ಫಾಸ್ಟ್‌ಟ್ಯಾಗ್‌ ಎಂದರೇನು?
ಫಾಸ್ಟ್‌ಟ್ಯಾಗ್‌ ಎನ್ನುವುದು ಪ್ರೀಪೇಯ್ಡ್‌ ಟ್ಯಾಗ್‌ ಆಗಿದ್ದು, ಹೆದ್ದಾರಿಯಲ್ಲಿ ಹಾದುಹೋಗುವ ವಾಹನಗಳ ಸುಂಕವು ಸ್ವಯಂಚಾಲಿತವಾಗಿ ಕಡಿತಗೊಳ್ಳುತ್ತದೆ. ವಾಹನ ಮಾಲೀಕರು ಫಾಸ್ಟ್‌ಟ್ಯಾಗ್‌ಗಳನ್ನು ಎಸ್‌ಬಿಐ, ಐಸಿಐಸಿಐ ಬ್ಯಾಂಕ್‌, ಎಕ್ಸಿಸ್‌ ಬ್ಯಾಂಕ್‌, ಎಚ್‌ಡಿಎಫ್‌ಸಿ, ಪೇಟಿಎಂ ಪೇಮೆಂಟ್‌ ಬ್ಯಾಂಕ್‌ಗಳು, ಐಡಿಎಫ್‌ಸಿ ಫಸ್ಟ್‌ ಬ್ಯಾಂಕ್‌ಗಳಿಂದ ಖರೀದಿಸಬಹುದಾಗಿದೆ. ಅಷ್ಟು ಮಾತ್ರವಲ್ಲಇ-ಕಾಮರ್ಸ್‌ ತಾಣವಾದ ಅಮೆಜಾನ್‌ನಲ್ಲೂ ಫಾಸ್ಟ್‌ಟ್ಯಾಗ್‌ ಪಡೆಯಲು ಅವಕಾಶವಿದೆ.
ಆನ್‌ಲೈನ್‌ ಮೂಲಕ ಫಾಸ್ಟ್‌ಟ್ಯಾಗ್‌ ಪಡೆಯುವುದು ಹೇಗೆ?
ಮೊದಲಿಗೆ ಫಾಸ್ಟ್‌ಟ್ಯಾಗ್‌ಗಳನ್ನು ಅಧಿಕೃತವಾಗಿ ಮಾರಾಟ ಮಾಡುವ ಬ್ಯಾಂಕ್‌ಗಳ ವೆಬ್‌ಸೈಟ್‌ಗಳಿಗೆ ಭೇಟಿ ನೀಡಿ. ಬ್ಯಾಂಕ್‌ಗಳ ಮುಖಪುಟದಲ್ಲಿ(ಹೋಮ್‌ಪೇಜ್‌) ಕಾಣಿಸುವ Get FASTag/ Apply For FASTag ಎನ್ನುವ ಲಿಂಕ್‌ ಅನ್ನು ಕ್ಲಿಕ್‌ ಮಾಡಿ.
ವಾಹನ ಸಂಖ್ಯೆ, ವಿವರ ನಮೂದಿಸಿ
ನಿಮ್ಮ ಮೊಬೈಲ್‌ ಸಂಖ್ಯೆ ಎಂಟರ್‌ ಮಾಡಿ. ಬಳಿಕ ನಿಮ್ಮ ಮೊಬೈಲ್‌ಗೆ ಬರುವ ಒಟಿಪಿ ಹಾಕಿ ಸಬ್‌ಮಿಟ್‌ ಅನ್ನುವ ಆಯ್ಕೆಯನ್ನು ಕ್ಲಿಕ್‌ ಮಾಡಿ. ನಿಮ್ಮ ಹೆಸರು, ಇಮೇಲ್‌ ಐಡಿ, ವಿಳಾಸ, ವಾಹನದ ವಿವರಗಳನ್ನು(ಯಾವ ರೀತಿಯ ವಾಹನ, ನೋಂದಣಿ ಸಂಖ್ಯೆ ಇತ್ಯಾದಿ) ನೀಡಿ. ವಾಹನದ ಆರ್‌ಸಿ ಸೇರಿದಂತೆ ಅಗತ್ಯ ದಾಖಲೆಗಳ ಸ್ಕ್ಯಾ‌ನ್‌ ಮಾಡಿದ ಪ್ರತಿಗಳನ್ನು ಅಪ್‌ಲೋಡ್‌ ಮಾಡಿ.
