ನೀವು ದೆಹಲಿಯಲ್ಲಿದ್ದರೆ ಹತ್ತಿರದ ಈ ನಗರಗಳ ಪ್ರವಾಸದ ಪ್ಲ್ಯಾನ್ ಕೂಡಾ ಮಾಡಬಹುದು

| Image Courtesy : wikipedia/Umang108

ದೆಹಲಿಯ ಸಮೀಪ ಇರುವ ಪಾರಂಪರಿಕ ತಾಣವೆಂದರೆ ಅದು ಮಥುರಾ. ಹಿಂದೂ ಧರ್ಮೀಯರಿಗೆ ಇದು ಪವಿತ್ರ ಸ್ಥಳ ಕೂಡಾ ಹೌದು. ಶ್ರೀಕೃಷ್ಣನ ಜನ್ಮಸ್ಥಳವಾದ ಮಥುರಾಕ್ಕೆ ಸಾಕಷ್ಟು ಸಂಖ್ಯೆಯಲ್ಲಿ ಯಾತ್ರಾರ್ಥಿಗಳು ಬರುತ್ತಿರುತ್ತಾರೆ. ಇಲ್ಲಿ ಸಾಕಷ್ಟು ಅಪೂರ್ವ ದೇವಾಲಯಗಳು, ಸ್ಮಾರಕಗಳು, ಧಾರ್ಮಿಕ ಸ್ಥಳಗಳಿವೆ. ಹೀಗಾಗಿ, ಇಲ್ಲಿಗೆ ಭೇಟಿ ನೀಡಿದರೆ ಇಲ್ಲಿನ ಅಪೂರ್ವ ಇತಿಹಾಸ, ಸಾಂಸ್ಕೃತಿಕ ವೈಭವವನ್ನೂ ತಿಳಿದುಕೊಳ್ಳಬಹುದಾಗಿದೆ. ಆಗ್ರಾದ ಉತ್ತರಕ್ಕೆ ಸರಿಸುಮಾರು 57.6 ಕಿಲೋಮೀಟರ್ ಮತ್ತು ದೆಹಲಿಯ ಆಗ್ನೇಯಕ್ಕೆ 166 ಕಿಲೋಮೀಟರ್ ದೂರದಲ್ಲಿ ಮಥುರಾ ಇದೆ. ಮಥುರಾ ಸಪ್ತ ಪುರಿಗಳಲ್ಲಿ ಒಂದಾಗಿದೆ. ಪ್ರತಿವರ್ಷ ಮಥುರಾದಲ್ಲಿ ಜನ್ಮಾಷ್ಟಮಿಯನ್ನು ಅದ್ಧೂರಿಯಾಗಿ ಆಚರಿಸಲಾಗುತ್ತದೆ.

| Image Courtesy : wikipedia/Sainiikshank1410

ರಾಜಸ್ಥಾನದ ಪೂರ್ವ ಭಾಗದಲ್ಲಿ ಭರತ್‌ಪುರ ಎಂಬ ಭವ್ಯ ನಗರವಿದೆ. ರಾಜಸ್ಥಾನದ ಸಂಸ್ಕೃತಿ, ಪರಂಪರೆಯ ದರ್ಶನ ಇಲ್ಲಾಗುತ್ತದೆ. ಇಲ್ಲಿರುವ ದೇಗುಲಗಳು ಕಣ್ಮನ ಸೆಳೆಯುತ್ತವೆ. ಜತೆಗೆ, ಭರತ್‌ಪುರದ ರಸ್ತೆ ಪ್ರವಾಸವೂ ರೋಮಾಂಚನಕಾರಿಯಾಗಿರುತ್ತದೆ. ಇನ್ನು ನಗರದ ಹೃದಯಭಾಗದಲ್ಲಿ 18ನೇ ಶತಮಾನದಲ್ಲಿ ನಿರ್ಮಿಸಲಾದ ಭವ್ಯವಾದ ಲೋಹಗರ್ ಕೋಟೆಯಿದೆ. ಭರತ್‌ಪುರಕ್ಕೆ ಬಂದವರು ಈ ಕೋಟೆಗೆ ಭೇಟಿ ನೀಡದೆ ಮರಳುವುದೇ ಇಲ್ಲ. ಇಲ್ಲಿನ ಅದ್ಭುತ ಭೂದೃಶ್ಯ ಕೂಡಾ ಕಣ್ಣಿಗೆ ಆನಂದ ನೀಡುವಂತಿರುತ್ತದೆ. ಇನ್ನು ಭರತ್‌ಪುರ ವನ್ಯಜೀವಿ ಅಭಯಾರಣ್ಯಕ್ಕೂ ಪ್ರಸಿದ್ಧಿ ಪಡೆದಿದೆ. ದೆಹಲಿಯಿಂದ ದಕ್ಷಿಣಕ್ಕೆ ಸುಮಾರು 180 ಕಿಲೋ ಮೀಟರ್, ಜೈಪುರದಿಂದ ಸುಮಾರು 178 ಕಿಲೋಮೀಟರ್, ಉತ್ತರ ಪ್ರದೇಶದ ಆಗ್ರಾದ ಪಶ್ಚಿಮಕ್ಕೆ 55 ಕಿಲೋಮೀಟರ್ ದೂರದಲ್ಲಿ ಈ ಅಪೂರ್ವ ಪಟ್ಟಣವಿದೆ.

