ಕರ್ನಾಟಕದ ಪ್ರಸಿದ್ಧವಾದ ಪ್ರವಾಸಿ ತಾಣಗಳಲ್ಲಿ ಉಡುಪಿ ಕೂಡ ಒಂದಾಗಿದೆ. ಉಡುಪಿ ಎಂದಾಕ್ಷಣ ಥಟ್ಟನೆ ನೆನಪಾಗುವುದು ಶ್ರೀ ಕೃಷ್ಣ. ಇಲ್ಲಿನ ಶ್ರೀ ಕೃಷ್ಣನ ದೇವಾಲಯಕ್ಕೆ ಕರ್ನಾಟದ ನಾನಾ ಭಾಗಗಳಿಂದ ಭಕ್ತರು ಪ್ರತಿನಿತ್ಯ ಭೇಟಿ ನೀಡುತ್ತಿರುತ್ತಾರೆ.
ಉಡುಪಿ ಪ್ರವಾಸಿಗರ ಸ್ವರ್ಗ ಎಂದೇ ಹೇಳಬಹುದು. ಇಲ್ಲಿ ಧಾರ್ಮಿಕ ತಾಣಗಳ ಜೊತೆಜೊತೆಗೆ ಯುವಕರಿಗೆ ಮೈ ನವಿರೇಳಿಸುವ ಅದ್ಭುತ ಪ್ರವಾಸಿ ತಾಣಗಳಿಗೆ ನೆಲೆಯಾಗಿದೆ. ಈ ಕಾರಣದಿಂದಲೇ ಕರ್ನಾಟಕದ ಪ್ರವಾಸಿಗರು ತಮ್ಮ ವಾರಾಂತ್ಯಕ್ಕೆ ಉಡುಪಿಗೆ ಪ್ರವಾಸ ಮಾಡುತ್ತಾರೆ.
ಆದಾಗ್ಯೂ, ಉಡುಪಿ ಪ್ರವಾಸ ಮಾಡಲು ಬಯಸುವವರು ಲೇಖನದಲ್ಲಿ ಹೇಳಲಾಗುವ ವಿಷಯ ತಿಳಿದಿದ್ದರೆ ಒಳ್ಳೆಯದು. ಉಡುಪಿಯ ಪ್ರವಾಸವನ್ನು ನೀವು ಯೋಜಿಸುತ್ತಿದ್ದರೆ ಯಾವೆಲ್ಲಾ ಅಂಶಗಳನ್ನು ಗಮನದಲ್ಲಿಟ್ಟುಕೊಳ್ಳಬೇಕು ಎಂಬುದನ್ನು ಇಲ್ಲಿ ತಿಳಿಯಿರಿ.
ಉಡುಪಿಗೆ ಹೋಗಲು ಈ ಸಮಯ ಬೆಸ್ಟ್
ಕರಾವಳಿ ಪಟ್ಟಣಕ್ಕೆ ನೀವು ಭೇಟಿ ನೀಡಲು ಅಕ್ಟೋಬರ್‌ನಿಂದ ಫೆಬ್ರವರಿ ತಿಂಗಳ ನಡುವೆ ಭೇಟಿ ನೀಡುವುದು ಸೂಕ್ತವಾಗಿದೆ. ಬೇಸಿಗೆ ಕಾಲದಲ್ಲಿ ಉಡುಪಿಯ ಪ್ರವಾಸ ಸ್ವಲ್ಪ ಕ್ಲಿಷ್ಟಕರ ಎಂದೇ ಹೇಳಬಹುದು. ಏಕೆಂದರೆ ಬೇಸಿಗೆಯ ಸಮಯದಲ್ಲಿ ಉಡುಪಿಯ ತಾಪಮಾನವು 40 ಡಿಗ್ರಿಗಳಷ್ಟು ಹೆಚ್ಚಾಗುತ್ತದೆ. ಇನ್ನು, ಮಳೆಗಾಲದಲ್ಲಿ ಉಡುಪಿಯ ಸೌಂದರ್ಯ ಇಮ್ಮಡಿಗೊಳ್ಳುತ್ತದೆ. ಹಾಗಾಗಿ ಮಳೆಗಾಲದಲ್ಲಿ ಕೂಡ ಉಡುಪಿಯ ಪ್ರವಾಸ ಯೋಜಿಸಬಹುದು.
