ಹಸಿರಿನ ನಡುವೆ ಬಳುಕುತ ಭೋರ್ಗರೆಯುತ್ತಿರುವ ಅಂಬೋಲಿ ಜಲಪಾತ
ಮಳೆಗಾಲ ಶುರುವಾಗಿದೆ. ಪ್ರತಿ ವರ್ಷದಂತೆ ಈ ವರ್ಷವು ಅಂಬೋಲಿ ಜಲಪಾತ ತುಂಬಿ ಹರಿಯುತ್ತಿದೆ. ಆದರೆ ಕೊರೊನಾ ಹಿನ್ನೆಲೆಯಲ್ಲಿ ಈ ವರ್ಷ ಇಲ್ಲಿಗೆ ತೆರಳುವ ಪ್ರವಾಸಿಗರ ಸಂಖ್ಯೆ ಕಡಿಮೆಯಾಗಬಹುದು.
ಲಾಕ್ ಡೌನ್ ಸಡಿಲಿಕೆಯ ನಂತರ ಹಸಿರು ವಲಯದಲ್ಲಿರುವ ಕೆಲವು ಪ್ರವಾಸಿ ತಾಣಗಳನ್ನು ತೆರೆಯಲಾಗಿದೆ. ಆದರೆ ಅಂತರರಾಜ್ಯ ಪ್ರಯಾಣಿಕರಿಗೆ ಸರ್ಕಾರ ಕೆಲವು ನಿಯಮಗಳನ್ನು ಹೇರಿರುವುದರಿಂದ ನಿಮಗೆ ಕೆಲವೊಂದು ಪ್ರವಾಸಿ ಸ್ಥಳಗಳಿಗೆ ಭೇಟಿ ನೀಡಲು ಆಗುವುದಿಲ್ಲ. ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆದ ಫೋಟೋಗಳ ಪ್ರಕಾರ ಸದ್ಯ ಮಹಾರಾಷ್ಟ್ರದ ಅಂಬೋಲಿಯಲ್ಲಿ ಚೆನ್ನಾಗಿ ಮಳೆಯಾಗಿದ್ದು, ಖ್ಯಾತ ಅಂಬೋಲಿ ಜಲಪಾತ ಮೈದುಂಬಿ ಹರಿಯುತ್ತಿದೆ. ಬಹುಶಃ ಪ್ರವಾಸಿಗರು ಕೊರೊನಾ ಹಾವಳಿ ಕಡಿಮೆಯಾದ ನಂತರವಷ್ಟೇ ಜಲಪಾತ ವೀಕ್ಷಿಸಬಹುದು. ಮುಂದಿನ ದಿನಗಳಲ್ಲಿ ಜಲಪಾತಕ್ಕೆ ಭೇಟಿ ನೀಡುವವರು ಒಮ್ಮೆ ಈ ಲೇಖನವನ್ನು ಓದಿ.
ಮಹಾರಾಷ್ಟ್ರದ ಪ್ರಸಿದ್ಧ ಪ್ರವಾಸಿ ತಾಣ
ಹಚ್ಚಹಸಿರಿನ ಗಿಡಮರಗಳ ಮಧ್ಯೆ, ಸದ್ದಿಲ್ಲದೆ ಸುಮಾರು 400 ಅಡಿ ಎತ್ತರದಿಂದ ಬೀಳುವ ಸುಂದರವಾದ ಜಲಪಾತ ಅಂಬೋಲಿ. ಝುಳು-ಝುಳು ನಿನಾದದೊಂದಿಗೆ ನೊರೆ ನೊರೆ ಹಾಲಿನಂತೆ ಧರೆಯಿಂದ ತೊರೆಗೆ ಬೀಳುವ ಜಲಪಾತದ ಸೊಬಗನ್ನ ನೋಡುವುದೇ ಒಂದು ಸೊಗಸು. ಮಹಾರಾಷ್ಟ್ರದ ಪ್ರಮುಖ ಪ್ರವಾಸಿ ಆಕರ್ಷಣೆಯಾಗಿರುವ ಜಲಪಾತವನ್ನು ನೋಡಲು ಪ್ರತಿ ವರ್ಷ ಲೆಕ್ಕವಿಲ್ಲದಷ್ಟು ಜನರು ಭೇಟಿ ನೀಡುತ್ತಾರೆ. ಒಟ್ಟಿನಲ್ಲಿ ಮಳೆ ಮತ್ತು ಹಚ್ಚ ಹಸಿರು ಎರಡನ್ನೂ ಇಷ್ಟಪಡುವವರಿಗೆ ಅಂಬೋಲಿ ಜಲಪಾತ ಅತ್ಯುತ್ತಮ ತಾಣ.
