PC: Pixabay
ಭಾರತದ ಪ್ರಮುಖ ಗಿರಿಧಾಮಗಳು ನವ ಜೋಡಿಗಳಿಗೆ ಅಲ್ಲ, ಹಿತವಾದ ವಾತಾವರಣ ಬಯಸುವವರಿಗೂ ಪರ್ಫೆಕ್ಟ್‌ ಆಗಿವೆ. ರಜೆ ಸಿಕ್ಕಾಗ ಬಹಳಷ್ಟು ಮಂದಿ ಗಿರಿಧಾಮಗಳ ಸೌಂದರ್ಯ ನೋಡಲು ಬಯಸುತ್ತಾರೆ. ಊಟಿ, ಕೊಡೈಕೆನಾಲ್, ಕೂರ್ಗ್, ಮುನ್ನಾರ್, ಶಿಮ್ಲಾ, ಝಿರೋ, ಮಹಾಬಲೇಶ್ವರ, ಗ್ಯಾಂಗ್ಟಾಕ್‌ ಸೇರಿದಂತೆ ಸಾಕಷ್ಟು ಗಿರಿಧಾಮಗಳು ಪ್ರವಾಸಿಗರನ್ನು ಮಂತ್ರಮುಗ್ಧಗೊಳಿಸುತ್ತವೆ.
ನೀವು ಈಗಾಗಲೇ ಮನಾಲಿಯ ಸೌಂದರ್ಯವನ್ನು ಸವಿದಿದ್ದರೆ, ಸ್ವಲ್ಪ ಡಿಫರೆಂಟ್‌ ಆಗಿ ಡಾರ್ಜಿಲಿಂಗ್‌ಗೆ ಭೇಟಿ ನೀಡಿ. ಡಾರ್ಜಿಲಿಂಗ್ ಪಶ್ಚಿಮ ಬಂಗಾಳದ ಅತ್ಯಂತ ಜನಪ್ರಿಯ ಗಿರಿಧಾಮವಾಗಿದೆ. ಅಷ್ಟಕ್ಕೂ ಡಾರ್ಜಿಲಿಂಗ್‌ನಲ್ಲಿ ಅಂತದೇನಿದೆ?
ಡಾರ್ಜಿಲಿಂಗ್ ಒಂದು ಅದ್ಭುತ
PC: Pixabay
ಪಶ್ಚಿಮ ಬಂಗಾಳದಲ್ಲಿರುವ ಅತ್ಯಂತ ರಮಣೀಯ ಗಿರಿಧಾಮವಾಗಿರುವ ಡಾರ್ಜಿಲಿಂಗ್ ಚಹಾದ ತೋಟಗಳಿಂದ ಆವೃತವಾಗಿದೆ. ಈ ಗಿರಿಧಾಮವು ಸಮುದ್ರ ಮಟ್ಟದಿಂದ 2,050 ಮೀಟರ್ ಎತ್ತರದಲ್ಲಿದೆ. ಹೀಗಾಗಿ ವರ್ಷಪೂರ್ತಿ ತಂಪಾದ ವಾತಾವರಣವನ್ನು ಹೊಂದಿರುತ್ತದೆ.
ಇಲ್ಲಿನ ಟಾಯ್ ಟ್ರೈನ್‌ ಯುನೆಸ್ಕೋ ವಿಶ್ವ ಪರಂಪರೆಯ ಸ್ಥಳವಾಗಿದೆ. ಅಷ್ಟೇ ಅಲ್ಲ, ವಿಶ್ವದ ಮೂರನೇ ಅತಿ ಎತ್ತರದ ಶಿಖರ ಮತ್ತು ಭಾರತದ ಅತಿ ಎತ್ತರದ ಕಾಂಚನಜುಂಗಾ ಶಿಖರವನ್ನು ಡಾರ್ಜಿಲಿಂಗ್ ಗಿರಿಧಾಮದಿಂದ ವೀಕ್ಷಿಸಬಹುದು.
