ಪ್ರತಿ ತಿಂಗಳು ಪಿಎಫ್ ಕಡಿತ
ಕಂಪನಿಯು ಪ್ರತಿ ತಿಂಗಳು ತಮ್ಮ ವೇತನದಿಂದ ಇಂತಿಷ್ಟು ಪರ್ಸೆಂಟ್ ಪಿಎಫ್ ಎಂದು ಕಡಿತಗೊಳಿಸಿ, ನೌಕರರ ಇಪಿಎಫ್ ಖಾತೆಗೆ ಜಮಾ ಮಾಡುತ್ತದೆ. ಹೀಗೆ ತಮ್ಮ ವೇತನದಿಂದ ಕಡಿತವಾದ ಹಣ ನಮ್ಮ ಪಿಎಫ್ ಖಾತೆಗೆ ಜಮಾ ಆಗುತ್ತದೋ ಇಲ್ಲವೋ ಎಂದು ನೌಕರರು ಪರಿಶೀಲಿಸಬಹುದು. ನಿಮ್ಮ ಪಿಎಫ್ ಖಾತೆಯ ಬ್ಯಾಲೆನ್ಸ್ ಪರೀಕ್ಷಿಸಲು ಅನೇಕ ಮಾರ್ಗಗಳಿವೆ. ಅವುಗಳಲ್ಲಿ ಅತೀ ಸರಳವಾದ ಮಾರ್ಗವೆಂದರೆ ಅದು ನಿಮ್ಮ ಸ್ಮಾರ್ಟ್‌ಫೋನ್ ಬಳಸಿ SMS ಮೂಲಕ ನಿಮ್ಮ ಅಕೌಂಟ್ ಬ್ಯಾಲೆನ್ಸ್ ತಿಳಿಯಬಹುದು. ನಿಮ್ಮ ಪಿಎಫ್ ಖಾತೆಯ ವಿವರಗಳನ್ನು ನಿಮ್ಮ ಸ್ಮಾರ್ಟ್‌ಫೋನ್ ಬಳಸಿ SMS ಮೂಲಕ ಪಡೆಯುವುದು ಹೇಗೆ ಎಂಬುದನ್ನು ತಿಳಿದುಕೊಳ್ಳೋಣ.
ಮೊದಲು ನಿಮ್ಮ UAN ಸಕ್ರಿಯಗೊಳಿಸಿ.
ಮೊದಲು ನಿಮ್ಮ UAN ( ಯುನಿವರ್ಸಲ್ ಅಕೌಂಟ್ ನಂಬರ್ UANನಿಮ್ಮ ಎಂಪ್ಲಾಯ್‌ ಪ್ರಾವಿಡೆಂಟ್ ಫಂಡ್ ಅನ್ನು ಡೆಪಾಸಿಟ್ ಮಾಡುವ ಅಕೌಂಟ್ ಆಗಿರುತ್ತದೆ.) ಸಕ್ರಿಯವಾಗಿದೆಯೋ ಇಲ್ಲವೋ ಎಂದು ಖಚಿತಪಡಿಸಿಕೊಳ್ಳಿ. ಇಪಿಎಫ್ ವೆಬ್ಸೈಟ್ಗೆ ಭೇಟಿ ನೀಡಿ, ಕೆಲವು ಸರಳ ಹಂತಗಳನ್ನು ಅನುಸರಿಸುವುದರ ಮೂಲಕ ನೀವು ನಿಮ್ಮ UAN ಸಕ್ರಿಯವಾಗಿದೆಯೋ ಇಲ್ಲವೋ ಎಂದು ತಿಳಿದುಕೊಳ್ಳಬಹುದು.
