iPhone Photo Sharing: ಕಂಪ್ಯೂಟರ್‌ಗೆ ವರ್ಗಾಯಿಸುವುದು ಹೇಗೆ?

ಆ್ಯಪಲ್‌ನ ಜನಪ್ರಿಯ ಐಫೋನ್ ಉತ್ತಮ ಕ್ಯಾಮರಾ ಹೊಂದಿದ್ದು, ಅದರಲ್ಲಿ ತೆಗೆದ ಚಿತ್ರಗಳು ಚೆನ್ನಾಗಿರುತ್ತದೆ. ಚಿತ್ರದ ರೆಸೊಲ್ಯೂಶನ್ ಕೂಡ ಉತ್ತಮವಾಗಿರುತ್ತದೆ. ಆದರೆ ಐಫೋನ್‌ನ ಫೋಟೋಗಳು ಐಕ್ಲೌಡ್‌ನಲ್ಲಿ ಶೇಖರಗೊಳ್ಳುತ್ತವೆ.

ಪ್ರತಿ ಐಕ್ಲೌಡ್ ಖಾತೆ 5 ಜಿಬಿ ಉಚಿತ ಸ್ಟೋರೇಜ್ ಹೊಂದಿರುತ್ತದೆ. ಐಕ್ಲೌಡ್ ಸ್ಟೋರೇಜ್ ಬೇಡ ಎಂದಾದಲ್ಲಿ ಇತರ ವಿಧಾನದ ಮೂಲಕ ಐಫೋನ್, ಐಪ್ಯಾಡ್ ಅಥವಾ ಐಪಾಡ್ ಟಚ್‌ ಮೂಲಕ ತೆಗೆದ ಫೋಟೋಗಳನ್ನು ಕಂಪ್ಯೂಟರ್ ಅಥವಾ ಮ್ಯಾಕ್‌ಬುಕ್‌ನಲ್ಲಿ ಶೇಖರಿಸಿಟ್ಟುಕೊಳ್ಳಬಹುದು.

ಈ ಕುರಿತ ಸರಳ ವಿಧಾನವನ್ನು ಇಲ್ಲಿ ತಿಳಿಸಲಾಗಿದೆ.
ಬೇಕಾಗಿರುವುದೇನು?
ಆ್ಯಪಲ್‌ ಐಟ್ಯೂನ್ಸ್‌ನ 12.5.1 ಅಥವಾ ಅದಕ್ಕೂ ಮೇಲ್ಪಟ್ಟ ಆವೃತ್ತಿ
ಲೈಟನಿಂಗ್ ಡಾಟಾ ಕೇಬಲ್

ಆ್ಯಪಲ್‌ ಮ್ಯಾಕ್ ಕಂಪ್ಯೂಟರ್‌ಗೆ ಐಫೋನ್ ಫೋಟೋ ವರ್ಗಾಯಿಸುವ ವಿಧಾನ
ಯುಎಸ್‌ಬಿ ಕೇಬಲ್ ಮೂಲಕ ಐಫೋನ್ ಅಥವಾ ಐಪಾಡ್ ಕನೆಕ್ಟ್ ಮಾಡಿ.
ಆ್ಯಪಲ್‌ ಡಿವೈಸ್‌ನಲ್ಲಿ ಟ್ರಸ್ಟ್‌ ಎಂದು ಕೊಡುವ ಮೂಲಕ, ಐಫೋನ್/ಐಪಾಡ್ ಅನ್‌ಲಾಕ್ ಮಾಡಿ.
ಅದಾದ ಬಳಿಕ ಮ್ಯಾಕ್‌ನಲ್ಲಿ ಫೋಟೋಸ್ ಆ್ಯಪ್ ತಾನಾಗಿಯೇ ತೆರೆದುಕೊಳ್ಳುತ್ತದೆ.

ನಂತರ, ಐಫೋನ್/ಐಪಾಡ್‌ನಲ್ಲಿರುವ ಪೋಟೋಗಳು ಮ್ಯಾಕ್‌ನಲ್ಲಿ ಫೋಟೋಸ್ ಆ್ಯಪ್‌ನಲ್ಲಿ ಕಾಣಿಸಿಕೊಳ್ಳುತ್ತದೆ. ಜತೆಗೆ ಅಲ್ಲಿ ಇಂಪೋರ್ಟ್ ಮಾಡಿಕೊಳ್ಳುವ ಆಯ್ಕೆ ಕೂಡ ಇರುತ್ತದೆ.
ಅಲ್ಲಿ ನೀವು ಯಾವ ಫೋಟೋ ವರ್ಗಾಯಿಸಿಟ್ಟುಕೊಳ್ಳಬೇಕು ಎಂದು ಆಯ್ಕೆ ಮಾಡಿ, ಬಳಿಕ ಇಂಪೋರ್ಟ್ ಎಂದು ಕೊಟ್ಟರೆ ಮುಗಿಯಿತು.

