ಪೋಷಕರನ್ನು ಸೆಳೆಯಲು ಹೈಟೆಕ್‌ ತಂತ್ರ

ನಮ್ಮಲ್ಲಿ ಶಾಲೆ ಕಾಲೇಜುಗಳ ಹಂಗಾಮು ಈಗಷ್ಟೇ ಶುರುವಾಗಿದೆ. ಅಮೆರಿಕದ ಕೆಲ ಪ್ರಾಂತ್ಯಗಳಲ್ಲೂ ಇದೇ ಅವಧಿಯಲ್ಲಿ ಶೈಕ್ಷ ಣಿಕ ಋುತು ಆರಂಭವಾಗಿದ್ದು, ಪಠ್ಯಪರಿಕರಗಳನ್ನು ಖರೀದಿಸಲು ಪೋಷಕರ ಕಸರತ್ತು ಶುರುವಾಗಿದೆ. ಇಲ್ಲಿನಂತೆ ಎಲ್ಲವನ್ನೂ ತಾವೇ ತಂದುಕೊಡುವ ಉಸಾಬರಿಗೆ ಶಾಲೆಗಳು ಹೋಗುವುದಿಲ್ಲ. ಹೀಗಾಗಿ ಪೋಷಕರೇ ಮಳಿಗೆಗಳಿಗೆ ಹೋಗಬೇಕು. ಅಲ್ಲಿ ಇದು (ಬ್ಯಾಕ್‌ ಟು ಸ್ಕೂಲ್‌ ಸೇಲ್ಸ್‌) 800 ಶತಕೋಟಿ ಡಾಲರ್‌ ವಹಿವಾಟು. ಹೀಗಾಗಿ ವ್ಯಾಪಾರಿಗಳು ಪೋಷಕರನ್ನು ಸೆಳೆಯಲು ತಂತ್ರಜ್ಞಾನದ ಮೊರೆ ಹೋಗಿದ್ದಾರೆ. ಅಮೆರಿಕದ ಯಾರೊಬ್ಬರೂ ಆನ್‌ಲೈನ್‌ ರೀಸರ್ಚ್‌ ಮಾಡದೆ ಅಂಗಡಿಗಳಿಗೆ ನುಗ್ಗುವುದಿಲ್ಲ. ಆನ್‌ಲೈನ್‌ ರೇಟಿಂಗ್‌, ರಿವ್ಯೂಗಳನ್ನು ನೋಡಿ ಖರೀದಿ ನಿರ್ಧಾರ ಮಾಡುತ್ತಾರೆ. ಹೀಗಾಗಿ ಮಳಿಗೆಗಳು ಗ್ರಾಹಕರಿಗೆ ಮೋಡಿ ಮಾಡಲು ನಾನಾ ಬಗೆಯ 'ಕಂಟೆಂಟ್‌*ಗಳನ್ನು ರೂಪಿಸಿವೆ. ಎಲ್ಲರೂ ಒಂದು ಎನ್ನುವುದಕ್ಕಿಂತ ಪ್ರಾದೇಶಿಕ ಭಿನ್ನತೆಗಳನ್ನು ಗಮನದಲ್ಲಿಟ್ಟುಕೊಂಡು ಸಾಮಗ್ರಿಗಳು ಮತ್ತು ಪ್ರಚಾರದ ತಂತ್ರವನ್ನು ಬದಲಿಸಿವೆ. ಶೇ. 60ಕ್ಕಿಂತ ಹೆಚ್ಚು ಮಂದಿ ಸರ್ಚ್‌ ಮಾಡುವುದಕ್ಕೆ ಮೊಬೈಲ್‌ ಬಳಸುತ್ತಾರೆ. ಹೀಗಾಗಿ ಶಾಪರ್ಸ್‌ಗಳು ಮೊಬೈಲ್‌ ಅನ್ನೇ ಆಧಾರವಾಗಿಟ್ಟುಕೊಂಡು ಸಾಮಗ್ರಿ ವಿವರ, ಖರೀದಿ ಮತ್ತು ಪಾವತಿಯನ್ನು ರೂಪಿಸಿದ್ದಾರೆ. ಇದನ್ನೆಲ್ಲ ಕಂಡ ಮೇಲೆ ನಮ್ಮ ಶಾಲೆಗಳೇ ಬೆಸ್ಟ್‌ ಅಂದ್ಕೋಬೇಡಿ. ಏಕೆಂದರೆ ಇದೊಂದು ದೊಡ್ಡ ಲಾಭದ ಬಾಬ್ತು. ಕಣ್ಣು ಮುಚ್ಚಿಕೊಂಡು ಅದನ್ನು ಶಾಲೆಗಳ ಜೋಳಿಗಗೆ ಹಾಕಿರುತ್ತೀರಿ ಅಷ್ಟೆ.