ಪಾವತಿ ವಿಧಾನ ಆಯ್ಕೆ
ಅಂತಿಮ ಸಲ್ಲಿಕೆಗೆ ಮೊದಲು ಎಲ್ಲ ವಿವರಗಳನ್ನು ಪರಾಮರ್ಶಿಸಿ. ವಿವರಗಳನ್ನು ಆನ್‌ಲೈನ್‌ನಲ್ಲಿ ಸಲ್ಲಿಸಿದ ಬಳಿಕ, ಶುಲ್ಕ ಪಾವತಿಗೆ ಸಂಬಂಧಿಸಿದ ಆಯ್ಕೆಗಳು ನಿಮ್ಮ ಮುಂದೆ ತೆರೆದುಕೊಳ್ಳುತ್ತವೆ. ಫಾಸ್ಟ್‌ಟ್ಯಾಗ್‌ ರಸೀದಿ ಮತ್ತು ಪೇಮೆಂಟ್‌ ರಸೀದಿಗಳನ್ನು ಸೇವ್‌ ಮಾಡಿ. ಮುಂದಿನ ಕೆಲಸಗಳಿಗಾಗಿ ಪ್ರಿಂಟ್‌ಔಟ್‌ ಬೇಕಾದರೂ ತೆಗೆಯಬಹುದು. ರೆಫರೆನ್ಸ್‌ ನಂಬರ್‌ ಅನ್ನು ಸೇವ್‌ ಮಾಡಿ ಇಟ್ಟುಕೊಳ್ಳಿ.
ಆಫ್‌ಲೈನ್‌ನಲ್ಲಿ ಹೇಗೆ?
ವಾಹನದ ಮಾಲೀಕರು ಯಾವುದೇ ಟೋಲ್‌ಫ್ಲಾಜಾಗಳು ಇಲ್ಲವೇ, ಬ್ಯಾಂಕ್‌ ಶಾಖೆಗಳಿಗೆ ಖುದ್ದಾಗಿ ತೆರಳಿ ಫಾಸ್ಟ್‌ಟ್ಯಾಗ್‌ ಸಂಗ್ರಹಿಸಬಹುದು.
ಶುಲ್ಕಗಳೆಷ್ಟು?
ಫಾಸ್ಟ್‌ಟ್ಯಾಗ್‌ಗೆ ಒಂದು ಅವಧಿಯ ಶುಲ್ಕವಾಗಿ 200 ರೂ., ರೀಇಶ್ಯೂಯೆನ್ಸ್‌ ಶುಲ್ಕವಾಗಿ 100 ರೂ., ಮತ್ತು ಮರುಪಾವತಿಯ ಭದ್ರತಾ ಠೇವಣಿಯಾಗಿ 200 ರೂ. ಪಾವತಿಸಬೇಕಾಗಿದೆ. ವಾಹನದ ಮಾದರಿಗೆ ಅನುಸಾರವಾಗಿ ಭದ್ರತಾ ಠೇವಣಿ ಬದಲಾಗುತ್ತದೆ.
ಫಾಸ್ಟ್‌ಟ್ಯಾಗ್‌ ಖಾತೆ ರೀಚಾರ್ಜ್ ಮಾಡುವುದು ಹೇಗೆ?
ಫಾಸ್ಟ್‌ಟ್ಯಾಗ್‌ಗೆ ಸಂಬಂಧಿಸಿದ ಕಸ್ಟಮರ್‌ ಪೋರ್ಟಲ್‌ಗೆ ತೆರಳಿ, ಅಲ್ಲಿ ನಿಮ್ಮ ಖಾತೆಗೆ ಹಣ ತುಂಬಬಹುದು.