ಅಂಬೋಲಿ ಸೌಂದರ್ಯ ಹೆಚ್ಚಿಸಿದ ‘ಹಸಿರು’
ಜಲಪಾತವು ಅಂಬೋಲಿ ಗಿರಿಧಾಮದ ಬಳಿ ಇರುವುದರಿಂದ ಇದಕ್ಕೆ ಅಂಬೋಲಿ ಜಲಪಾತ ಎಂಬ ಹೆಸರು ಬಂದಿದೆ. ಅಂಬೋಲಿ ಭಾರತದ ಪಶ್ಚಿಮ ಭಾಗದ ಸಹ್ಯಾದ್ರಿ ಬೆಟ್ಟಗಳಲ್ಲಿ ನೆಲೆಗೊಂಡಿದ್ದು, ಸಮುದ್ರ ಮಟ್ಟದಿಂದ 690 ಮೀಟರ್ ಎತ್ತರದಲ್ಲಿದೆ. ಇದು ಅಸಾಮಾನ್ಯ ಜಾತಿಯ ಸಸ್ಯ ಮತ್ತು ಪ್ರಾಣಿಗಳಿಗೆ ನೆಲೆಯಾಗಿರುವುದಕ್ಕೆ ವಿಶ್ವದ ಪರಿಸರ ಪ್ರವಾಸಿ ತಾಣಗಳಲ್ಲಿ ಒಂದಾಗಿದೆ. ಅಂಬೋಲಿ ಜಲಪಾತವು ಅಂಬೋಲಿಯಲ್ಲಿ ಕಂಡುಬರುವ ಅತ್ಯಂತ ಪ್ರಸಿದ್ಧ ಪ್ರವಾಸಿ ಆಕರ್ಷಣೆಗಳಲ್ಲಿ ಒಂದಾಗಿದ್ದು, ಇಲ್ಲಿಗೆ ವರ್ಷಪೂರ್ತಿ ಪ್ರವಾಸಿಗರು ಭೇಟಿ ನೀಡುತ್ತಾರೆ.
ಅಂಬೋಲಿ ಜಲಪಾತದ ಪಕ್ಕದಲ್ಲಿಯೇ ಇತರ ಮಿನಿ ಜಲಪಾತಗಳಿದ್ದು, ಸುತ್ತಮುತ್ತಲಿನ ಹಸಿರು ಸ್ಥಳದ ಸೌಂದರ್ಯ ಮತ್ತು ಆಕರ್ಷಣೆಯನ್ನು ಹೆಚ್ಚಿಸಿದೆ. ದಂಪತಿಗಳು, ಮಕ್ಕಳು, ಸ್ನೇಹಿತರು ಹೀಗೆ ಪ್ರತಿಯೊಬ್ಬರು ಅಂಬೋಲಿಯನ್ನು ವೀಕ್ಷಿಸಲು ತಂಡೋಪತಂಡವಾಗಿ ಬರುತ್ತಾರೆ. ಇದು ಮಹಾರಾಷ್ಟ್ರದ ಕೊನೆಯ ಗಿರಿಧಾಮವಾಗಿದ್ದು, ವರ್ಷಪೂರ್ತಿ ಆಹ್ಲಾದಕರ ಹವಮಾನ ಹೊಂದಿರುತ್ತದೆ. ಗೋವಾ ಮತ್ತು ಬೆಳಗಾವಿಯ ಪ್ರವಾಸಿಗರು ವಾರಾಂತ್ಯದಲ್ಲಿ ಅಂಬೋಲಿಗೆ ಭೇಟಿ ನೀಡುವುದು ಸಾಮಾನ್ಯವಾಗಿದೆ.
