Tecno Phantom 9: ಅಗ್ಗದ 'ಫ್ಲ್ಯಾಗ್‌ಶಿಪ್' ಫೋನ್

ಹಾಂಕಾಂಗ್ ಮೂಲದ ಟ್ರಾನ್ಸಿಯಾನ್ ಹೋಲ್ಡಿಂಗ್ಸ್ ಕಂಪನಿಯು ಟೆಕ್‌ನೋ ಮೊಬೈಲ್‌ಗಳ ಮೂಲಕ ಈಗಾಗಲೇ ಆಫ್‌ಲೈನ್ ಮಾರುಕಟ್ಟೆಯಲ್ಲಿ ನಿಧಾನವಾಗಿ ಗಮನ ಸೆಳೆಯುತ್ತಿದೆ. ಕ್ಯಾಮೆರಾ ಫೋನ್‌ಗಳಿಗಾಗಿ ಜನಪ್ರಿಯತೆ ಗಳಿಸಿರುವ ಈ ಕಂಪನಿಯು ಇತ್ತೀಚೆಗೆ ಫ್ಯಾಂಟಮ್ 9 ಹೆಸರಿನಲ್ಲಿ ಮಧ್ಯಮ ಬಜೆಟ್ ವಿಭಾಗದಲ್ಲಿ, ಪ್ರಸಿದ್ಧ ಮೊಬೈಲ್ ಕಂಪನಿಗಳಿಗೆ ಸ್ಫರ್ಧೆ ನೀಡುವ ನಿಟ್ಟಿನಲ್ಲಿ ಹೊಸ ಫ್ಲ್ಯಾಗ್‌ಶಿಪ್ ಫೋನನ್ನು ಭಾರತೀಯ ಮಾರುಕಟ್ಟೆಗೆ ಬಿಡುಗಡೆಗೊಳಿಸಿದೆ.

ಫ್ಲಿಪ್‌ಕಾರ್ಟ್ ಇ-ಕಾಮರ್ಸ್ ತಾಣದಲ್ಲಿ, 6 ಜಿಬಿ RAM ಹಾಗೂ 128GB ಆಂತರಿಕ ಮೆಮೊರಿಯ ಈ ಫೋನ್ 14,999 ರೂ. ಬೆಲೆಯಲ್ಲಿ ಲಭ್ಯವಿದೆ. ಇದನ್ನು ಎರಡು ವಾರ ಬಳಸಿ ನೋಡಿದೆ. ಹೇಗಿದೆ ಅಂತ ನೋಡೋಣ.

