ವಾರಾಂತ್ಯದ ಸಮಯದಲ್ಲಿ ನೀವು ಈ ಸ್ಥಳಕ್ಕೆ ಭೇಟಿ ನೀಡಬಹುದು. ಅಷ್ಟಕ್ಕೂ ಈ ಅದ್ಭುತವಾದ ಕೊಳ ಇರುವುದು ಹೊನ್ನಾವರದಲ್ಲಿ. ಆ ಜಲಪಾತದ ಹೆಸರೇ ಅಪ್ಸರಕೊಂಡ. ‘ಅಪ್ಸರೆಯರು ಸ್ನಾನ ಮಾಡುತ್ತಿದ್ದ’ ಕೊಳವನ್ನು ಅಪ್ಸರಕೊಂಡ ಎಂದು ಕರೆಯುತ್ತಾರೆ. ಅಷ್ಟಕ್ಕೂ ಈ ಕೊಳದ ಸೌಂದರ್ಯ ಎಂತದ್ದು ಎಂಬುದನ್ನು ಇಲ್ಲಿ ತಿಳಿಯಿರಿ. ( All PC: Pixabay ಸಾಂದರ್ಭಿಕ ಚಿತ್ರ)
ಬೆಂಗಳೂರಿನಿಂದ 476 ಕಿ.ಮೀ ದೂರದಲ್ಲಿದೆ
ಬೆಂಗಳೂರಿನಿಂದ ಸುಮಾರು 476 ಕಿ.ಮೀ ದೂರದಲ್ಲಿರುವ ಈ ಅಪ್ಸರಕೊಂಡ ಅನೇಕ ದಂತ ಕಥೆಗಳನ್ನು ಹೊಂದಿದೆ. ಆ ದಂತಕಥೆಯ ಪ್ರಕಾರ, ಈ ಕೊಳದಲ್ಲಿ ಅಪ್ಸರೆಯರು ಬಂದು ಸ್ನಾನ ಮಾಡುತ್ತಿದ್ದರು ಎಂದು ಹೇಳಲಾಗುತ್ತದೆ. ಜಲಕ್ರೀಡೆ ಮಾಡಲು ಬಯಸುವ ಮಂದಿ ಸಾಮಾನ್ಯವಾಗಿ ಈ ನೀರಿರುವ ತಾಣಗಳಿಗೆ ಭೇಟಿ ನೀಡಲು ಬಯಸುತ್ತಾರೆ. ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲೂಕಿನ ಕಾಸರಗೋಡಿನಲ್ಲಿರುವ ಈ ಸುಂದರವಾದ ಕೊಳವು ಹೊನ್ನಾವರದಿಂದ ಕೇವಲ 7 ಕಿ.ಮೀ ದೂರದಲ್ಲಿದೆ.
ಸ್ಪಟಿಕ ಸ್ಪಷ್ಟವಾದ ನೀರು
ಕೊಳವು ಸ್ಪಟಿಕ ಸ್ಪಷ್ಟವಾದ ನೀರಿಗೆ ಹೆಸರುವಾಸಿಯಾಗಿದೆ. ಕೊಳದ ಕೆಳಭಾಗದಲ್ಲಿರುವ ಕಲ್ಲುಗಳು ಕಣ್ಣಿಗೆ ಸ್ಪಷ್ಟವಾಗಿ ಗೋಚರಿಸುವಷ್ಟು ನೀರು ನಿಚ್ಚಳವಾಗಿದೆ.
