Bigg Boss 6, 9th December, Day 50: ಬಿಗ್‌ ಮನೆಯಲ್ಲಿ ಹಾಸ್ಯದ 'ಆರೆಂಜ್‌' ಜ್ಯೂಸ್‌ ಕುಡಿಸಿದ ಗಣೇಶ್‌

ಬಿಗ್‌ ಬಾಸ್‌ ಆರನೇ ಆವೃತ್ತಿ ಅರ್ಧಶತಕ ಬಾರಿಸಿದೆ. ಫಿಫ್ಟಿ ಬಾರಿಸಿದ ಖುಷಿಯಲ್ಲಿ ಸ್ಪರ್ಧಿಗಳು ಸಂಭ್ರಮಪಟ್ಟರು.

ಅರ್ಧಶತಕ ಬಾರಿಸಿದ ಸಂತಸದಲ್ಲಿದ್ದ ಸ್ಪರ್ಧಿಗಳಿಗೆ ಆರೆಂಜ್‌ ಜ್ಯೂಸ್‌ ಕುಡಿದಷ್ಟೇ ಸಂತಸವಾಯಿತು.

ಇದರ ಬೆನ್ನಲ್ಲೇ ಆರೆಂಜ್‌ ಚಿತ್ರದ ನಾಯಕ ಬಂದು ಬಿಗ್‌ ಮನೆಯನ್ನೇ ವಶಕ್ಕೆ ತೆಗೆದುಕೊಂಡರು.

ತಮ್ಮ ಆಜ್ಞೆಗಳಿಂದ ಸ್ಪರ್ಧಿಗಳನ್ನು ಸ್ವಲ್ಪ ಹೊತ್ತು ಆಟವಾಡಿಸಿದರು. ಆ ನಂತರ ಬಿಗ್‌ ಮನೆಗೆ ಆರೆಂಜ್‌ ಚಿತ್ರದ ನಾಯಕ ಗೋಲ್ಡನ್‌ ಸ್ಟಾರ್‌ ಗಣೇಶ್‌ ಎಂಟ್ರಿ ಕೊಟ್ಟರು.

ಸ್ಪರ್ಧಿಗಳ ಜತೆ ಗೋಲ್ಡನ್‌ ಸ್ಟಾರ್ ಸ್ಪರ್ಧಿಗಳನ್ನು ತಮ್ಮದೇ ಶೈಲಿಯಲ್ಲಿ ಹಾಸ್ಯದ ಹೊಳೆಯಲ್ಲಿ ತೇಲಿಸಿದರು.

ಅದರಲ್ಲೂ ಆಂಡಿ ಮತ್ತು ಕವಿತಾ ನಡುವಿನ ಸಂಭಾಷಣೆಯನ್ನು ಮಿಮಿಕ್ರಿ ಮಾಡಿ ಬಿಗ್‌ ಮನೆಯಲ್ಲಿ ಅತ್ಯಂತ ಹೈಲೈಟ್‌ ದೃಶ್ಯ ಎಂದು ಷರಾ ಬರೆದರು.

ನಂತರ ಎಂದಿನಂತೆ ಬಿಗ್‌ ವೇದಿಕೆಗೆ ಗೋಲ್ಡನ್‌ ಸ್ಟಾರ್‌ ಅವರನ್ನು ಕರೆದರು ಬಿಗ್‌ಬಾಸ್‌ ನಿರೂಪಕ ಸುದೀಪ್‌.

ಆರೆಂಜ್‌ ಚಿತ್ರದ ಬಗ್ಗೆ ಉಭಯರು ಚರ್ಚೆ ನಡೆಸಿದರು. ನಂತರ ಮನೆಯಲ್ಲಿ ಯಾರು ಬಿಗ್‌ ಬಾಸ್‌ ಎನ್ನುವ ವಿಷಯದಲ್ಲಿ ಇಬ್ಬರೂ ತಮ್ಮ ತಮ್ಮ 'ಇಷ್ಟ ಕಷ್ಟಗಳನ್ನು' ಹಂಚಿಕೊಂಡರು.


ಸುಮಾರು ಅರ್ಧಗಂಟೆಗೂ ಹೆಚ್ಚು ಕಾಲ ಸೂಪರ್ ಸಂಡೇ ವಿಥ್‌ ಸುದೀಪ್‌ ಕಾರ್ಯಕ್ರಮವನ್ನು ಗೋಲ್ಡನ್‌ ಸ್ಟಾರ್‌ ನಗೆಯ ಗಡಲಿನಲ್ಲಿ ಮುಳುಗಿಸಿದರು.

ಕಳೆದ ವಾರ ಅಂಬಿ ನಮನ ಕಾರ್ಯಕ್ರವಿದ್ದ ಹಿನ್ನೆಲೆಯಲ್ಲಿ ಆನಂದ್‌ ಅವರನ್ನು ಬಿಗ್‌ ವೇದಿಕೆ ಕರೆಸಿಕೊಂಡಿರಲಿಲ್ಲ. ಹೀಗಾಗಿ ಇಂದಿನ ಕಾರ್ಯಕ್ರಮದಲ್ಲಿ ಸುದೀಪ್ ಅವರೊಂದಿಗೆ ಚಿಟ್‌ಚಾಟ್‌ ಮಾಡಿದರು.

ಆ ನಂತರ ಶನಿವಾರ ಎಲಿಮಿನೇಟ್‌ ಆದ ಸೋನು ಪಾಟೀಲ್‌ ಜತೆ ಸುದೀಪ್‌ ಮಾತುಕತೆ ನಡೆಸಿದರು. ಅದರಲ್ಲೂ ನವೀನ್‌ ಜತೆಗಿನ ನಂಟಿನ ಬಗ್ಗೆ ಸುದೀಪ್‌ ಕೆದಕಿ ಕೆದಕಿ ಸೋನುರಿಂದ ಉತ್ತರ ತರಿಸಿದರು. ಕೊನೆಗೆ ಸ್ಟೀಟ್ ಹಾರ್ಟ್‌ ಎಂದು ಸೋನು ನವೀನ್‌ ಬಗ್ಗೆ ಮೆಚ್ಚುಗೆ ಸೂಚಿಸಿದರು.