ಶಕ್ತಿಶಾಲಿ ಒಕ್ಟಾಕೋರ್ ಹೀಲಿಯೋ P35 (MTK 6765) ಪ್ರೊಸೆಸರ್, ಸ್ಕ್ರೀನ್ ಮೇಲಿನ ಫಿಂಗರ್‌ಪ್ರಿಂಟ್ ಸ್ಕ್ಯಾನರ್, ಮೂರು ಸೆನ್ಸರ್‌ಗಳಿರುವ (ತ್ರಿವಳಿ) ಹಿಂಬದಿ ಕ್ಯಾಮೆರಾ, ಸ್ಕ್ರೀನ್ ಮೇಲೆ ಕ್ಯಾಮೆರಾಕ್ಕೆ ಮಾತ್ರವೇ ಜಾಗ ಇರುವ ಡಾಟ್ ನಾಚ್, ಮುಂಭಾಗದಲ್ಲಿ ಡ್ಯುಯಲ್ ಫ್ಲ್ಯಾಶ್ ಹಾಗೂ 6ಜಿಬಿ RAM, 128 GB ಸ್ಟೋರೇಜ್ - ಹೀಗೆ ಅದ್ಭುತ ಸ್ಪೆಸಿಫಿಕೇಶನ್‌ಗಳಿರುವ ಈ ಫೋನ್, ತೀರಾ ಕಡಿಮೆ ಬೆಲೆಗೆ ದೊರೆಯುತ್ತಿರುವುದು ಈ ಫೋನ್‌ನ ಹೆಗ್ಗಳಿಕೆ.
ವಿನ್ಯಾಸ ಆಕರ್ಷಕವಾಗಿದ್ದು, ಈಗಿನ ಟ್ರೆಂಡ್‌ಗೆ ತಕ್ಕಂತಿದೆ. ಫ್ಲ್ಯಾಗ್‌ಶಿಪ್ ಫೋನ್‌ಗಳೆಲ್ಲ ಹೊಸ ಟ್ರೆಂಡ್ ಹುಟ್ಟುಹಾಕಿದ್ದು, ಅದಕ್ಕೆ ಅನುಗುಣವಾಗಿ ಗ್ರೇಡಿಯೆಂಟ್ ಬಣ್ಣದ ಹಿಂಭಾಗದ 3ಡಿ ಕವಚ ಈ ಫ್ಯಾಂಟಮ್‌ನಲ್ಲಿದೆ. ತೆಳುವಾದ (7.75ಮಿಮೀ) ಮತ್ತು ತೀರಾ ಹಗುರ (164 ಗ್ರಾಂ) ಇರುವುದು ಇದರ ಪ್ಲಸ್ ಪಾಯಿಂಟ್‌ಗಳಲ್ಲೊಂದು. ಕೈಯಲ್ಲಿ ಸುಲಭವಾಗಿ ಒಗ್ಗಿಕೊಳ್ಳುತ್ತದೆ ಮತ್ತು ಇದರ ಬಾಕ್ಸ್‌ನಲ್ಲೇ ಇದರ ಹಿಂಭಾಗದ ಕವಚಕ್ಕೆ ಬ್ಯಾಕ್ ಕವರ್ ನೀಡಲಾಗಿದೆ. ಇದು ಒಳ್ಳೆಯ ಗ್ರಿಪ್‌ಗೆ ಅನುಕೂಲ. 15 ಸಾವಿರದೊಳಗೆ ಸ್ಕ್ರೀನ್ ಮೇಲೆಯೇ ಫಿಂಗರ್‌ಪ್ರಿಂಟ್ ಅನ್‌ಲಾಕಿಂಗ್ ವ್ಯವಸ್ಥೆ ಇರುವ ಮೊದಲ ಫೋನ್ ಅಂತ ಕಂಪನಿಯೇ ಹೇಳಿಕೊಂಡಿದೆ. ಹಸಿರು ಬಣ್ಣದಲ್ಲಿ ಕಂಗೊಳಿಸುವ ಫಿಂಗರ್‌ಪ್ರಿಂಟ್ ಆಕರ್ಷಣೆ ನೀಡುತ್ತದೆ. ಫೇಸ್ ಅನ್‌ಲಾಕ್ ವ್ಯವಸ್ಥೆಯಂತೂ ಭಾರಿ ವೇಗದಲ್ಲಿ ಕೆಲಸ ಮಾಡುತ್ತದೆ.

ಕ್ಯಾಮೆರಾ
ಕಡಿಮೆ ಬೆಳಕಿನಲ್ಲಿ ಉತ್ತಮ ಫೋಟೋ ದೊರೆಯತ್ತದೆ ಎಂಬುದೇ ಟೆಕ್‌ನೋ ಫೋನ್‌ಗಳ ಘೋಷಾ ವಾಕ್ಯ. ಅದಕ್ಕೆ ತಕ್ಕಂತೆ ಹಿಂಭಾಗದಲ್ಲಿ 16 ಮಗಾಪಿಕ್ಸೆಲ್ ಪ್ರಧಾನ ಕ್ಯಾಮೆರಾ ಜತೆಗೆ 2 ಮೆಗಾಪಿಕ್ಸೆಲ್ ಡೆಪ್ತ್-ಸೆನ್ಸಿಂಗ್ ಲೆನ್ಸ್ ಇದೆ. ಇದು ಪೋರ್ಟ್ರೇಟ್ ಚಿತ್ರಗಳಿಗೆ ಹೆಚ್ಚಿನ ಸ್ಪಷ್ಟತೆ ನೀಡುತ್ತದೆ. ಇದರೊಂದಿಗೆ 8 ಮೆಗಾಪಿಕ್ಸೆಲ್‌ನ ಅಲ್ಟ್ರಾ-ವೈಡ್ ಲೆನ್ಸ್ ಇದೆ. ಇದು 120 ಡಿಗ್ರಿಯಷ್ಟು ವ್ಯಾಪಿಸುತ್ತದೆ. ಇಷ್ಟಲ್ಲದೆ, ಗೂಗಲ್ ಲೆನ್ಸ್ ಕೂಡ ಇಂಟಿಗ್ರೇಡ್ ಆಗಿಯೇ ಬಂದಿದೆ.

