಳಸಿ ನೋಡಿದಾಗ ಹೇಗನಿಸಿತು? ಒನ್‌ಪ್ಲಸ್ ಮತ್ತು ಇನ್ನೂ ಕೆಲವು ಚೀನೀ ಫೋನ್ ತಯಾರಕರು ಅಭಿಮಾನಿಗಳ ಸಲಹೆಗಳನ್ನು ಕೇಳಿ, ಅದಕ್ಕೆ ತಕ್ಕಂತೆ ತಮ್ಮ ಉತ್ಪನ್ನಗಳನ್ನು ರೂಪಿಸುತ್ತಿದ್ದಾರೆ. ಅದಕ್ಕೆ ಅನುಗುಣವಾಗಿ ರೂಪುಗೊಂಡಿದ್ದೇ ಒನ್‌ಪ್ಲಸ್ 7 ಪ್ರೋ. ಅದ್ಭುತ ಕ್ಯಾಮೆರಾ, ಅದ್ಭುತ ವೇಗದ ಗೇಮಿಂಗ್ ಜತೆಗೆ ಕರ್ವ್ ಆಗಿರುವ ಬೆಜೆಲ್ ಡಿಸ್‌ಪ್ಲೇ ಇರುವ, ಪೂರ್ಣ ಪರದೆಯಲ್ಲಿ ಚಿತ್ರ, ವೀಡಿಯೊ ವೀಕ್ಷಿಸಬಹುದಾದ ನಾಚ್ ಇಲ್ಲದ ಮತ್ತು ಪಾಪ್-ಅಪ್ ಸೆಲ್ಫೀ ಕ್ಯಾಮೆರಾದ 48 ಮೆಗಾಪಿಕ್ಸೆಲ್ ರೆಸೊಲ್ಯುಶನ್ ಫೋಟೋ ತೆಗೆಯಬಹುದಾದ ಅತ್ಯಾಧುನಿಕ ಫೋನ್ ಇದು. ಸುಲಲಿತವಾದ ಬ್ರೌಸಿಂಗ್, ಸಂಗೀತ ಆಲಿಸಲು ಸ್ಪೀಕರ್ ಫೋನ್‌ಗಳು, ಸೋನಿ ಸೆನ್ಸರ್ ಮೂಲಕ ಸ್ಪಷ್ಟ ಫೋಟೋ ಇದರ ಪ್ಲಸ್ ಪಾಯಿಂಟ್. ಇದು ಸ್ಟೈಲ್ ಸ್ಟೇಟಸ್ ಆಗುವುದಕ್ಕೂ ಸೂಕ್ತವಾದ ಫೋನ್.