ವಾಟ್ಸಾಪ್‌ನಲ್ಲಿ ಕಳಿಸಿದ್ದು ವಾಪಸ್‌ ಪಡೆಯಬಹುದು!

ವಾಟ್ಸಾಪ್‌ನಲ್ಲಿ ನೀವು ಕಳುಹಿಸುವ ಸಂದೇಶ, ಚಿತ್ರಗಳನ್ನು ಸ್ವೀಕರಿಸಿದವರು ನೋಡುವ ಮುನ್ನವೇ ಅದನ್ನು ವಾಪಸ್‌ ಪಡೆದುಕೊಂಡು ಎಡಿಟ್‌ ಮಾಡುವ ಅವಕಾಶವಿದ್ದರೆ? ಓಹ್‌ ಇದೊಂದು ಬೊಂಬಾಟ್‌ ಐಡಿಯಾ. ಇದು ಇದ್ದರೆ ಎಷ್ಟು ಚೆನ್ನಾಗಿರುತ್ತೆ ಎಂದು ಚಿಂತಿಸಬೇಡಿ ಏಕೆಂದರೆ ವಿಂಡೋಸ್‌ ಪೋನ್‌ಗಳಲ್ಲಿ ಇನ್ನು ಕೆಲವೇ ದಿನಗಳಲ್ಲಿ ಇಂಥ ಅವಕಾಶ ಲಭ್ಯವಾಗಲಿದೆ. ಕಳುಹಿಸಿದ ಮೇಲೆ ಕೈ ಕೈ ಹಿಸುಕಿಕೊಳ್ಳುವುದು ಮತ್ತೊಂದು ಮೆಸೇಜ್‌ ಕಳುಹಿಸಿ ಮೊದಲು ಕಳುಹಿಸಿದ್ದಕ್ಕೆ ತಿದ್ದುಪಡಿ ಮಾಡುವುದು ಈ ಎಲ್ಲ ರಗಳೆಗಳು ತಪ್ಪುತ್ತದೆ. ನಿಮಗೆ ನೆನಪಿರಲಿ ವಾಟ್ಸಾಪ್‌ ಅನ್ನು 180 ದೇಶಗಳ ನೂರು ಕೋಟಿ ಜನ ಬಳಸುತ್ತಿದ್ದಾರೆ.

ಐಪೋನ್‌ ವಿರುದ್ಧ qualcomm ಸಮರ

ಅಮೆರಿಕದಲ್ಲಿ ಕ್ವೆಲ್‌ಕಾಮ್‌ ಮತ್ತು ಐಪೋನ್‌ ನಡುವಣ ಸಮರ ತಾರಕಮುಟ್ಟಿದೆ. ಇದು ಎರಡು ಕಂಪನಿಗಳು ವ್ಯಾಪಾರ ವಹಿವಾಟಿನ ನಡುವಣ ಸಮರ ಎಂದು ಹೇಳಿದರೆ ಏನನ್ನೂ ಹೇಳಿದಂತಾಗುವುದಿಲ್ಲ. ನೈತಿಕ ಭೂಮಿಕೆಯನ್ನೇ ಪ್ರಶ್ನೆ ಮಾಡಿ ಐಪೋನ್‌ ಬುಡವನ್ನೇ ಅಲ್ಲಾಡಿಸಲು ಕ್ವೆಲ್‌ ಕಾಮ್‌ ಯತ್ನಿಸಿದೆ. ಅಮೆರಿಕದಲ್ಲಿ ಐಪೋನ್‌ ಶಿಪ್‌ಮೆಂಟ್‌ ಮಾಡಕೂಡದು. ಏಕೆಂದರೆ ಐಪೋನ್‌ ತನಗೆ ಒಡತನಕ್ಕೆ ಸೇರಿದ ಆರು ಪೇಟೆಂಟ್‌ಗಳನ್ನು ಉಲ್ಲಂಘನೆ ಮಾಡಿದೆ. ಬೌದ್ಧಿಕ ಸ್ವಾಮ್ಯದ ಅತಿಕ್ರಮಣದ ವಿರುದ್ಧ ಕಠಿಣ ಕ್ರಮ ಜರುಗಿಸಲಾಗುತ್ತಿದೆ ಎಂದು ಹೇಳಿಕೊಂಡಿದೆ.