ಕಾರಿನ ಮಾದರಿ, ನಂಬರ್ ಪರಿಶೀಲಿಸಿ
ಓಲಾ ಅಥವಾ ಉಬೆರ್ ಆ್ಯಪ್‌ ಮೂಲಕ ಕ್ಯಾಬ್ ಬುಕ್ ಮಾಡಿದ್ದರೆ, ನೀವು ಪ್ರಯಾಣದ ಆರಂಭಕ್ಕೂ ಮೊದಲು ನಿಮಗೆ ಆ್ಯಪ್‌ನಲ್ಲಿ ತೋರಿಸಿದ ಕಾರ್ ಮಾದರಿ, ಅದರಲ್ಲಿನ ನೋಂದಣಿ ಸಂಖ್ಯೆ ಎಲ್ಲವೂ ಸರಿಯಾಗಿದೆ ಎಂದು ಖಚಿತವಾದ ಬಳಿಕ ಮಾತ್ರ ಕ್ಯಾಬ್‌ನಲ್ಲಿ ಪ್ರಯಾಣಿಸಿ. ಜತೆಗೆ ಡ್ರೈವರ್‌ನ ವಿವರ, ಫೋಟೋ ನಿಮಗೆ ಆ್ಯಪ್‌ನಲ್ಲಿ ತೋರಿಸಿದಂತೆ ಇಲ್ಲವೆಂದಾದರೆ, ಪ್ರಯಾಣಿಸಲು ಮುಂದಾಗಬೇಡಿ. ಜತೆಗೆ ನಂಬರ್ ಪ್ಲೇಟ್ ಸಹಿತ ಕಾರಿನ ಫೋಟೋ ತೆಗೆದುಕೊಳ್ಳುವುದನ್ನು ಮರೆಯಬೇಡಿ.
ಚೈಲ್ಡ್ ಸೇಫ್ಟಿ ಲಾಕ್ ಪರಿಶೀಲಿಸಿ..
ಕಾರಿನ ಡೋರ್ ಲಾಕ್, ಚೈಲ್ಡ್ ಸೇಫ್ಟಿ ಲಾಕ್ ಪರಿಶೀಲಿಸಿ. ಕಾರಿನಲ್ಲಿ ಕುಳಿತ ಬಳಿಕ ಒಳಗಿನಿಂದ ಡೋರ್ ತೆಗೆಯಲು ಸಾಧ್ಯವಾಗದಿದ್ದರೆ, ಚೈಲ್ಡ್ ಸೇಫ್ಟಿ ಲಾಕ್ ಆನ್ ಆಗಿದೆ ಎಂದರ್ಥ. ಅದಕ್ಕಾಗಿ ಪ್ರಯಾಣಕ್ಕೂ ಮೊದಲು ಡ್ರೈವರ್ ಬಳಿ ಚೈಲ್ಡ್ ಸೇಫ್ಟಿ ಲಾಕ್ ಡಿಆಕ್ಟಿವೇಟ್ ಮಾಡುವಂತೆ ಸೂಚಿಸಿ. ನಂತರವೇ ಪ್ರಯಾಣಕ್ಕೆ ಮುಂದಾಗಿ.
ಶೇರ್ ಕ್ಯಾಬ್ ಬೇಡ
ಕ್ಯಾಬ್ ಬುಕ್ ಮಾಡಿ ಪ್ರಯಾಣಿಸುವಿರಾದರೆ, ಪ್ರೈವೇಟ್ ಅಥವಾ ಸಿಂಗಲ್ ಕ್ಯಾಬ್ ಬಳಸಿ. ಶೇರ್ ಕ್ಯಾಬ್ ಬೇಡ. ಅಲ್ಲದೆ, ನೀವು ಬುಕ್ ಮಾಡಿದ ಬಳಿಕ ಬಂದ ಕ್ಯಾಬ್‌ನಲ್ಲಿ ಮೊದಲೇ ಯಾರಾದರೂ ಪ್ರಯಾಣಿಕರಿದ್ದರೆ, ಆ ಸಂದರ್ಭದಲ್ಲಿ ಕ್ಯಾಬ್ ಹತ್ತಬೇಡಿ. ಅಲ್ಲದೆ, ಪಾರ್ಟಿಗೆಂದು ಮನೆಯಿಂದ ಹೊರಹೋಗುವ ಮೊದಲು, ನಿಮ್ಮ ನಗರದ ಗೂಗಲ್ ಆಫ್‌ಲೈನ್ ಮ್ಯಾಪ್ಸ್ ಡೌನ್‌ಲೋಡ್ ಮಾಡಿಕೊಳ್ಳಿ. ಇಂಟರ್‌ನೆಟ್ ಇಲ್ಲದಿದ್ದರೂ, ಆಫ್‌ಲೈನ್ ಮ್ಯಾಪ್ಸ್ ಕೆಲಸ ಮಾಡುತ್ತದೆ.
