ಅರ್ಹ ಬಳಕೆದಾರರಿಗೆ ಮಾತ್ರ ಲಭ್ಯ
ಮೊಬೈಲ್ ನಂಬರ್ ಪೋರ್ಟೆಬಿಲಿಟಿ ಸೌಲಭ್ಯ ಅರ್ಹ ಬಳಕೆದಾರರಿಗೆ ಮಾತ್ರ ಲಭ್ಯವಾಗಲಿದೆ. ಅಂದರೆ ನಿಮ್ಮ ಮೊಬೈಲ್ ಸಂಖ್ಯೆ ಪೋರ್ಟೆಬಿಲಿಟಿಗೆ ಒಳಪಡಲು, ಟ್ರಾಯ್ ನಿಯಮದ ಅನುಸಾರ ಅರ್ಹತೆ ಪಡೆದಿದ್ದರೆ ಮಾತ್ರ ನಿಮಗೆ ಪೋರ್ಟ್ ಲಭ್ಯವಾಗುತ್ತದೆ. ಇಲ್ಲದಿದ್ದರೆ, ಚಂದಾದಾರರಿಗೆ ಎಂಎನ್‌ಪಿ ದೊರೆಯುವುದಿಲ್ಲ.
ಯಾವುದೇ ಬಾಕಿ ಉಳಿಸಿಕೊಳ್ಳುವಂತಿಲ್ಲ
ನೀವು ಮೊಬೈಲ್ ನಂಬರ್ ಮತ್ತೊಂದು ನೆಟ್‌ವರ್ಕ್‌ಗೆ ಪೋರ್ಟ್ ಮಾಡಿಕೊಳ್ಳಲು ಬಯಸಿದ್ದರೆ, ಅದಕ್ಕೂ ಮುಂಚೆ ಹಳೆಯ ಕಂಪನಿಗೆ ಬಾಕಿ ಉಳಿಸಿಕೊಂಡಿರುವ ಎಲ್ಲ ಬಿಲ್ ಮೊತ್ತವನ್ನು ಪಾವತಿಸಿರಬೇಕು. ಅಂದರೆ ವಿಶೇಷವಾಗಿ, ಪೋಸ್ಟ್ ಪೋಯ್ಡ್ ಗ್ರಾಹಕರು, ತಿಂಗಳ ಬಿಲ್ ಮೊತ್ತ ಬಾಕಿ ಉಳಿಸಿಕೊಂಡಿದ್ದರೆ, ಅದನ್ನು ಟೆಲಿಕಾಂ ಸೇವಾದಾರ ಕಂಪನಿಗೆ ಪಾಲಿಸುವುದು ಕಡ್ಡಾಯ. ಬಾಕಿ ಉಳಿಸಿಕೊಂಡಿದ್ದರೆ, ಪೋರ್ಟಿಂಗ್ ಸಾಧ್ಯವಾಗುವುದಿಲ್ಲ.
ಟ್ರಾಯ್ ನೂತನ ನಿಯಮ
ಯಾವುದೇ ನೆಟ್‌ವರ್ಕ್‌ಗೆ ಪೋರ್ಟ್ ಆಗಬೇಕಾದರೂ, ಪ್ರಸ್ತುತ ಇರುವ ನೆಟ್‌ವರ್ಕ್‌ನಲ್ಲಿ ಕನಿಷ್ಟ 90 ದಿನ ಪೂರೈಸಬೇಕು. ಅದಕ್ಕೂ ಮುಂಚೆ ಮತ್ತೊಂದು ನೆಟ್‌ವರ್ಕ್‌ಗೆ ಪೋರ್ಟ್ ಸಾಧ್ಯವಿಲ್ಲ. ಅಲ್ಲದೆ, ಸಿಮ್ ಕಾರ್ಡ್ ಹೊಂದಿರುವ ವ್ಯಕ್ತಿ ಮತ್ತೋರ್ವ ವ್ಯಕ್ತಿಗೆ ಮಾಲಿಕತ್ವ ಹಸ್ತಾಂತರಿಸುವ ಪ್ರಕ್ರಿಯೆ ಜಾರಿಯಲ್ಲಿದ್ದರೆ, ಅಂತಹ ಸಂದರ್ಭದಲ್ಲಿ ಎಂಎನ್‌ಪಿ ಸಾಧ್ಯವಾಗುವುದಿಲ್ಲ.
ಸೇವಾದಾರರ ನಿಯಮ ಗಮನಿಸಬೇಕು
ಒಂದು ನೆಟ್‌ವರ್ಕ್‌ನಿಂದ ಮತ್ತೊಂದು ನೆಟ್‌ವರ್ಕ್‌ಗೆ ತೆರಳುವಾಗ ಕಾಂಟ್ರಾಕ್ಟ್ ಮತ್ತಿತರ ಯಾವುದೇ ಬಾಕಿಯನ್ನು ಉಳಿಸಿಕೊಳ್ಳುವಂತಿಲ್ಲ. ಸೂಕ್ತ ಕಾರಣ ನೀಡಿ ಎಂಎನ್‌ಪಿಗೆ ಬದಲಾಯಿಸಿಕೊಳ್ಳಬಹುದು. ಅಲ್ಲದೆ ಪೋರ್ಟ್‌ಗೆ ಒಳಗಾಗುತ್ತಿರುವ ಮೊಬೈಲ್ ಸಂಖ್ಯೆ ಯಾವುದೇ ರೀತಿಯಲ್ಲಿ ನ್ಯಾಯಾಲಯದ ನಿರ್ಬಂಧಕ್ಕೆ ಒಳಗಾಗಿರಬಾರದು.