ಒಂದುವೇಳೆ ನಿಮ್ಮ UAN ಸಕ್ರಿಯಗೊಂಡಿಲ್ಲವಾದರೆ, ಇಪಿಎಫ್ ವೆಬ್ಸೈಟ್ಗೆ ಭೇಟಿ ನೀಡಿ, ಆಕ್ಟಿವೇಟ್ UAN ಆಯ್ಕೆಯನ್ನು ಕ್ಲಿಕ್ ಮಾಡಿ. ನಂತರ ತೆರೆದುಕೊಳ್ಳುವ ವಿಂಡೋದಲ್ಲಿ, ನಿಮ್ಮ UAN (ಸಾಮಾನ್ಯವಾಗಿ ನಿಮ್ಮ ಪೇಸ್ಲಿಪ್‌ನಲ್ಲಿ UAN ಮತ್ತಿತರ ಪಿಎಫ್ ಖಾತೆಗೆ ಸಂಬಂಧ ಪಟ್ಟ ವಿವರ ಇರುತ್ತವೆ )ಹುಟ್ಟಿದ ದಿನಾಂಕ, ಮೊಬೈಲ್ ನಂಬರ್ ಸಹಿತ ಅಗತ್ಯವಿರುವ ಎಲ್ಲ ವಿವರ ತುಂಬಿ. ವಿಂಡೋ ಕೆಳಗಿರುವ 'ಪಿನ್ ಪಡೆಯಿರಿ ' ಎಂಬ ಆಯ್ಕೆಯ ಮೇಲೆ ಕ್ಲಿಕ್ ಮಾಡಿ.
ಹೀಗೆ ಮಾಡಿದ ಕೂಡಲೇ ಮೇಲೆ ನೀವು ನಮೂದಿಸಿದ ಮೊಬೈಲ್ ಸಂಖ್ಯೆಗೆ ಒಟಿಪಿ ಬರುತ್ತದೆ.
ಮೊಬೈಲ್‌ಗೆ ಬಂದ ಒಟಿಪಿಯನ್ನು ವೆಬ್‌ಸೈಟ್‌ನಲ್ಲಿ ತೆರೆದುಕೊಂಡ ಒಟಿಪಿ ವಿಂಡೋದಲ್ಲಿ ನಮೂದಿಸಿ, 'ವೆರಿಫೈ ಒಟಿಪಿ' ಆಯ್ಕೆಯ ಮೇಲೆ ಕ್ಲಿಕ್ ಮಾಡಿ, ನಿಮ್ಮ UAN ಅನ್ನು ಸಕ್ರಿಯಗೊಳಿಸಿ.
ಹೀಗೆ ಮಾಡಿದ ನಂತರ ನಿಮ್ಮ UAN ಸಕ್ರಿಯಗೊಳ್ಳಲು 5-7 ಗಂಟೆಗಳ ಕಾಲ ತೆಗೆದುಕೊಳ್ಳಬಹುದು.
SMS ಮೂಲಕ ಇಪಿಎಫ್ ಖಾತೆ ವಿವರ ತಿಳಿದುಕೊಳ್ಳುವುದು ಹೇಗೆ?
ನಿಮ್ಮ UAN ಸಕ್ರಿಯಗೊಂಡ ನಂತರ
ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ಮೆಸೇಜಿಂಗ್ ಅಪ್ಲಿಕೇಶನ್ ತೆರೆಯಿರಿ
EPFOHO<space>UAN ನಂಬರ್ ಟೈಪ್ ಮಾಡಿ
ಅದನ್ನು 7738299899 ಗೆ ಕಳುಹಿಸಿ
ಹೀಗೆ ಮಾಡಿದರೆ ಪಿಎಫ್ ಖಾತೆದಾರರು ತಮ್ಮ ಪಿಎಫ್ ಬ್ಯಾಲೆನ್ಸ್ ಸೇರಿದಂತೆ ಇಪಿಎಫ್ ಖಾತೆಯ ಎಲ್ಲ ವಿವರಗಳನ್ನು ಎಸ್ ಎಂಎಸ್ ಮೂಲಕ ಪಡೆಯಬಹುದು.
.