ಸೆಲ್ಫೀ ಬಗ್ಗೆ ಭಾರತೀಯರ ಆಸ್ಥೆ ಹೆಚ್ಚೇ ಇರುವುದನ್ನು ಮನಗಂಡಿರುವ ಕಂಪನಿಯು, ಮುಂಭಾಗದಲ್ಲಿ 32 ಮಗಾಪಿಕ್ಸೆಲ್ ಹೈ-ರೆಸೊಲ್ಯುಶನ್ ಸೆಲ್ಫೀ ಕ್ಯಾಮೆರಾ ಇರಿಸಿದೆಯಷ್ಟೇ ಅಲ್ಲದೆ, ಮಂದ ಬೆಳಕಿನಲ್ಲೂ ಉತ್ತಮ ಫೋಟೋ ಬರುವಂತಾಗಲು ಎರಡೆರಡು ಫ್ಯ್ಲಾಶ್ ಇವೆ. ಇದಲ್ಲದೆ, ವೈಡ್ ಆ್ಯಂಗಲ್ ಸೆಲ್ಫೀ ಎಂಬುದೊಂದು ವೈಶಿಷ್ಟ್ಯ ಗಮನ ಸೆಳೆದಿದೆ. ಫೋನ್ ಅಡ್ಡ ಹಿಡಿದು ಈ ಮೋಡ್ ಬಳಸಿದರೆ, ಗುಂಪಿನಲ್ಲಿ ಸೆಲ್ಫೀ ತೆಗೆಯುವುದು ಅನುಕೂಲಕರ.

ಕಾರ್ಯಾಚರಣೆ:
6 ಜಿಬಿ RAM ಮತ್ತು ಹೀಲಿಯೊ ಒಕ್ಟಾಕೋರ್ ಪ್ರೊಸಸರ್ ಮೂಲಕ ಹಲವು ಆ್ಯಪ್‌ಗಳನ್ನು ಏಕಕಾಲದಲ್ಲಿ ಬಳಸಿದರೆ, ಲ್ಯಾಗಿಂಗ್ ಎಂಬುದು ಅನುಭವಕ್ಕೆ ಬಂದಿಲ್ಲ. ಈಗ ಹೆಚ್ಚು ಮೆಮೊರಿ ಹಾಗೂ ವೇಗ ಬಯಸುವ ಗೇಮ್‌ಗಳನ್ನು ಆಡುವಾಗಲೂ ಸಮಸ್ಯೆಯಾಗಿಲ್ಲ. 3450 mAh ಸಾಮರ್ಥ್ಯದ ಬ್ಯಾಟರಿಯೂ ಸಾಮಾನ್ಯ ಬಳಕೆಯಲ್ಲಿ ಪೂರ್ತಿ ಚಾರ್ಜ್ ಆದರೆ ಎರಡು ದಿನ ಭರ್ತಿ ಬಳಕೆಯಾಗಿದೆ.