ಎರಡೇ ದಿನದಲ್ಲಿ ಪೋರ್ಟಿಂಗ್
ಮೊಬೈಲ್ ನಂಬರ್ ಪೋರ್ಟೆಬಿಲಿಟಿಗೆ ಈ ಮೊದಲು ಕನಿಷ್ಠ 96 ಗಂಟೆ ವ್ಯಯಿಸಲಾಗುತ್ತಿತ್ತು. ಆದರೆ ಈಗ ಅದರ ಬದಲು, ಕೇವಲ 48 ಗಂಟೆಯಲ್ಲಿ ಪೋರ್ಟ್ ಪ್ರಕ್ರಿಯೆ ಪೂರೈಸಲು ಟ್ರಾಯ್ ಸೂಚನೆ ನೀಡಿದೆ. ಅಂದರೆ ಪೋರ್ಟ್ ಮಾಡಿಕೊಳ್ಳಲು ಕೋರಿದ 48 ಗಂಟೆಯಲ್ಲೇ ನಿಮ್ಮ ನಂಬರ್ ಅರ್ಹವಾಗಿದ್ದರೆ, ಮತ್ತೊಂದು ನೆಟ್‌ವರ್ಕ್‌ಗೆ ಪೋರ್ಟ್ ಆಗುತ್ತದೆ. ಯುನಿಕ್ ಪೋರ್ಟಿಂಗ್ ಕೋಡ್, ಯುಪಿಸಿ, 4 ದಿನದ ವ್ಯಾಲಿಡಿಟಿ ಹೊಂದಿರುತ್ತದೆ. ಆದರೆ ಜಮ್ಮು-ಕಾಶ್ಮೀರ, ಅಸ್ಸಾಂ, ಈಶಾನ್ಯ ರಾಜ್ಯಗಳಲ್ಲಿ 30 ದಿನ ವ್ಯಾಲಿಡಿಟಿ ಇರಲಿದೆ.
ಎಂಎನ್‌ಪಿ ಶುಲ್ಕವೆಷ್ಟು?
ಎಂಎನ್‌ಪಿಗೆ ಪ್ರಸ್ತುತ 6.46 ರೂ. ಶುಲ್ಕ ನಿಗದಿಪಡಿಸಲಾಗಿದೆ. ಸೇಮ್ ಸರ್ಕಲ್‌ನಲ್ಲಾದರೆ, 3 ದಿನ, ಇತರ ಸರ್ಕಲ್ ಆದರೆ 5 ದಿನದೊಳಗೆ ಎಂಎನ್‌ಪಿ ಆಗಲಿದೆ. ಅಲ್ಲದೆ, ಕಾರ್ಪೊರೇಟ್ ಮೊಬೈಲ್ ಸಂಪರ್ಕಕ್ಕೆ ಕೂಡ ಇದೇ ನಿಯಮ ಅನ್ವಯವಾಗಲಿದೆ.
ಮೊಬೈಲ್ ನಂಬರ್ ಪೋರ್ಟ್ ಮಾಡುವುದು ಹೇಗೆ?
ನಿಮ್ಮ ಈಗಿರುವ ಮೊಬೈಲ್‌ನಿಂದ PORT ಎಂದು ಟೈಪ್ ಮಾಡಿ, ಬಳಿಕ ಒಂದು ಸ್ಪೇಸ್ ಕೊಟ್ಟು 10 ಅಂಕಿಗಳ ಮೊಬೈಲ್ ಸಂಖ್ಯೆಯನ್ನು ಟೈಪ್ ಮಾಡಿ. ಅದನ್ನು 1900ಗೆ ಎಸ್‌ಎಂಎಸ್ ಮಾಡಿ. ಅದಾದ ಬಳಿಕ, ನಿಮಗೆ ಪೋರ್ಟಿಂಗ್ ಕೋಡ್ ಎಸ್‌ಎಂಎಸ್ ಮೂಲಕ ಬರುತ್ತದೆ. ನಂತರ ಯಾವ ನೆಟ್‌ವರ್ಕ್‌ಗೆ ನೀವು ಪೋರ್ಟ್ ಮಾಡಬಯಸುವಿರಾ, ಅಲ್ಲಿನ ಸಮೀಪದ ಕಸ್ಟಮರ್ ಕೇರ್ ಸೆಂಟರ್ ಅಥವಾ ಸಿಮ್ ಮಾರಾಟ ಕೇಂದ್ರಕ್ಕೆ ತೆರಳಿ. ನಂತರ ಅಲ್ಲಿ ಅರ್ಜಿ ಫಾರಂ ತುಂಬಿ, ಶುಲ್ಕ ಪಾವತಿಸಿ. ಕೆವೈಸಿ ದಾಖಲೆ ಸಲ್ಲಿಸಿದ ಬಳಿಕ, ನಿಮ್ಮ ಪೋರ್ಟ್ ಪ್ರಕ್ರಿಯೆ ಪೂರ್ಣಗೊಳಿಸಿ, ನಿಮಗೆ ಹೊಸ ಸಿಮ್ ನೀಡುತ್ತಾರೆ. ಬಳಿಕವೂ ನಿಮಗೆ ಪೋರ್ಟ್ ಬೇಡವೆಂದಾದಲ್ಲಿ, ಅದನ್ನು ಕ್ಯಾನ್ಸಲ್ ಮಾಡಲು ಅವಕಾಶವಿದೆ.