ಕಾಪು ಬೀಚ್‌ಗೆ ಹೋಗಿ
ಉಡುಪಿಯ ಜನಪ್ರಿಯವಾದ ಪ್ರವಾಸಿ ತಾಣವಾಗಿರುವ ಕಾಪು ಬೀಚ್‌ಗೆ ಭೇಟಿ ನೀಡಿ. ಇದು ಮಂಗಳೂರಿನಿಂದ ಸುಮಾರು 40 ಕಿ.ಮೀ ದೂರದಲ್ಲಿರುವ ಸಣ್ಣ ಗ್ರಾಮವಾಗಿದೆ. ಕಾಪು ಬೀಚ್‌ನಲ್ಲಿ ಲೈಟ್‌ ಹೌಸ್‌ ಇದ್ದು, ಅದನ್ನು ತಪ್ಪಿಸಬೇಡಿ. ನೀವು ಕಾಪು ಬೀಚ್‌ನಲ್ಲಿ ಏಕಾಂತವಾಗಿ ನಿಮ್ಮ ಸಂಗಾತಿಯೊಂದಿಗೆ ಅಡ್ಡಾಡಬಹುದು. ಅಲ್ಲದೆ, ಸಂಜೆಯಾಗುತ್ತಿದ್ದಂತೆ ಲೈಟ್‌ ಹೌಸ್‌ನ ಬೆಳಕು ಬೀಚ್‌ನ ಸೌಂದರ್ಯವನ್ನು ಅಸಾಧರಣಗೊಳಿಸುತ್ತದೆ.
ಉಡುಪಿಯ ಆಹಾರವನ್ನು ಮಿಸ್‌ ಮಾಡಿಕೊಳ್ಳಬೇಡಿ
ಉಡುಪಿಯ ಪಾಕಪದ್ಧತಿಯು ವಿಶ್ವದಾದ್ಯಂತ ಜನಪ್ರಿಯವಾಗಿದೆ. ನೀವು ಉಡುಪಿಯ ವಿಶೇಷವಾದ ಆಹಾರಗಳನ್ನು ತಿನ್ನದೇ ಹಿಂದಿರುಗಿದರೆ ನಿಮ್ಮ ಪ್ರವಾಸ ಅಪೂರ್ಣವಾಗುವುದಂತು ಖಂಡಿತ. ಜನಪ್ರಿಯ ನಂಬಿಕೆಯ ಪ್ರಕಾರ, ಉಡುಪಿಯ ಪಾಕಪದ್ಧತಿಯಲ್ಲಿ ಈರುಳ್ಳಿ ಮತ್ತು ಬೆಳ್ಳುಳ್ಳಿಯನ್ನು ಬಳಸದೆ ಸಸ್ಯಾಹಾರಿ ಆಹಾರವನ್ನು ತಯಾರಿಸುತ್ತಾರೆ ಎನ್ನಲಾಗುತ್ತದೆ. ಉಡುಪಿಯ ಚಿಕ್ಕ ಪುಟ್ಟ ಹೋಟೆಲ್ ಕೂಡ ಸ್ವಾದಿಷ್ಟವಾದ ಆಹಾರವನ್ನು ತಯಾರಿಸುತ್ತವೆ. ಒಟ್ಟಾರೆ ಉಡುಪಿಗೆ ಹೋದಾಗ ತಪ್ಪದೇ ಸ್ಥಳೀಯ ಆಹಾರದ ರುಚಿಯನ್ನು ಸವಿಯಿರಿ.
ಮಲ್ಪೆ ಬೀಚ್
ಉಡುಪಿಯ ಅತ್ಯಂತ ಆಕರ್ಷಕವಾದ ಪ್ರವಾಸಿ ತಾಣವೆಂದರೆ ಅದು ಮಲ್ಪೆ ಬೀಚ್. ಇದು ಉಡುಪಿಯಿಂದ ಪಶ್ಚಿಮಕ್ಕೆ ಸುಮಾರು 6 ಕಿ. ಮೀ ದೂರದಲ್ಲಿದೆ. ಅತ್ಯಂತ ಆಹ್ಲಾದಕರವಾಗಿರುವ ಈ ಕಡಲತೀರವು ಬಹುತೇಕರ ಅಚ್ಚು ಮೆಚ್ಚು. ನೀವು ಸಾಹಸ ಕ್ರೀಡೆಗಳನ್ನು ಮಾಡಲು ಬಯಸಿದರೆ ಈ ಸಮುದ್ರತೀರವು ನಿಮ್ಮನ್ನು ನಿರಾಶೆಗೊಳಿಸುವುದಿಲ್ಲ. ಮುಖ್ಯವಾಗಿ ಮಲ್ಪೆ ಬೀಚ್‌ನಲ್ಲಿ ಪ್ಯಾರಾಸೈಲಿಂಗ್, ಸರ್ಫಿಂಗ್ ಮತ್ತು ಜೆಟ್‌ ಸ್ಕೀಯಿಂಗ್ ನಂತಹ ಜಲ ಕ್ರೀಡೆಗಳನ್ನು ಪ್ರಯತ್ನಿಸಬಹುದು.