ಮತ್ತೊಂದು ವೈಶಿಷ್ಟ್ಯವೆಂದರೆ, ಸ್ಮಾರ್ಟ್ ಪ್ಯಾನೆಲ್. ಇದನ್ನು ಆನ್ ಮಾಡಿಟ್ಟುಕೊಂಡರೆ, ನಾವು ಪದೇ ಪದೇ ಬಳಸುವ ಆ್ಯಪ್‌ಗಳನ್ನು ಒಂದು ಕಡೆ ಇರಿಸಿ, ಈ ಟ್ರೇ ಮೂಲಕ ಶಾರ್ಟ್‌ಕಟ್ ಪ್ರವೇಶ ಪಡೆಯಬಹುದು. ಈ ಪ್ಯಾನೆಲ್‌ನ ಅಂಚು ಸ್ಕ್ರೀನ್ ಮೇಲೆ ಕಾಣಿಸುತ್ತಿರುತ್ತದೆ ಮತ್ತು ಅದನ್ನು ಸ್ಲೈಡ್ ಮಾಡಿದರೆ, ಅದರೊಳಗಿರುವ ಆ್ಯಪ್ ಶಾರ್ಟ್‌ಕಟ್‌ಗಳು ಕಾಣಿಸುತ್ತವೆ.

ಫ್ಲಿಪ್ ಮಾಡಿದರೆ ಮ್ಯೂಟ್ ಆಗಿಸುವ, ತಟ್ಟಿದರೆ ಸ್ಕ್ರೀನ್ ಎಚ್ಚರವಾಗಿಸುವ, ಮೂರು ಬೆರಳುಗಳಿಂದ ಮೇಲಿಂದ ಕೆಳಕ್ಕೆ ಎಳೆದರೆ ಸ್ಕ್ರೀನ್ ಶಾಟ್ ತೆಗೆಯುವ, ಕರೆ ಬರುತ್ತಿರುವಾಗ ಸೈಲೆಂಟ್ ಮಾಡಬೇಕಿದ್ದರೆ ಫೋನ್ ಮೇಲೆ ಕೈಯಿಂದ ಮುಚ್ಚುವುದು, ಫೋನ್ ಕೈಗೆತ್ತಿಕೊಂಡಾಗ ಸ್ಕ್ರೀನ್ ಆನ್ ಆಗುವ ಸ್ಮಾರ್ಟ್ ವೈಶಿಷ್ಟ್ಯಗಳೆಲ್ಲ ಇದರಲ್ಲಿದೆ. ಅದನ್ನು ನಾವು ಎನೇಬಲ್ ಮಾಡಬೇಕಷ್ಟೆ.

ಒಟ್ಟಾರೆ ಹೇಗಿದೆ?
ಅಗ್ಗದಲ್ಲಿ ಹೈಎಂಡ್ ಮೊಬೈಲುಗಳಲ್ಲಿರುವ ಅತ್ಯಾಧುನಿಕ ವೈಶಿಷ್ಟ್ಯಗಳ ಜತೆಗೆ, ಕಡಿಮೆ ಬೆಲೆಗೆ ಉತ್ತಮ ಮೌಲ್ಯ ಎಂಬುದಕ್ಕೆ ಕಟ್ಟುಬಿದ್ದವರಿಗೆ ಈ ಫೋನ್ ಹೊಂದುತ್ತದೆ. 6 ಜಿಬಿ RAM, 128 GB ಸ್ಟೋರೇಜ್, ಹಿಂಭಾಗದಲ್ಲಿ ತ್ರಿವಳಿ ಕ್ಯಾಮೆರಾ, ಮುಂಭಾಗದಲ್ಲಿ ಎರಡೆರಡು ಫ್ಲ್ಯಾಶ್ ಜತೆಗೆ 32 ಮೆಗಾಪಿಕ್ಸೆಲ್ ಸೆಲ್ಫೀ ಕ್ಯಾಮೆರಾ, ಫಿಂಗರ್‌ಪ್ರಿಂಟ್, ಅತ್ಯಾಧುನಿಕ ಆಂಡ್ರಾಯ್ಡ್ 9 ಕಾರ್ಯಾಚರಣಾ ವ್ಯವಸ್ಥೆ ಇರುವ ಹಗುರವಾದ ಫೋನ್ ಕೇವಲ 14,999 ರೂ.ಗೆ ಸಿಗುತ್ತದೆ ಎಂದಾದರೆ, ಯಾರಿಗೆ ಬೇಡ?