ಇನ್ನು ಜಲಪಾತವು 10 ಮೀಟರ್‌ ಎತ್ತರದಿಂದ ಧುಮ್ಮುಕ್ಕುತ್ತದೆ. ಕೇವಲ 10 ಮೀಟರ್‌ ಎತ್ತರದಿಂದ ಆದರೂ ರಭಸವಾಗಿ ಕೊಳದಲ್ಲಿ ಬೀಳುವ ಆ ದೃಶ್ಯ ಅದ್ಭುತವಾದುದು. PC: Pixabay
ಮಳೆಗಾಲದಲ್ಲಿ ಭೇಟಿ ನೀಡಿ
ಅಪ್ಸರಕೊಂಡ ಕೊಳದ ನಿಜವಾದ ಸೌಂದರ್ಯವನ್ನು ಸವಿಯಲು ನೀವು ಪ್ರತ್ಯೇಕವಾಗಿ ಮಳೆಗಾಲದಲ್ಲಿಯೇ ಭೇಟಿ ನೀಡಬೇಕು. ಈ ಕೊಳದ ಸುತ್ತಲೂ ಗುಪ್ತವಾದ ಗುಹೆಗಳಿವೆ. ಅವುಗಳಲ್ಲಿ ಪಾಂಡವರು ತಮ್ಮ ವನವಾಸದ ಸಮಯದಲ್ಲಿ ಕೆಲವು ದಿನಗಳು ವಾಸ ಮಾಡಿದರು ಎಂದು ಹೇಳಲಾಗುತ್ತದೆ.
ಸಾಹಸಿ ಯುವಕರು ಜಲಪಾತದ ತುದಿಗೆ ತಲುಪಿ ಅಲ್ಲಿಂದ ಕೊಳಕ್ಕೆ ಧುಮುಕುವ ಮೂಲಕ ಮೋಜಿನ ಕ್ಷಣಗಳನ್ನು ಆನಂದಿಸುತ್ತಾರೆ. PC: Pixabay
ನೈಸರ್ಗಿಕ ಸೌಂದರ್ಯದಿಂದ ಆವೃತವಾಗಿದೆ
ಇನ್ನು, ಕೊಳವು ನೈಸರ್ಗಿಕ ಸೌಂದರ್ಯದಿಂದ ಆವೃತವಾಗಿದೆ. ಸುತ್ತಲೂ ಹಚ್ಚ ಹಸಿರಿನ ವಾತಾವರಣ, ಸ್ಪಷ್ಟವಾಗಿ ಗೋಚರಿಸುವ ನೀರು ಇಲ್ಲಿ ನಿಜಕ್ಕೂ ಕಣ್ಮನ ಸೆಳೆಯುತ್ತದೆ. ನಿರ್ಮಲವಾದ ವಾತಾವರಣದಲ್ಲಿ ಸ್ನೇಹಿತರೊಟ್ಟಿಗೆ ಆನಂದಮಯ ಕ್ಷಣಗಳನ್ನು ಕಳೆಯುವುದು ನಿಜಕ್ಕೂ ಸಂತೋಷವನ್ನುಂಟು ಮಾಡುತ್ತದೆ.
ಹಾಗೆಯೇ, ಇಲ್ಲೊಂದು ಉದ್ಯಾನವನವಿದೆ. ಉದ್ಯಾನವನದ ಸೌಂದರ್ಯವನ್ನು ಆನಂದಿಸಲು ನೀವು ಟಿಕೆಟ್‌ ತೆಗೆದುಕೊಳ್ಳಬೇಕಾಗುತ್ತದೆ. PC: Pixabay
ಅಪ್ಸರಕೊಂಡಕ್ಕೆ ಹೋದಾಗ ಇವೆಲ್ಲಾ ಪ್ರವಾಸಿ ಆಕರ್ಷಣೆಗಳನ್ನು ಕಣ್ತುಂಬಿಕೊಳ್ಳಿ
ನರಸಿಂಹಸ್ವಾಮಿ ದೇವಾಲಯ
ಉದ್ಬವ ಗಣಪತಿ ದೇವಾಲಯ
ರಾಮಚಂದ್ರ ಮಠ
ಸುಂದರ ಉದ್ಯಾನವನ
ದೇವಿಯ ಆಲಯ PC: Pixabay
