ಪ್ರಯಾಣ ನಮಗೆಲ್ಲಾ ಭರವಸೆಯ ಮಿಂಚನ್ನು ಒದಗಿಸುತ್ತದೆ. ಸಾಹಸಿ ಪ್ರಿಯರಿಗೆ ಹುರುಪು ತಂದುಕೊಡುತ್ತದೆ. ಹೇಗಿದ್ದರೂ ಪ್ರಪಂಚದ ಅನೇಕ ದೇಶಗಳಲ್ಲಿ ಪ್ರಯಾಣದ ನಿರ್ಬಂಧಗಳು ಸರಾಗವಾಗಿರುವುದರಿಂದ ನಾವು ಈಗ ನೋಡಬೇಕಾದ ಪ್ರವಾಸಿ ತಾಣಗಳ ಪಟ್ಟಿ ಮಾಡಿಕೊಂಡು ಹೊರಡಬಹುದು. ಆದರೆ ನಾವಿಲ್ಲಿ ಗಮನಿಸಬೇಕಾದ ವಿಷಯವೆಂದರೆ ಪ್ರಯಾಣಕ್ಕೆ ಮತ್ತೆ ಅನುಮತಿಸಿದರೂ, ಕೋವಿಡ್ -19 ವೈರಸ್ ಇನ್ನೂ ಗಾಳಿಯಲ್ಲಿ ಉಳಿದಿರುತ್ತದೆ ಎಂಬುದನ್ನು ನೆನಪಿಟ್ಟುಕೊಳ್ಳಬೇಕಾಗಿದೆ.
ಸೋಂಕಿತ ಜನರ ಸಂಖ್ಯೆ ಪ್ರಪಂಚದಾದ್ಯಂತ ಬೆಳೆಯುತ್ತಲೇ ಇರುತ್ತದೆ. ಹಾಗಾಗಿ ಪ್ರಯಾಣವು ಕೆಲವೊಮ್ಮೆ ಅಪಾಯ ತಂದೊಡ್ಡುವ ಸಾಧ್ಯತೆ ಇರುತ್ತದೆ. ಮತ್ತೊಂದೆಡೆ ವೈರಸ್ ಮೇಲೆ ಜನರಿಗೆ ಭಯವಿದ್ದರೂ ತುಂಬಿ ಹರಿಯುತ್ತಿರುವ ನದಿಗಳು, ಭೋರ್ಗರೆವ ಜಲಪಾತಗಳು, ಹಚ್ಚ ಹಸಿರಿನ ಕಾನನಗಳು, ಪ್ರಾಣಿ-ಪಕ್ಷಿಗಳನ್ನುನೋಡದೆ ಇರುವುದಕ್ಕೆ ಆಗುವುದಿಲ್ಲ. ಆದ್ದರಿಂದ ಈ ಕೊರೊನಾ ಕಾಲದಲ್ಲಿ ಪ್ರಯಾಣಿಸುವಾಗ ಸುರಕ್ಷತೆಯ ಜೊತೆಗೆ ನೀವು ಅನುಸರಿಸಬಹುದಾದ ಕೆಲವು ಸಲಹೆಗಳು ಇಲ್ಲಿವೆ ನೋಡಿ.
ಮಾರ್ಗಸೂಚಿಗಳನ್ನು ಅನುಸರಿಸಿ
ಹೆಚ್ಚಿನ ರಾಜ್ಯಗಳು ಮತ್ತು ದೇಶಗಳು ಗಮ್ಯಸ್ಥಾನಗಳನ್ನು ಪ್ರವೇಶಿಸುವಾಗ ಮತ್ತು ನಿರ್ಗಮಿಸುವಾಗ ಅನುಸರಿಸಬೇಕಾದ ಮಾರ್ಗಸೂಚಿಗಳನ್ನು ಹೊರಡಿಸಿವೆ. ಕೆಲವು ಕಡೆ ಕ್ವಾರಂಟೈನ್ ಅವಧಿ ಇದ್ದು, ಇದನ್ನು ಮುಗಿಸಿಕೊಂಡ ನಂತರ ತೆರಳಲು ಅವಕಾಶ ಕಲ್ಪಿಸಲಾಗುತ್ತದೆ. ಇತರರಿಗೆ ನೀವು ಕೋವಿಡ್ -19 ನೆಗೆಟಿವ್ ಇರುವ ವೈದ್ಯಕೀಯ ಪ್ರಮಾಣಪತ್ರಗಳನ್ನು ತೋರಿಸಬೇಕಾಗುತ್ತದೆ. ಹೀಗೆ ಇತ್ಯಾದಿ ನಿಯಮಗಳು ಇರುವುದರಿಂದ ನೀವು ಎಲ್ಲದಕ್ಕೂ ತಯಾರಾಗಿ, ಸುರಕ್ಷಿತ ಪ್ರವಾಸ ಕೈಗೊಳ್ಳಲು ಸಮರ್ಥರಾಗಿದ್ದೀರಾ ಎಂದು ಖಚಿತಪಡಿಸಿಕೊಂಡು, ನಂತರ ಈ ಮಾರ್ಗಸೂಚಿಗಳನ್ನು ಅನುಸರಿಸುವುದು ಉತ್ತಮ.