ಲೊಕೇಶನ್ ಶೇರ್ ಮಾಡಿ..
ಪಾರ್ಟಿಯ ಬಳಿಕ ಮನೆಗೆ ಕ್ಯಾಬ್‌ನಲ್ಲಿ ತೆರಳುವ ಸಂದರ್ಭದಲ್ಲಿ ನಿಮ್ಮ ಪ್ರಯಾಣದ ವಿವರವನ್ನು ಹಂಚಿಕೊಳ್ಳಿ. ಆ್ಯಪ್‌ನಲ್ಲಿ ಇರುವ ಶೇರ್ ಟ್ರಾವೆಲ್ ಡಿಟೇಲ್ಸ್ ಆಯ್ಕೆ, ವಾಟ್ಸಪ್ ಲೈವ್ ಲೊಕೇಶನ್ ಆಯ್ಕೆ ಮತ್ತು ಗೂಗಲ್ ಮ್ಯಾಪ್ ಮೂಲಕವೂ ನೀವು ಲೊಕೇಶನ್ ಶೇರ್ ಮಾಡಬಹುದು. ಜತೆಗೆ ವಾಯ್ಸ್ ರೆಕಾರ್ಡರ್ ಅನ್ನು ಆನ್ ಮಾಡಿಟ್ಟುಕೊಳ್ಳುವುದು ಸೂಕ್ತ. ಚಾಲಕ ಅನುಚಿತವಾಗಿ ವರ್ತಿಸಿದರೆ, ಇಲ್ಲವೆ, ಅವಾಚ್ಯ ಶಬ್ಧ ಬಳಸಿದರೆ ಅದನ್ನು ರೆಕಾರ್ಡ್ ಮಾಡಿಕೊಳ್ಳಲು ಅನುಕೂಲ.
ನಿದ್ದೆ ಮಾಡಬೇಡಿ.. ಎಚ್ಚರಿಕೆ ವಹಿಸಿ
ಕ್ಯಾಬ್ ಪ್ರಯಾಣದ ಸಂದರ್ಭ ನಿದ್ದೆ ಮಾಡಬೇಡಿ. ಆ್ಯಪ್‌ನಲ್ಲಿ ಇರುವ ತುರ್ತು ಪರಿಸ್ಥಿತಿಯ ಬಟನ್ ಬಗ್ಗೆ ಗಮನವಿರಲಿ. ಜತೆಗೆ ನಿಗದಿತ ರೂಟ್ ಬದಲು, ಬೇರೆ ರೂಟ್ ಬಳಸಿದರೆ ಅದಕ್ಕೆ ಅನುಮತಿ ಕೊಡಬೇಡಿ, ಟ್ರಾಫಿಕ್ ಇದ್ದರೂ ಪರವಾಗಿಲ್ಲ. ಸೂಕ್ತ ಮಾರ್ಗದಲ್ಲೇ ಚಲಿಸಿ. ಶಾರ್ಟ್‌ಕಟ್ ಆಯ್ಕೆ ಬೇಡ. ಫುಲ್ ಚಾರ್ಜ್ ಇರುವ ಪವರ್‌ಬ್ಯಾಂಕ್, ಚಾರ್ಜಿಂಗ್ ಕೇಬಲ್ ಜತೆಯಲ್ಲಿರಲಿ.