14ರ ಪೋರ 5 ಕೋಟಿ ಒಪ್ಪಂದಕ್ಕೆ ಸಹಿ ಹಾಕಿದ!

ಗುಜರಾತ:ಸಾಮಾನ್ಯವಾಗಿ 14ನೇ ವಯಸ್ಸಿನಲ್ಲಿರೋ ಹುಡುಗ-ಹುಡುಗಿಯರು ಸದ್ಯಕ್ಕೆ ಶಾಲೆ ಹಾಗೂ ಪರೀಕ್ಷೆ ಎಂಬ ಒತ್ತಡದಲ್ಲಿರ್ತಾರೆ. ಪರೀಕ್ಷೆಯನ್ನ ಎದುರಿಸಲು ಸಕಲ ಸಿದ್ಧತೆಗಳನ್ನ ಮಾಡಿಕೊಳ್ಳುತ್ತಿರುತ್ತಾರೆ. ಆದರೆ ಇಲ್ಲೊಬ್ಬ ಅಸಾಮಾನ್ಯ ಬಾಲಕನಿದ್ದಾನೆ. ಅವನ ಸಾಧನೆಯನ್ನ ಕೇಳಿದರೆ ನಿಮಗೆ ಅಚ್ಚರಿಯಾಗೋದಂತೂ ಗ್ಯಾರಂಟಿ.

ಯೆಸ್‌, ಹರ್ಷವರ್ಧನ್‌ ಜಾಲಾ ಎಂಬ ಕೇವಲ 14 ವಯಸ್ಸಿನ ಪೋರ ಎಲ್ಲರನ್ನೂ ಬೆರಗುಗೊಳಿಸುವಂಥ ಸಾಧನೆ ಮಾಡಿದ್ದಾನೆ. ಒಂದಲ್ಲ ಎರಡಲ್ಲ ಬರೋಬ್ಬರಿ 5 ಕೋಟಿ ಒಪ್ಪಂದಕ್ಕೆ ಸಹಿ ಹಾಕುವ ಮೂಲಕ ವೈಬ್ರಂಟ್‌ ಗುಜರಾತ್‌ ಜಾಗತಿಕ ಶೃಂಗಸಭೆಯಲ್ಲಿ ಸದ್ದು ಮಾಡಿದ್ದಾನೆ. ಸಣ್ಣ ವಯಸ್ಸಿನಲ್ಲೇ ವಿಶಿಷ್ಟ ಬಗೆಯ ಡ್ರೋನ್‌ ಸಂಶೋಧಿಸುವ ಮೂಲಕ ಒಂದು ದೊಡ್ಡ ಮಟ್ಟದ ಚರ್ಚೆಗೆ ಕಾರಣನಾಗಿದ್ದಾನೆ.

ಸದ್ಯಕ್ಕೆ ಹತ್ತನೇ ಕ್ಲಾಸ್‌ನಲ್ಲಿ ಓದುತ್ತಿರೋ ಹರ್ಷವರ್ಧನ್‌, ಒಟ್ಟು ಮೂರು ಬಗೆಯ ಡ್ರೋನ್‌ಗಳನ್ನ ಅವಿಷ್ಕರಿಸಿದ್ದಾರೆ. ಈ ಡ್ರೋನ್‌ ನೆಲದಲ್ಲಿ ಹುದುಗಿಸಿಡಲಾದ ಬಾಂಬ್‌ಗಳನ್ನ ಪತ್ತೆಹಚ್ಚಿ ಅವುಗಳನ್ನ ನಿಷ್ಕ್ರಿಯಗೊಳಿಸಲು ನೆರವಾಗುತ್ತದೆ. ಒಂದೊಮ್ಮೆ ಟಿವಿ ನೋಡುತ್ತಿದ್ದ ಸಂದರ್ಭದಲ್ಲಿ ನೆಲದಲ್ಲಿ ಹುದುಗಿಸಿಡಲಾದ ಬಾಂಬ್‌ಗಳಿಂದ ಸೈನಿಕರು ಅಪಾಯ ಎದುರಿಸುತ್ತಿರುವುದನ್ನ ಮನಗಂಡ ಹರ್ಷವರ್ಧನ್‌, ಈ ಒಂದು ಅವಿಷ್ಕಾರಕ್ಕೆ ಮುಂದಾದರಂತೆ.

ಮೊದಲಿಗೆ ಸುಮಾರು 2 ಲಕ್ಷ ರೂಪಾಯಿ ವೆಚ್ಚದಲ್ಲಿ ಎರಡು ಮಾದರಿಗಳನ್ನ ತಯಾರಿಸಿದ ಹರ್ಷವರ್ಧನ್‌, ಮೂರನೇ ಮಾದರಿಗೆ ರಾಜ್ಯ ಸರ್ಕಾರದಿಂದ 3 ಲಕ್ಷ ರೂಪಾಯಿ ಸಹಾಯಧನ ಪಡೆದುಕೊಂಡರಂತೆ. ಈ ಒಂದು ಡ್ರೋನ್‌ನಲ್ಲಿ ಆರ್‌ಜಿಬಿ ಸೆನ್ಸಾರ್‌, ಇನ್‌ಫ್ರಾರೆಡ್‌ ಹಾಗೂ 21 ಮೆಗಾಪಿಕ್ಸಲ್‌ ಕ್ಯಾಮೆರಾ ಅಳವಡಿಸಲಾಗಿದ್ದು,ಜೊತೆಗೆ 50 ಗ್ರಾಂ ತೂಕದ ಬಾಂಬ್‌ನ್ನೂ ಸಹ ಇದರಲ್ಲಿ ಇರಿಸಲಾಗಿದೆ.

ಭೂಮಿಯಲ್ಲಿ ಹುದುಗಿಸಿ ಇಡಲಾದ ಬಾಂಬ್‌ಗಳನ್ನ ಪತ್ತೆಹಚ್ಚಿ ಅದನ್ನು ನಿಷ್ಕ್ರಿಯಗೊಳಿಸಲು ಡ್ರೋನ್‌ನಲ್ಲಿ ಬಳಸಲಾದ ಬಾಂಬ್‌ ಸಹಕಾರಿಯಾಗುತ್ತದೆಯಂತೆ. ಹರ್ಷವರ್ಧನ್‌ರ ಈ ಸಾಧನೆಯಿಂದಾಗಿ ಅವರ ತಂದೆ ಪ್ರದ್ಯುಮ್ನಸಿನ್ಹ್ ಮತ್ತು ತಾಯಿ ನಿಶಾಬಾ ಸಂತಸ ವ್ಯಕ್ತಪಡಿಸಿದ್ದಾರೆ. ಬಾಪುನಗರದ ಸರ್ವೋದಯ ಶಾಲೆಯ ವಿದ್ಯಾರ್ಥಿಯಾಗಿರೋ ಹರ್ಷವರ್ಧನ್‌, ಈಗಾಗಲೇ ತಮ್ಮ ಡ್ರೋನ್‌ಗಳಿಗೆ ಪೇಟೆಂಟ್‌ಗಾಗಿ ನೋಂದಾಯಿಸಿದ್ದಾರೆ. ಅಷ್ಟೇ ಅಲ್ಲದೆ ಎರೋಬೊಟಿಕ್ಸ್‌ ಎಂಬ ಸ್ವಂತ ಕಂಪನಿಯೊಂದನ್ನು ಕೂಡ ಹೊಂದಿದ್ದಾರೆ.