ಇದನ್ನು ಓದಿ: ಬೆಂಗಳೂರಿನಿಂದ 35 ಕಿ.ಮೀ ದೂರದಲ್ಲಿರುವ ಈ ತೊಟ್ಟಿಕಲ್ಲು ಫಾಲ್ಸ್‌ಗೆ ಭೇಟಿ ನೀಡಿದ್ದೀರಾ?
ಸೇಂಟ್‌ ಮೇರಿಸ್‌ ದ್ವೀಪಕ್ಕೆ ಹೋಗಿ
PC: Man On Mission
ಉಡುಪಿಯಲ್ಲಿರುವ ಮತ್ತೊಂದು ಸುಂದರವಾದ ಪ್ರವಾಸಿ ತಾಣವೆಂದರೆ ಅದು ಸೇಂಟ್‌ ಮೇರಿಸ್‌ ದ್ವೀಪವಾಗಿದೆ. ಇದು ಮಲ್ಪೆ ಬೀಚ್‌ನ ಉತ್ತರ ಭಾಗದಲ್ಲಿರುವ ದ್ವೀಪ. ಅಲ್ಲದೆ, ಪ್ರವಾಸಿಗರ ನೆಚ್ಚಿನ ತಾಣವು ಹೌದು. ನೀವು ಛಾಯಾಗ್ರಾಹಕರಾಗಿದ್ದರೆ ಈ ದ್ವೀಪಕ್ಕೆ ಭೇಟಿ ನೀಡಿ.
ಇದನ್ನು ಓದಿ: ಉತ್ತರ ಕನ್ನಡದ ಈ ಕಡಲತೀರಗಳು ಚಿತ್ತಾಕರ್ಷಕ ಸೊಬಗನ್ನು ಹೊಂದಿವೆ…
ವನ್ಯಜೀವಿ ಅಭಯಾರಣ್ಯ
ಉಡುಪಿಯ ಪ್ರಸಿದ್ಧವಾದ ದೇವಾಲಯ, ಬೀಚ್, ದ್ವೀಪದ ಭೇಟಿಯ ನಂತರ ವನ್ಯಜೀವಿ ಅಭಯಾರಣ್ಯಕ್ಕೆ ತಪ್ಪದೇ ಭೇಟಿ ನೀಡಿ. ಉಡುಪಿಯ ವನ್ಯಜೀವಿ ಅಭಯಾರಣ್ಯವು ಪ್ರಮುಖವಾದ ಪ್ರವಾಸಿ ಆಕರ್ಷಣೆಯಾಗಿದೆ. ಇದು ಉಡುಪಿಯಿಂದ ಕೇವಲ 40 ಕಿ.ಮೀ ದೂರದಲ್ಲಿರುವ ಕುಂದಾಪುರದ ಮೂಕಾಂಬಿಕಾ ವನ್ಯಜೀವಿ ಅಭಯಾರಣ್ಯದಲ್ಲಿ ನೆಲೆಯಾಗಿದೆ. ಇಲ್ಲಿ ಅಳಿವಿನಂಚಿನಲ್ಲಿರುವ ಹಲವಾರು ಪ್ರಾಣಿ, ಪಕ್ಷಿ ಮತ್ತು ಸಸ್ಯಗಳನ್ನು ಕಂಡು ಆನಂದಿಸಬಹುದು.
ಇದನ್ನು ಓದಿ: ನಿಮಗೆ ತಿಳಿಯದ ಉಡುಪಿಯ ಪ್ರವಾಸಿ ತಾಣಗಳಿವು...