ಎಲ್ಲಾ ಅಗತ್ಯ ವಸ್ತುಗಳನ್ನು ಒಯ್ಯಿರಿ
ಸಾಂಕ್ರಾಮಿಕ ವೈರಸ್ ಜಗತ್ತಿನ ಮೂಲೆ ಮೂಲೆಗಳನ್ನು ಬಿಡದೆ ಕಾಡುತ್ತಿದೆ. ಆದ್ದರಿಂದ ಪ್ರಯಾಣದ ಸಮಯದಲ್ಲಿ ಸ್ವಚ್ಛತೆ ಕಾಪಾಡಿಕೊಳ್ಳುವುದು ಬಹಳ ಮುಖ್ಯ. ಫೇಸ್ ಮಾಸ್ಕ್, ಜೋಡಿ ಕೈಗವಸುಗಳು, ಆಲ್ಕೋಹಾಲ್ ವೈಪ್ಸ್ ಮತ್ತು ಹ್ಯಾಂಡ್ ಸ್ಯಾನಿಟೈಜರ್ ಗಳು ಹೀಗೆ…ಒಟ್ಟಿನಲ್ಲಿ ನಿಮಗೆ ಅಗತ್ಯವಿರುವ ಎಲ್ಲಾ ವಸ್ತುಗಳನ್ನು ಒಯ್ಯಿರಿ. ಎಲಿವೇಟರ್ ಅಥವಾ ಎಟಿಎಂ ಬಟನ್ ಪ್ರೆಸ್ ಮಾಡಲು ಟೂತ್ಪಿಕ್’ನಂತಹ ಸಣ್ಣ ಬಿಸಾಡಬಹುದಾದ ವಸ್ತುಗಳನ್ನು ಒಯ್ಯಿರಿ. ಬಳಕೆಯ ನಂತರ ಅವುಗಳನ್ನು ಎಚ್ಚರಿಕೆಯಿಂದ ವಿಲೇವಾರಿ ಮಾಡಿ. ನಿಮ್ಮ ಎಲ್ಲಾ ದಾಖಲೆಗಳು ಸರಿಯಾಗಿದ್ದು, ಪ್ಲಾಸ್ಟಿಕ್ ಕವರ್’ನಲ್ಲಿ ಇರಿಸಿದ್ದೀರಾ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ದೀರ್ಘ ಪ್ರವಾಸ ಕೈಗೊಂಡಾಗ ಸ್ಥಳೀಯ ಅಂಗಡಿಗಳಿಂದ ಇವುಗಳನ್ನೆಲ್ಲಾ ಖರೀದಿಸುವುದು ತಪ್ಪುತ್ತದೆ.
ಪ್ರವಾಸಕ್ಕೆ ಹೋಗೋದಾದ್ರೆ ಇದೆಲ್ಲಾ ಇರಲೇ ಬೇಕು ಅಲ್ವಾ?
ವೈದ್ಯಕೀಯ ಮತ್ತು ಪ್ರಯಾಣದ ಇತಿಹಾಸ ವಿವರಗಳನ್ನು ಕೊಡಿ
ನೀವು ಆರೋಗ್ಯವಾಗಿದ್ದರೂ ಸಹ ನಿಮ್ಮ ಎಲ್ಲಾ ವೈದ್ಯಕೀಯ ಇತಿಹಾಸವನ್ನು ನಿಮ್ಮ ಪ್ರಯಾಣದ ಸಮಯದಲ್ಲಿ ನೀವು ಪ್ರಸ್ತುತಪಡಿಸಿ. ಪ್ರಯಾಣದ ಸಮಯದಲ್ಲಿ ವೈದ್ಯಕೀಯ ಧೃಢೀಕರಣ ಪತ್ರಗಳು, ಫಿಟ್ನೆಸ್ ಸರ್ಟಿಫಿಕೇಟ್ ಅನ್ನು ಜಾಗರೂಕತೆಯಿಂದ ತೆಗೆದುಕೊಂಡು ಹೋಗಿ. ಈ ನಿಯಮಗಳನ್ನು ಅನುಸರಿಸುವ ಮೂಲಕ ವೈರಸ್ ಅನ್ನು ಪ್ರಪಂಚದಾದ್ಯಂತ ಹರಡುವುದನ್ನು ನಾವು ತಪ್ಪಿಸಬಹುದು. ಹೆಚ್ಚಿನ ದೇಶಗಳು ಈ ಬಗ್ಗೆ ಜಾಗರೂಕರಾಗಿರುವುದರಿಂದ ನಿಮ್ಮ ಪ್ರಯಾಣದ ಇತಿಹಾಸವನ್ನು ಖಡ್ಡಾಯವಾಗಿ ಕೇಳುತ್ತಾರೆ.