| Image Courtesy : wikipedia/Ajit Kumar Majhi

ರಾಜಸ್ಥಾನ ಎಂದರೆ ಪ್ರವಾಸಿಗರಿಗೆ ಬಲು ಅಚ್ಚುಮೆಚ್ಚು. ಅರಮನೆ, ಕೋಟೆ, ಮರುಭೂಮಿ ಇರುವ ಅದ್ಭುತ ರಾಜ್ಯವಿದು. ಇಲ್ಲಿನ ಪರ್ವತ ಶ್ರೇಣಿಗಳು ನಿಮ್ಮ ಗಮನ ಸೆಳೆಯದೇ ಇರದು. ಅಂತೆಯೇ, ದೆಹಲಿಯಿಂದ ಪ್ರವಾಸದ ಪ್ಲ್ಯಾನ್ ಮಾಡುವವರು ರಾಜಸ್ಥಾನಕ್ಕೂ ಹೋಗಿ ಬರಬಹುದು. ರಸ್ತೆಯ ಮೂಲಕ ಸಾಗುವುದಾದರೆ ದೆಹಲಿಯಿಂದ ರಾಜಸ್ಥಾನಕ್ಕೆ ಇರುವ ದೂರ ಸುಮಾರು 270 ಕಿಮೀ ಮಾತ್ರ. ಹೀಗಾಗಿ, ವಾರಾಂತ್ಯದಲ್ಲಿ ಅಥವಾ ಸುದೀರ್ಘ ರಜೆಯಲ್ಲಿ ದೆಹಲಿಗೆ ತೆರಳಿದ್ದರೆ ಜೈಪುರದ ಸುಂದರ ಕೋಟೆ, ಅರಮನೆಗಳನ್ನು ಸಂದರ್ಶಿಸಿ ಬರಬಹುದು. ಜೈಪುರದಲ್ಲಿ ನಿಮ್ಮ ಮನಸ್ಸಿಗೆ ಖುಷಿ ನೀಡುವ ತಾಣಗಳಿಗೇನೂ ಕೊರತೆ ಇಲ್ಲ. ಹೀಗಾಗಿ, ಇಲ್ಲಿನ ಪ್ರವಾಸವೂ ನಿಮಗೆ ಹೊಸ ಅನುಭವವನ್ನೇ ತರಬಹುದು. ಸಾಕಷ್ಟು ಮಂದಿ ದೆಹಲಿಯಿಂದ ಜೈಪುರದ ಪ್ರವಾಸ ಮಾಡುತ್ತಾರೆ.

Also Read : ಬೆಂಗಳೂರಿನಿಂದ ವೀಕೆಂಡ್ ಟ್ರಿಪ್‌ ಪ್ಲ್ಯಾನ್‌ನಲ್ಲಿರುವವರಿಗೆ ಈ ಜಾಗಗಳು ಖುಷಿ ನೀಡಬಹುದು

| Image Courtesy : wikipedia/Itsmalay~commonswiki

ಓರ್ಚಾ ಅಥವಾ ಉರ್ಚಾ ಮಧ್ಯಪ್ರದೇಶದ ನಿವಾರಿ ಜಿಲ್ಲೆಯಲ್ಲಿರುವ ಒಂದು ಪಟ್ಟಣ. ಇದು ಜನಪ್ರಿಯ ಪ್ರವಾಸಿ ತಾಣ ಕೂಡಾ ಹೌದು. ಬೆಟ್ವಾ ನದಿಯ ದಡದಲ್ಲಿರುವ ಈ ಪಟ್ಟಣ ಐತಿಹಾಸಿಕವಾಗಿಯೂ ಸಾಕಷ್ಟು ಮಹತ್ವ ಪಡೆದಿದೆ. ಝಾನ್ಸಿ ಕೋಟೆ, ರಾಣಿ ಝಾನ್ಸಿಯ ಅರಮನೆ, ಚತುರ್ಭುಜ ದೇವಾಲಯ, ಜಹಾಂಗೀರ್ ಮಹಲ್‌ನ ಸಮಾಧಿಗಳಂತಹ ಸುಂದರವಾದ ಸ್ಮಾರಕಗಳಿಗೆ ಓರ್ಚಾ ಹೆಚ್ಚು ಜನಪ್ರಿಯವಾಗಿದೆ. ದೆಹಲಿಯಿಂದ ಓರ್ಚಾಕ್ಕೆ ಇರುವ ದೂರ ಸರಿಸುಮಾರು 450 ಕಿಮೀ ದೂರದಲ್ಲಿದೆ. ಬೇಸಿಗೆಯ ತಿಂಗಳುಗಳಲ್ಲಿ ಇಲ್ಲಿ ತಾಪಮಾನ ಹೆಚ್ಚಿದ್ದು, ಮಾನ್ಸೂನ್ ಇಲ್ಲಿಗೆ ಭೇಟಿಗೆ ಉತ್ತಮ ಸಮಯವಾಗಿದೆ. ಮಧ್ಯಕಾಲೀನ ವಾಸ್ತುಶಿಲ್ಪವು ಇಲ್ಲಿ ಪ್ರವಾಸಿಗರನ್ನು ಸೆಳೆಯದೇ ಇರದು. ಇಲ್ಲಿ ಭೇಟಿ ನೀಡುವುದಕ್ಕೆ ಸಾಕಷ್ಟು ಐತಿಹಾಸಿಕ ತಾಣಗಳಿವೆ. ಹೀಗಾಗಿ ದೆಹಲಿಯಿಂದ ಅಥವಾ ಇನ್ನಾವುದೇ ಕಡೆಗಳಿಂದಲೂ ಸುದೀರ್ಘ ಪ್ರವಾಸದ ಯೋಚನೆಯಲ್ಲಿ ನೀವಿದ್ದರೆ ಈ ಸ್ಥಳವನ್ನೂ ಆಯ್ಕೆ ಮಾಡಿಕೊಳ್ಳಬಹುದು.