Gmail Password: ಬದಲಾಯಿಸುವುದು ಹೇಗೆ? ಇಲ್ಲಿದೆ ಓದಿ

ವಿಂಡೋಸ್ ಕಂಪ್ಯೂಟರ್‌ನಲ್ಲಿ
ಆ್ಯಪಲ್‌ ಮ್ಯಾಕ್ ಮಾತ್ರವಲ್ಲದೆ, ವಿಂಡೋಸ್ ಮೂಲಕವೂ ಐಫೋನ್/ಐಪ್ಯಾಡ್‌ನ ಫೋಟೋಗಳನ್ನು ವರ್ಗಾಯಿಸಿಟ್ಟುಕೊಳ್ಳಬಹುದು.
ಅದಕ್ಕಾಗಿ ಐಟ್ಯೂನ್ಸ್‌ನ ಇತ್ತೀಚಿನ ವಿಂಡೋಸ್ ಪಿಸಿ ಆವೃತ್ತಿ ಡೌನ್‌ಲೋಡ್ ಮಾಡಿ, ಇನ್‌ಸ್ಟಾಲ್ ಮಾಡಿಟ್ಟುಕೊಳ್ಳಿ.

ಯುಎಸ್‌ಬಿ ಕೇಬಲ್ ಮೂಲಕ ಫೋನ್ ಅನ್ನು ಕಂಪ್ಯೂಟರ್/ಲ್ಯಾಪ್‌ಟಾಪ್‌ಗೆ ಸಂಪರ್ಕಿಸಿ.
ಐಟ್ಯೂನ್ಸ್‌ನಲ್ಲಿ ಫೋಟೋಸ್ ಆ್ಯಪ್ ಓಪನ್ ಮಾಡಿ.

ಕಂಪ್ಯೂಟರ್ ಅನ್ನು ಟ್ರಸ್ಟ್ ಎಂದು ಕೊಟ್ಟು, ಪಾಸ್‌ವರ್ಡ್ ನಮೂದಿಸಿ.
ನಂತರ ಬಲತುದಿಯಲ್ಲಿನ ಇಂಪೋರ್ಟ್ ಆಯ್ಕೆ ಕೊಡಿ.

ಅಲ್ಲಿ ಫೋಲ್ಡರ್ ಆಯ್ಕೆ ಮಾಡಿಕೊಳ್ಳಬಹುದು. ನಂತರ ಆಯ್ದ ಫೋಟೋಗಳನ್ನು ಕಂಪ್ಯೂಟರ್‌ಗೆ ಟ್ರಾನ್ಸ್‌ಫರ್ ಮಾಡಿಕೊಳ್ಳಿ.

ಹಳೆಯ ವಿಂಡೋಸ್ ಆವೃತ್ತಿ ಆಗಿದ್ದರೆ, ಅಥವಾ ಐಟ್ಯೂನ್ಸ್ ಬೇಕಾಗಿಲ್ಲ ಎಂದಾದರೆ, ವಿಂಡೋಸ್ ಬಳಕೆದಾರರು, ಐಫೋನ್ ಸಂಪರ್ಕಿಸಿದ ಬಳಿಕ, ಮೈ ಕಂಪ್ಯೂಟರ್‌ನ ಫೋಲ್ಡರ್ ಎಕ್ಸ್‌ಪ್ಲೋರರ್ ಮೂಲಕ, ಐಫೋನ್ ಸ್ಟೋರೇಜ್ ಫೋಲ್ಡರ್ ಓಪನ್ ಮಾಡಿ, ಅಲ್ಲಿ ಕಾಣಿಸುವ ಫೋಟೋಸ್‌ಗಳನ್ನು ಫೋಲ್ಡರ್ ಸಮೇತ ಇಲ್ಲವೇ ಪ್ರತ್ಯೇಕವಾಗಿ ಕಾಪಿ ಮಾಡಿಟ್ಟುಕೊಳ್ಳಬಹುದು.
ವಿಂಡೋಸ್‌ 10ನಲ್ಲೂ ಈ ವಿಧಾನ ಅನುಸರಿಸಲು ಅಡ್ಡಿಯಿಲ್ಲ.

WhatsApp Lock: ಚಾಟ್ ಸುರಕ್ಷತೆಗೆ ಬೆರಳಚ್ಚು ಲಾಕ್