18 ವರ್ಷದ ಯಾಹೂ ಮೆಸಂಜರ್‌ಗೆ ನಿವೃತ್ತಿ

ಹೊಸದಿಲ್ಲಿ: ಹೊಸ ಮೆಸೇಜ್ ಅಪ್ಲಿಕೇಷನ್‌ವೊಂದನ್ನು ಆರಂಭಿಸಿರುವ ಯಾಹೂ, ತನ್ನ 18 ವರ್ಷಗಳ ಹಳೆಯ ಮೆಸೆಂಜರ್ ಅಪ್ಲಿಕೇಷನ್‌ ಅನ್ನು ಆಗಸ್ಟ್ 5ಕ್ಕೆ ನಿವೃತ್ತಗೊಳಿಸಲಿದೆ. ಹಳೆಯ ಆ್ಯಪ್ ಬಳಸುತ್ತಿರುವವರಿಗೆ ನಂತರ ಅದು ಬಳಸಲು ಲಭ್ಯವಿರುವುದಿಲ್ಲ.

'ಈ ಉತ್ಪನ್ನ ಹಾಗೂ ಹೊಸ ಮೆಸೆಂಜರ್ ನಡುವೆ ಇಂದು ಆಂತರಿಕ ಕಾರ್ಯಾಚರಣೆ ಆರಂಭವಾಗಿದ್ದು, ಯಾಹೂ ಬಳಕೆದಾರರು ಅಪ್‌ಡೇಟ್ ಆಗಬೇಕು,' ಎಂದು ಕಂಪನಿಯ ಮುಖ್ಯಸ್ಥ ಅಮೋಟ್ಜ್ ಮೈಮನ್ ಪೋಸ್ಟ್‌ವೊಂದರಲ್ಲಿ ಹೇಳಿದ್ದಾರೆ.

ಮೇಲ್, ಸರ್ಚ್, ತಂಬ್ಲರ್, ಸುದ್ದಿ, ಕ್ರೀಡೆ, ಫೈನಾನ್ಸ್ ಮತ್ತು ಲೈಫ್‌ಸ್ಟೈಲ್‌ ವಿಭಾಗಳ ಮೇಲೆ ಯಾಹೂ ಇನ್ನು ಮುಂದೆ ಹೆಚ್ಚಿನ ಗಮನ ಹರಿಸಲಿದೆ. ಇವನ್ನು ಮುಖ್ಯವಾಹಿನಿಗೆ ತರಲು ಹಾಗೂ ಉತ್ಪನ್ನಗಳನ್ನು ಮತ್ತಷ್ಟು ಸರಳಗೊಳಿಸಲು ,ಸೆ.1ರಿಂದ 'ಯಾಹೂ ರೆಕಮೆಂಡ್ಸ್' ಸಂಪರ್ಕ ಕಡಿತಗೊಳಿಸಲಾಗುತ್ತದೆ.

ಆ್ಯಂಡ್ರಾಯ್ಡ್, ಐಒಎಸ್ ಮತ್ತು ವೆಬ್‌ಗಾಗಿ ಕಳೆದ ವರ್ಷ ಡಿಸೆಂಬರ್‌ನಲ್ಲಿ ಯಾಹೂ ಹೊಸ ಮೆಸಂಜರ್ ಆ್ಯಪ್ ಆರಂಭಿಸಿದೆ. ಯಾಹೂ ಸ್ವಾಮ್ಯದ ಫ್ಲಿಕರ್, ತಂಬ್ಲರ್ ಮತ್ತು ಎಕ್ಸಬ್ನಿಗಳ ಸಮಗ್ರ ರೂಪುರೇಷೆಯನ್ನು ಈ ಆ್ಯಪ್ ಒಳಗೊಂಡಿದೆ. ಇದರಿಂದ ಉತ್ತಮ ರೆಸೂಲ್ಯೂಷನ್ ಇರುವ ಫೋಟೋಗಳನ್ನು ಹಂಚಿಕೊಳ್ಳಲು ಹಾಗೂ ಬ್ಲಾಗ್‌ ವೇದಿಕೆಯಾದ ತಂಬ್ಲರ್ ಸಂಪರ್ಕ ಸಾಧಿಸಲು ಸುಲಭವಾಗಲಿದೆ.

ಎಲ್ಲವುಗಳಿಗಿಂತ ಮತ್ತೊಂದು ವಿಶೇಷವೆಂದರ ಈ ಆ್ಯಪ್‌ನಲ್ಲಿ ಕಳುಹಿಸಿದ ಕಾಮೆಂಟ್, ಇಮೇಜ್ ಹಾಗೂ ಪೋಸ್ಟ್‌ಗಳನ್ನು 'ಅನ್‌ಸೆಂಟ್' ಮಾಡುವ ಅವಕಾಶವಿದ್ದು, ಸೇವೆಯ ಸಂಪರ್ಕಗಳಿಂದಲೇ ತೆಗೆದು ಹಾಕಬಹುದಾಗಿದೆ.