Bigg Boss 13 winner: 'ದಿಲ್ ಸೆ ದಿಲ್ ತಕ್' ಸ್ಪರ್ಧಿಯ ಪಾಲಾದ ಬಿಗ್ ಬಾಸ್ ಟ್ರೋಫಿ

ಸಲ್ಮಾನ್ ಖಾನ್ ನಿರೂಪಣೆಯಲ್ಲಿ ಮೂಡಿಬರುತ್ತಿರುವ ಹಿಂದಿ ಬಿಗ್ ಬಾಸ್ ಸೀಸನ್ 13ಕ್ಕೆ ಇದೇ ಶನಿವಾರ (ಫೆಬ್ರವರಿ 14) ತೆರೆಬಿದ್ದಿದೆ. ಹಲವು ವಾರಗಳ ಕಾಲ ಬಿಗ್ ಬಾಸ್ ಮನೆಯಲ್ಲಿ ಲಾಕ್ ಆಗಿದ್ದ ಸ್ಪರ್ಧಿಗಳಲ್ಲಿ ಅಂತಿಮವಾಗಿ ಸಿದ್ಧಾರ್ಥ್ ಶುಕ್ಲಾ ಈ ಸೀಸನ್ ವಿಜೇತರಾಗಿ ಹೊರಹೊಮ್ಮಿದ್ದಾರೆ.

ಸಿದ್ಧಾರ್ಥ್ ಶುಕ್ಲಾ ಹಿಂದಿಯ ದಿಲ್ ಸೆ ದಿಲ್ ತಕ್ ಧಾರಾವಾಹಿಯಲ್ಲಿ ಅಭಿನಯಿಸಿದ್ದು ಈ ಸೀಸನ್ ವಿಜೇತರಾಗುವ ಮೂಲಕ ರೂ. 40 ಲಕ್ಷ ನಗದನ್ನು ತನ್ನದಾಗಿಸಿಕೊಂಡಿದ್ದಾರೆ. ರನ್ನರ್ ಅಪ್ ಸ್ಥಾನಕ್ಕೆ ಅಸಿಮ್ ರಿಯಾಜ್ ತೃಪ್ತಿಪಟ್ಟಿದ್ದಾರೆ.

ಬಿಗ್ ಬಾಸ್ ಮನೆಯಲ್ಲಿ ಅತ್ಯಂತ ಸ್ಫುರದ್ರೂಪಿ ಸ್ಪರ್ಧಿ ಎನ್ನಿಸಿಕೊಂಡಿದ್ದರು ಸಿದ್ಧಾರ್ಥ್ ಶುಕ್ಲಾ. ತಮ್ಮ ಲುಕ್ ಮೂಲಕವೇ ಎಲ್ಲರ ಮನಸೆಳೆದಿದ್ದರು. ಇವರು ಒಂಥರಾ ನಮ್ಮ ಕನ್ನಡ ಬಿಗ್ ಬಾಸ್‌ನ ಕಿಶನ್ ಇದ್ದಂತೆ. ಮನೆಯ ಬಹುತೇಕ ಕೆಲಸಗಳನ್ನು ಮಹಿಳಾ ಸ್ಪರ್ಧಿಗಳ ಜೊತೆಗೆ ಹಂಚಿಕೊಳ್ಳುತ್ತಿದ್ದರು.

ಬಿಗ್ ಬಾಸ್ ಮನೆಗೆ ಅಡಿಯಿಟ್ಟಾಗ ಆರಂಭದಲ್ಲಿ ಸಿದ್ಧಾರ್ಥ್ ಶುಕ್ಲಾಗೆ ಹೊಂದಾಣಿಕೆ ಸಮಸ್ಯೆಯಾಗಿತ್ತು. ಹಾಗಾಗಿ ಕೆಲವರ ಜೊತೆಗೆ ಜಗಳ ಮಾಡಿಕೊಂಡಿದ್ದೂ ಉಂಟು. ದಿನ ಕಳೆದಂತೆ ಗೆಳೆಯರು ಹುಟ್ಟಿಕೊಂಡರು. ಅವರಲ್ಲಿ ಅಸಿಂ ರಿಯಾಜ್ ಸಹ ಒಬ್ಬರು. ಆದರೆ ಈ ಗೆಳೆತನ ತುಂಬಾ ದಿನ ಉಳಿಯಲಿಲ್ಲ. ಇದಕ್ಕೆ ಕಾರಣವಾಗಿದ್ದು ಫೈನಲ್ ನಾಮಿನೇಷನ್ ಪ್ರಕ್ರಿಯೆ. ಪರಾಸ್‌ರನ್ನು ಸಿದ್ಧಾರ್ಥ್ ಸೇವ್ ಮಾಡಿದ ಕಾರಣ ಅಸಿಮ್ ಮುನಿಸಿಕೊಂಡರು.

ಪಂಜಾಬಿ ನಟಿ ಶೆಹನಾಝ್ ಗಿಲ್ ಜೊತೆಗೆ ರೊಮ್ಯಾನ್ಸ್ ಮಾಡುತ್ತಾ ಕಿರುತೆರೆ ವೀಕ್ಷಕರಿಗೆ ಭರ್ಜರಿ ಮನರಂಜನೆಯಂತೂ ನೀಡುತ್ತಿದ್ದರು. ಈ ಎಲ್ಲಾ ಕಾರಣಗಳಿಗಾಗಿ ಸಿದ್ಧಾರ್ಥ್ ಶುಕ್ಲಾಗೆ ಸಾಮಾಜಿಕ ಮಾಧ್ಯಮಗಳಲ್ಲಿ ಅಭಿಮಾನಿ ಬಳಗವೂ ಹುಟ್ಟಿಕೊಂಡಿತು. ರಶ್ಮಿ ದೇಸಾಯಿ ಜೊತೆಗಿನ ಸಿಹಿಕಹಿ ಸಂಬಂಧ ಚರ್ಚೆಗೆ ಗ್ರಾಸವಾಗಿತ್ತು.

ಇನ್ನೊಂದು ಗಮನಾರ್ಹ ಸಂಗತಿ ಎಂದರೆ ಡೆವೊಲೀನಾ ಭಟ್ಟಾಚಾರ್ಜಿ ಹಾಗೂ ಮಧುರಿಮಾ ತುಲಿಯನ್ನು ಫ್ಲರ್ಟ್ ಮಾಡುತ್ತಿದ್ದ ಸಿದ್ಧಾರ್ಥ್ ಶುಕ್ಲಾ ಹಲವರ ಕೆಂಗಣ್ಣಿಗೂ ಗುರಿಯಾಗಿದ್ದರು. ಈ ಸಂಬಂಧ ಸಿದ್ಧಾರ್ಥ್ ಅಭಿಮಾನಿಗಳು ಹಾಗೂ ವಿರೋಧಿಗಳ ನಡುವೆ ಸಾಮಾಜಿಕ ಮಾಧ್ಯಮಗಳಲ್ಲಿ ಕಿತ್ತಾಟ, ಜಗಳಗಳೂ ಆಗಿದ್ದವು.