ಕಾಂಕ್ರೀಟ್ ಮೆಟ್ಟಿಲುಗಳ ಮೇಲೆ ಏರುತ್ತಾ…
ಜಲಪಾತದ ವಿಶೇಷವೆಂದರೆ ಕಾಂಕ್ರೀಟ್ ಮೆಟ್ಟಿಲುಗಳು ಪ್ರವಾಸಿಗರನ್ನು ಜಲಪಾತದವರೆಗೆ ಕರೆದೊಯ್ಯುತ್ತದೆ. ನೀವು ಬೇಕಾದರೆ ಮೆಟ್ಟಿಲುಗಳ ಮೇಲೆ ಸುಮ್ಮನೆ ಕುಳಿತುಕೊಳ್ಳಬಹುದು, ವಿಶ್ರಾಂತಿ ಪಡೆಯಬಹುದು, ಇಲ್ಲವೇ ಭವ್ಯವಾದ ಜಲಪಾತವನ್ನು ವೀಕ್ಷಿಸಬಹುದು. ಸಾಮಾನ್ಯವಾಗಿ ಅಂಬೋಲಿಗೆ ಭೇಟಿ ನೀಡಿದಾಗ ಪ್ರವಾಸಿಗರು ಶುದ್ಧ ನೀರಿನಲ್ಲಿ ಸ್ನಾನ ಮಾಡುವುದನ್ನು ಮರೆಯುವುದಿಲ್ಲ. ಈ ಪ್ರದೇಶವು ತುಂಬಾ ಚಿಕ್ಕದಾಗಿರುವ ಕಾರಣ, ಬಹಳ ಬೇಗನೆ ಜನಸಂದಣಿಯಿಂದ ಕೂಡಿರುತ್ತದೆ. ಅದೇನೇ ಇರಲಿ, ಜಲಪಾತದ ಸೌಂದರ್ಯ ನಿಮ್ಮ ಸಂತೋಷವನ್ನು ಹೆಚ್ಚಿಸುತ್ತದೆ.
ರೆಡಿಯಾಗಿರುತ್ತವೆ ಬಿಸಿ ಬಿಸಿ ತಿಂಡಿಗಳು
ಜಲಪಾತ ನೋಡಲು ತೆರಳುವಾಗ ನೀವು ತಿಂಡಿಗಳನ್ನು ಒಯ್ಯಬೇಕಿಲ್ಲ. ಅಲ್ಲಿ ಹಲವಾರು ಸ್ಥಳೀಯ ಮಾರಾಟಗಾರರು ಜಲಪಾತದ ಬಳಿ ಮಳಿಗೆಗಳನ್ನು ನಿರ್ಮಿಸಿದ್ದಾರೆ. ಹಾಗಾಗಿ ಸ್ಥಳೀಯ ಭಕ್ಷ್ಯಗಳನ್ನು ಸೇವಿಸುವ ಅವಕಾಶ ನಿಮಗೆ ಸಿಗುತ್ತದೆ. ನೀವು ಬೇಕಾದರೆ ಜಲಪಾತದ ಭೋರ್ಗರೆತ ನೋಡುತ್ತಾ, ಬಿಸಿ ಬಿಸಿ ಸಾಬುದಾನ ವಡಾ, ಈರುಳ್ಳಿ ಬಜ್ಜಿ ಮತ್ತು ಬೇಯಿಸಿದ ಜೋಳ ಸವಿಯಬಹುದು. ಅಷ್ಟೇ ಅಲ್ಲ, ಚಹಾ ಪ್ರಿಯರಿಗೆ ಚಹಾ ಮತ್ತು ಮಕ್ಕಳ ಫೇವರಿಟ್ ಮ್ಯಾಗಿ ನೂಡಲ್ಸ್ ಸಹ ಲಭ್ಯವಿದೆ.
ಭಾರತದ ಮಿನಿ-ಸ್ಜಿಟ್ಜರ್ಲೆಂಡ್ ಬಗ್ಗೆ ನೀವು ಕೇಳಿದ್ದೀರಾ?ಮಳೆಗಾಲದಲ್ಲಿ ಜನಸಂದಣಿ
ಅಂಬೋಲಿ ಜಲಪಾತಕ್ಕೆ ಭೇಟಿ ನೀಡಲು ಉತ್ತಮ ಸಮಯವೆಂದರೆ ಮಳೆಗಾಲ. ವಿಶೇಷವಾಗಿ ಮಳೆಗಾಲದ ದಿನಗಳಲ್ಲಿ ಜಲಪಾತ ಧುಮ್ಮಿಕ್ಕಿ ಹರಿಯುತ್ತದೆ. ಆದ್ದರಿಂದ ಈ ವೈಭವವನ್ನು ನೋಡಲು ಜನರು ಜೂನ್-ಜುಲೈನಲ್ಲಿ ಹೆಚ್ಚಾಗಿ ತೆರಳುತ್ತಾರೆ. ಈ ಸಮಯದಲ್ಲಿ ಜಲಪಾತದಲ್ಲಿ ನೀರು ಸಾಕಷ್ಟು ಪ್ರಮಾಣದಲ್ಲಿ ಇರುತ್ತದೆ. ಈ ಪ್ರದೇಶದಲ್ಲಿ ಸ್ವಲ್ಪ ಜನದಟ್ಟಣೆಯಾಗಿರುವುದರಿಂದ ರಜಾದಿನಗಳಲ್ಲಿ ಭೇಟಿ ನೀಡಬೇಡಿ. ಗ್ರಾಮ ಪಂಚಾಯತ್ ವತಿಯಿಂದ ರೂಂ ಸೌಲಭ್ಯವನ್ನು ಒದಗಿಸಲಾಗುತ್ತದೆ. ಮಳೆಗಾಲದಲ್ಲಿ ಬಂಡೆಗಳು ಜಾರುವುದರಿಂದ ಹೆಚ್ಚು ಜಾಗರೂಕರಾಗಿರಿ.