ಪ್ರಯಾಣ ವಿಮೆಯನ್ನು ಪಡೆಯಿರಿ
ಪ್ರಯಾಣ ವಿಮೆಯನ್ನು ಪಡೆಯುವುದು ಉತ್ತಮ ಸಲಹೆ. ಕೊರೊನಾ ವೈರಸ್ ಇದ್ದರೂ ಅಥವಾ ಇರದಿದ್ದರೂ ಪರಿಚಯವಿಲ್ಲದ ಸ್ಥಳದಲ್ಲಿರುವಾಗ ಅಹಿತಕರ ಘಟನೆ ಸಂಭವಿಸಬಹುದು. ದುರದೃಷ್ಟವಶಾತ್ ಈಗ ಕೊರೊನಾ ಎಲ್ಲೆಡೆ ವ್ಯಾಪಿಸಿರುವುದರಿಂದ ಈ ಸಂದರ್ಭಗಳಲ್ಲಿ ಪ್ರಯಾಣ ವಿಮೆ ಇಟ್ಟುಕೊಳ್ಳುವುದು ಒಳ್ಳೆಯದು.
ತೆರಳುವ ಮೊದಲು ಗಮ್ಯಸ್ಥಾನದ ವಿವರ ಪಡೆಯಿರಿ
ಸುರಕ್ಷಿತ ಮತ್ತು ಆರಾಮದಾಯಕ ಪ್ರವಾಸಕ್ಕಾಗಿ ಗಮ್ಯಸ್ಥಾನದ ಮಾಹಿತಿ ಪಡೆದುಕೊಳ್ಳುವುದು ಮುಖ್ಯವಾಗಿದೆ. ಹೆಚ್ಚಿನ ತಾಣಗಳು ತಮ್ಮದೇ ಆದ ವೆಬ್ಸೈಟ್ ಹೊಂದಿದ್ದು, ವಸತಿ, ಚಟುವಟಿಕೆಗಳು ಮತ್ತು ಸ್ಥಳೀಯರ ಬಗ್ಗೆ ತಿಳಿದುಕೊಳ್ಳಬಹುದು. ಒಂದು ನಿರ್ದಿಷ್ಟ ಸ್ಥಳದ ಬಗ್ಗೆ ನೀವು ಹೆಚ್ಚು ಮಾಹಿತಿ ತಿಳಿದುಕೊಂಡಿದ್ದರೆ ನಿಮ್ಮ ಪ್ರಯಾಣದ ಸಮಯದಲ್ಲಿ ನೀವು ಕಳೆದುಹೋಗುವ ಅಥವಾ ಇತರ ಸಮಸ್ಯೆಗಳನ್ನು ಹೊಂದುವ ಸಾಧ್ಯತೆ ಕಡಿಮೆ.
ನಿಮ್ಮಲ್ಲಿ ಪಾಸ್ಪೋರ್ಟ್ ಇದ್ಯಾ? ಅದು ಯಾವ ಬಣ್ಣದಲ್ಲಿದೆ ?
ಸರಿಯಾದ ಯೋಜನೆ ಹಾಕಿಕೊಳ್ಳಿ
ನಿಮ್ಮ ಸಂಪೂರ್ಣ ಪ್ರವಾಸ, ವಾಸ್ತವ್ಯದ ಬಗ್ಗೆ ಮೊದಲೇ ಯೋಜನೆ ಹಾಕಿಕೊಳ್ಳುವುದು ಸೂಕ್ತವಾಗಿದೆ. ವಿಶೇಷವಾಗಿ ಕೊರೊನಾ ವೈರಸ್ ಹಾವಳಿ ಇರುವುದರಿಂದ ಕ್ರಮಬದ್ಧ ಯೋಜನೆ ಹಾಕಿಕೊಳ್ಳುವುದು ಕೆಟ್ಟ ಸಂದರ್ಭಗಳಲ್ಲಿ ನಿಮಗೆ ಸಹಾಯ ಮಾಡುತ್ತದೆ. ತೆರಳುವ ಮುನ್ನ ಕುಟುಂಬದವರಿಗೆ ಮತ್ತು ಸ್ನೇಹಿತರಿಗೆ ನಿಮ್ಮ ಪ್ರಯಾಣದ ವಿವರವಾದ ವಿವರಣೆಯನ್ನು ನೀಡಿ. ಏಕೆಂದರೆ ನಿಮ್ಮ ಪ್ರಯಾಣದ ಬಗ್ಗೆ ಅವರಿಗೂ ಒಂದು ನಿಗಾ ಇರುತ್ತದೆ. ಹಾಗೆಯೇ ಯಾವುದೇ ಅನಿರೀಕ್ಷಿತ ಸಂದರ್ಭಗಳಲ್ಲಿ ಅವರು ಅಧಿಕಾರಿಗಳನ್ನು ಸಂಪರ್ಕಿಸಬಹುದು.