ಡಾರ್ಜಿಲಿಂಗ್‌ನಲ್ಲಿ ಏನೆಲ್ಲಾ ನೋಡಬಹುದು?
PC: Pixabay
ಡಾರ್ಜಿಲಿಂಗ್ ಹಿಮಾಲಯನ್ ರೈಲ್ವೆ: ಡಾರ್ಜಿಲಿಂಗ್ ಟಾಯ್ ಟ್ರೈನ್‌ ಪಶ್ಚಿಮ ಬಂಗಾಳದಲ್ಲಿರುವ ನ್ಯೂ ಜಲ್ಪೈಗುರಿ ಮತ್ತು ಡಾರ್ಜಿಲಿಂಗ್ ನಡುವೆ ಚಲಿಸುತ್ತದೆ. ಈ ರೈಲಿನ ಪ್ರಯಾಣ ನಿಮ್ಮನ್ನು ಚಿರಸ್ಮರಣೀಯವಾಗಿಸುತ್ತದೆ.
ಟೈಗರ್ ಹಿಲ್: ಸಮುದ್ರಮಟ್ಟದಿಂದ ಸುಮಾರು 2590 ಮೀಟರ್ ಎತ್ತರದಲ್ಲಿ ಈ ಟೈಗರ್ ಹಿಲ್ ಇದೆ. ಟ್ರೆಕ್ಕಿಂಗ್‌ ಪ್ರೇಮಿಗಳಿಗೆ ಬಹುಶಃ ಈ ತಾಣ ತುಂಬಾನೇ ಇಷ್ಟವಾಗಬಹುದು. ಈ ಹಿಲ್‌ನಲ್ಲಿ ನಿಂತು ಸೂರ್ಯಾಸ್ತ ಹಾಗು ಸೂರ್ಯೋದಯವನ್ನು ನೋಡುವುದೇ ಹಬ್ಬ.
ಡಾರ್ಜಿಲಿಂಗ್ ರೂಪ್‌ ವೇ: ಜೀವನದಲ್ಲಿ ಒಮ್ಮೆ ರೂಪ್‌ ವೇ ನಲ್ಲಿ ಹೋಗಲು ಬಯಸಿದರೆ ಖಂಡಿತವಾಗಿಯು ನೀವು ಡಾರ್ಜಿಲಿಂಗ್‌ನಲ್ಲಿ ಪ್ರಯತ್ನಿಸಲೇಬೇಕು. ಸೊಗಸಾದ ಭೂ ದೃಶ್ಯಗಳು, ಹಿಮದಿಂದ ಆವೃತವಾದ ಬೆಟ್ಟಗಳು, ಚಹಾದ ತೋಟಗಳನ್ನು ನೀವು ನೋಡುತ್ತೀರಿ.
ನೈಟಿಂಗೇಲ್ ಪಾರ್ಕ್
PC: Pixabay
ಡಾರ್ಜಿಲಿಂಗ್ ಪ್ರವಾಸದಲ್ಲಿ ನೀವು ಯಾವುದೇ ಕಾರಣಕ್ಕೂ ಮಿಸ್‌ ಮಾಡಿಕೊಳ್ಳಬಾರದ ತಾಣಗಳಲ್ಲಿ ಈ ನೈಟಿಂಗೇಲ್ ಪಾರ್ಕ್ ಕೂಡ ಒಂದು. ಹಚ್ಚ ಹಸಿರಿನ ಮತ್ತು ಹಿತವಾದ ಗಾಳಿಯ ನಡುವೆ ವಿಶ್ರಾಂತಿ ತೆಗೆದುಕೊಳ್ಳಲು ಸೂಕ್ತವಾಗಿದೆ. ಅದರಲ್ಲೂ ನವ ಜೋಡಿಗಳ ಏಕಾಂತಕ್ಕೆ ಇದು ಹೇಳಿ ಮಾಡಿಸಿದ ಸ್ಥಳ ಎಂದೇ ಹೇಳಬಹುದು.