Also Read : ಕೋಲ್ಕತ್ತಾ ಪ್ರವಾಸದ ಸಿದ್ಧತೆಯಲ್ಲಿದ್ದೀರಾ? : ಹಾಗಾದರೆ, ನೀವು ಇಲ್ಲಿಗೆಲ್ಲಾ ಭೇಟಿ ನೀಡಬಹುದು

| Image Courtesy : wikipedia/Piyush Tripathi

ಗಿರಿಧಾಮಗಳಿಗೆ ಹೋಗುವ ಖುಷಿಯೇ ಬೇರೆ. ಅಂತೆಯೇ, ಸುದೀರ್ಘ ರಜೆಯಲ್ಲಿ ದೆಹಲಿಯಿಂದ ಯಾವುದಾದರೂ ಗಿರಿಧಾಮಕ್ಕೆ ಹೋಗಬೇಕು ಎಂಬ ಪ್ಲ್ಯಾನ್‌ನಲ್ಲಿ ನೀವಿದ್ದರೆ ಡಾಲ್‌ಹೌಸಿಗೆ ಭೇಟಿ ನೀಡಬಹುದು. ಹಿಮಾಚಲ ಪ್ರದೇಶದ ಪ್ರಸಿದ್ಧ ಮತ್ತು ಸುಂದರ ಗಿರಿಧಾಮಗಳಲ್ಲಿ ಡಾಲ್‌ಹೌಸಿ ಕೂಡಾ ಒಂದು. ಇಲ್ಲಿನ ಆಹ್ಲಾದಕರ ವಾತಾವರಣದ ಹಿತ ಅನುಭವಿಸುವ ಸಲುವಾಗಿಯೇ ಸಾಕಷ್ಟು ಮಂದಿ ಪ್ರವಾಸಿಗರು ಇಲ್ಲಿಗೆ ಸದಾ ಭೇಟಿ ನೀಡುತ್ತಿರುತ್ತಾರೆ.

Also Read : ಮಕ್ಕಳೊಂದಿಗೆ ಪ್ರವಾಸ ಹೋಗುವಾಗ ಹೆತ್ತವರು ಈ ಎಲ್ಲಾ ಅಂಶಗಳತ್ತ ಗಮನ ಹರಿಸಿ

ಚಂಬಾ ಜಿಲ್ಲೆಯಲ್ಲಿ ಸಮುದ್ರ ಮಟ್ಟದಿಂದ ಸುಮಾರು 2,000 ಮೀಟರ್‌ಗಳಷ್ಟು ಎತ್ತರದಲ್ಲಿ ಈ ಗಿರಿಧಾಮವಿದೆ. ಡಾಲ್‌ಹೌಸಿಯು ದೆಹಲಿಯಿಂದ ಸುಮಾರು 570 ಕಿ.ಮೀ ದೂರದಲ್ಲಿದೆ. ಸುಂದರವಾದ ಹುಲ್ಲುಗಾವಲುಗಳು, ಸೊಂಪಾದ ಪೈನ್ ಕಾಡುಗಳು ಇಲ್ಲಿ ಗಮನ ಸೆಳೆಯುತ್ತದೆ. ದೆಹಲಿಯ ಬ್ಯುಸಿ ಲೈಫ್‌ನಿಂದ ಆಚೆ ಬರುವುದಕ್ಕೆ ಸಾಕಷ್ಟು ಮಂದಿ ಇಲ್ಲಿಗೆ ಭೇಟಿ ನೀಡುತ್ತಾರೆ.