ಅಂಬೋಲಿ ಜಲಪಾತದ ಬಳಿ ಏನೆಲ್ಲಾ ಇದೆ?
ಪ್ರವಾಸಿಗರು ಜಲಪಾತಕ್ಕೆ ಹತ್ತಿರವಿರುವ ಅಂಬೋಲಿ ಫಾರೆಸ್ಟ್ ಪಾರ್ಕ್ಗೆ ಭೇಟಿ ನೀಡಬಹುದು. ಅಲ್ಲದೆ, ಮಹಾದೇವ್ಗಡ್ ಪಾಯಿಂಟ್ ಮತ್ತು ಕವಲೆಸಾಡ್ ಪಾಯಿಂಟ್ನಂತಹ ಸುಂದರವಾದ ಸ್ಥಳಗಳಿಗೆ ಭೇಟಿ ನೀಡಬಹುದು.
ತಲುಪುವುದು ಹೇಗೆ?
ಅಂಬೋಲಿ ಜಲಪಾತವು ನಿಪ್ಪಾಣಿ-ಸಾವಂತವಾಡಿ ರಸ್ತೆಯಲ್ಲಿರುವ ಆಕರ್ಷಣೀಯ ಸ್ಥಳವಾಗಿದೆ. ಮಹಾರಾಷ್ಟ್ರದಲ್ಲಿ ಅತಿ ಹೆಚ್ಚು ಮಳೆ ಬೀಳುವ ಪ್ರದೇಶ ಅಂಬೋಲಿ. ಆದ್ದರಿಂದ ಮಳೆಗಾಲದಲ್ಲಿ ಜಲಪಾತದ ಅಬ್ಬರ ಹೆಚ್ಚು. ಆದರೆ ಪ್ರವಾಸಿಗರು ಸ್ನಾನ ಮಾಡಲು ಮತ್ತು ಜಲಪಾತದ ಸೌಂದರ್ಯವನ್ನು ವೀಕ್ಷಿಸಲು ಆಗಾಗ್ಗೆ ಅಂಬೋಲಿಗೆ ಬರುತ್ತಾರೆ. ಅಂಬೋಲಿ ಜಲಪಾತವು ಮುಖ್ಯ ಬಸ್ ನಿಲ್ದಾಣದಿಂದ ಮೂರು ಕಿಲೋಮೀಟರ್ ದೂರದಲ್ಲಿದೆ.
ಇಲ್ಲಿ ಲಭ್ಯವಿರುವ ಸ್ಥಳೀಯ ಸಾರಿಗೆಯೆಂದರೆ ಆಟೋಗಳು ಮತ್ತು ಖಾಸಗಿ ಟ್ಯಾಕ್ಸಿಗಳು. ಆದ್ದರಿಂದ ನೀವು ಜಲಪಾತ ನೋಡಲು ಈ ಎರಡರಲ್ಲಿ ಯಾವುದಾದರೂ ಒಂದನ್ನು ಆಯ್ಕೆ ಮಾಡಿಕೊಳ್ಳಬಹುದು. ಜಲಪಾತವು ರಸ್ತೆಗೆ ಹತ್ತಿರದಲ್ಲಿದೆ. ಆದರೆ ಅದನ್ನು ತಲುಪಲು ಸ್ವಲ್ಪ ದೂರ ಚಾರಣ ಮಾಡಬೇಕಾಗುತ್ತದೆ. ರಸ್ತೆಯ ಒಂದು ಬದಿಯಲ್ಲಿ ಪಾರ್ಕಿಂಗ್ ಸೌಲಭ್ಯ ಲಭ್ಯವಿದೆ. ಆದ್ದರಿಂದ ನಿಮ್ಮ ಖಾಸಗಿ ವಾಹನ ಮತ್ತು ಪಾರ್ಕಿಂಗ್ ತೊಂದರೆಗಳ ಬಗ್ಗೆ ನೀವು ಚಿಂತಿಸಬೇಕಾಗಿಲ್ಲ.
ಕಾಶ್ಮೀರದ ಗಂಗಾಬಲ್ ಸರೋವರದ ಸೌಂದರ್ಯ ಇದು