ಈ ಪಾರ್ಕ್ ಕೊಂಚ ಎತ್ತರದ ಭೂಪ್ರದೇಶದಲ್ಲಿರುವುದರಿಂದ ಹತ್ತಬೇಕಾಗುತ್ತದೆ. ಇಲ್ಲಿ ಶಿವನ ಬೃಹತ್ ಪ್ರತಿಮೆ, ಸಂಗೀತದ ಕಾರಂಜಿ ಹಾಗು ಅದ್ಭುತವಾದ ದೃಶ್ಯಾವಳಿಗಳು ಉದ್ಯಾನದ ಸೌಂದರ್ಯವನ್ನು ಹೆಚ್ಚಿಸಿದೆ.
ಡಾರ್ಜಿಲಿಂಗ್‌ಗೆ ಹೋಗಲು ಉತ್ತಮ ಸಮಯ
PC: Pixabay
ಏಪ್ರಿಲ್‌ನಿಂದ ಜೂನ್‌ ತಿಂಗಳವರೆಗೆ ಡಾರ್ಜಿಲಿಂಗ್‌ನ ಹವಾಮಾನವು ಆಹ್ಲಾದಕರವಾಗಿರುತ್ತದೆ. ಆದಾಗ್ಯೂ, ಬಹಳಷ್ಟು ಜನರು ಅಕ್ಟೋಬರ್‌ನಿಂದ ಡಿಸೆಂಬರ್‌ವರೆಗಿನ ಚಳಿಗಾಲದ ತಿಂಗಳುಗಳಲ್ಲಿ ಈ ಸ್ಥಳಕ್ಕೆ ಭೇಟಿ ನೀಡಲು ಬಯಸುತ್ತಾರೆ.
ಇದನ್ನೂ ಓದಿ: ಕಾಶಿಗೆ ಹೋಗುವವರು ಸರ್ಕಾರದಿಂದ 5000 ರೂಪಾಯಿ ಸಹಾಯಧನ ಪಡೆಯಬಹುದು
ಡಾರ್ಜಿಲಿಂಗ್‌ಗೆ ತಲುಪುವ ಬಗೆ ಹೇಗೆ?
PC: Pixabay
ಡಾರ್ಜಿಲಿಂಗ್‌ಗೆ ರಸ್ತೆ, ವಿಮಾನ ಹಾಗು ರೈಲು ಮಾರ್ಗದ ಮೂಲಕ ಸುಲಭವಾಗಿ ತಲುಪಬಹುದು.
ಸಮೀಪದ ವಿಮಾನ ನಿಲ್ದಾಣ: ಬಾಗ್ದೋಗ್ರಾ - ಡಾರ್ಜಿಲಿಂಗ್‌ನಿಂದ 38 ಕಿ.ಮೀ
ಸಮೀಪದ ರೈಲು ನಿಲ್ದಾಣ: ನ್ಯೂ ಜಲ್ಪೈಗುರಿ ರೈಲು ನಿಲ್ದಾಣ. ಇದು ಡಾರ್ಜಿಲಿಂಗ್‌ನಿಂದ 62 ಕಿ.ಮೀ ದೂರದಲ್ಲಿದೆ. ಇದು ದೆಹಲಿ, ಮುಂಬೈ, ಕೋಲ್ಕತ್ತಾ, ಬೆಂಗಳೂರು, ಕೊಚ್ಚಿನ್, ಚೆನ್ನೈನಂತಹ ಪ್ರಮುಖ ನಗರಗಳಿಂದ ಸಂಪರ್ಕ ಸಾಧಿಸುತ್ತದೆ.
ಇದನ್ನೂ ಓದಿ: ಸೆಲೆಬ್ರಿಟಿಗಳ ವಿವಾಹ ನಡೆಯುವ ಭಾರತದ ಐಷಾರಾಮಿ ಹೋಟೆಲ್‌ಗಳಿವು